Read Phom Naga 2 SHÜPPÜKENGPÜ 11 Bible Online

2 SHÜPPÜKENGPÜ 11 - Phom Naga bible

2 SHÜPPÜKENGPÜ 11

¹Mechem Rehoboam Jerusalem ngoipa, büpai Judah hatü Benjamin phang nyi kübü shennyak 1, 80, 000 thahshi Rehoboam phangkü leihen Israel am khüei hokhen nyükei thai.

²Shejao SHEMBÜPAlei shah Shemaiah thibü touei pei:

³Solomonei cheha, Judah am Rehoboam ongpa kü hatü Judah hatü Benjamin kü nyupü Israel am kü ha etuh,

⁴“SHEMBÜPAi hapakei enyüke: Nüngi nüngei jeihinaü am khüei hoknüng te-aong. Am peü shemei leidaituh; mehenangkü hapayü ngei dükpeih” shei e. Hanangkü jomi SHEMBÜPAlei shah kü kenhingei Jeroboam mü hoknüng ne-aongi leidai.

⁵Rehoboami Jerusalemei uotü Judah chingnyüthü kü penyü showteke.

⁶Büpai Bethlehem, Etam, Tekoa,

⁷Beth-Zur, Soko, Adullam,

⁸Gath, Mareshah, Ziph,

⁹Adoraim, Lakhish, Azekah,

¹⁰Zorah, Aijalon, hatü Hebron lingtü Judah hatü Benjamin kübü chingnyüthü kü penyü showteke.

¹¹Büpai penyüshathü wongshongi ling, hatü hathülei ching yompüthü tuh, hahying, mainga hatü yiü yowei tuh.

¹²Shao büpai inyüshung longpü hatü phunglang thaiyei chingnyüthülei tuh hatü hathü wong koh-ei ling. Hapakei büpai Judah hatü Benjamin büpa phangkü tuh.

¹³Israel kahdok peü lemei nyupü ngongpathü hatü Levi am peü büpa touei pei.

¹⁴Levi ami jom sheppü kahdok peü tuhphongtü Judah hatü Jerusalemei pei; mehenangkü Jeroboam hatü chehathüi jomphong ngongdou dükei SHEMBÜPA chongphohen nehani,

¹⁵büpai mongpükei shennyak jeyei vaümchong, büpai lingpü yum hatü mohoh cheha kahvangthü kü khümhen shingvaishi ngongpathü jeteke.

¹⁶Üami SHEMBÜPA, Israel Kahvang kü khümhen shei mong kü deih, Israel jatthü peü kübü Jerusalem yemei SHEMBÜPA, chebü chepalei Kahvang kü moila shuohhen peiteke.

¹⁷Jomi Judah ongching wong kohhü, hatü jomi bong jem thahshi Solomonei cheha Rehoboam kü sheüh; mehenangkü bong jem thahshi jomi David hatü Solomon nyilei lem kü kam.

¹⁸Rehoboami Davidei cheha Jerimothei yiükha Mahalath, hatü chenyü-ü Jesselei cheha Eliabei yiükha Abihail mü shem yem.

¹⁹Pinnyüi yeshangthü jem büh: Jeush, Shemariah hatü Zaham.

²⁰Pinnyü pheikü büpai Absalomei yiükha Maakah yah, hatü pinnyüi Abijah, Attai, Ziza hatü Shelomith hathü büh.

²¹Rehoboami chenyühathü hatü yiüphüthü peü mü Absalomei yiükha Maakah kü nyeishi bam. Büpa nyüha anpüshet hatü yiükphü pejem nyuteke, hatü yeshang hapüshet hatü yiükha pejemei pa nyuteke.

²²Rehoboami Maakah-i bühpü Abijah büpalei jeihinaüthü khongkü longpü ongpa leihü; mehenangkü büpa ong vaihühen shei ongpai deih.

²³Büpai jomphong mü kon kohshi notei, hatü Judah hatü Benjamin kemeilei penyü showtükpü chingnyüthülei chehathü shing laolao kü hanei tuh; büpai jomphong kü hahying changshi shuoh, hatü jomphong shing nyüha longi dang.