Read Phom Naga 2 SHÜPPÜKENGPÜ 12 Bible Online

2 SHÜPPÜKENGPÜ 12 - Phom Naga bible

2 SHÜPPÜKENGPÜ 12

¹Mechem Rehoboami vanglem lempü chongwongei lei, hatü büpa wong koh-ei leipa, büpa hatü Israel am peüi SHEMBÜPAlei shahkung yaktük.

²Rehoboam vanglem lempü bong ngapabü kü jomi SHEMBÜPA kü hingnelempü nangkü Ijip am Shishak ongpa Jerusalem khüei,

³koyei khari kho anpünyi hatü koyei haja pejem mütü aong. Büpa mü ieyei neaoki Libya, Sukkim, hatü Ethiopia am veshanthü pei.

⁴Büpai penyü showtükpü Judah chingnyüthü hahtü Jerusalem thahshi pei.

⁵Hahepak kü Shemaiah thibüi Rehoboam hatü Judah am lakchongbüthü kü Shishak peipü nangkü Jerusalemei thaiyei nyushingkü jomphong kü, “SHEMBÜPAi hapakei enyüke: Nüngi ngei tuhphongpü nangkü ngeiyao nüng Shishakei lakei tuhphongpeih” shei e.

⁶Hahepak kü Israel am lakchongbüthü hatü ongpa jom peü maanpü leitü, “SHEMBÜPAi dükpeyü jiüpeih” shei e.

⁷Mechem jom maanpü leipü SHEMBÜPAi eepa, SHEMBÜPAleipü hapa shah Shemaiah touei peiyei e, “Jomei mang nyingei maanpü leipü nangkü ngei jom nemahtükhen, shejao ngei jom kü yanglem hanei shuohhen, hatü ngelei mongshih Shishakei laki Jerusalem kü nekhüphüpih.

⁸Shejoongpa jomi Shishak phangkü chongphohen; shejüang jomi ngei chongphopü hatü lebü kahdok leipü ongpa chongphopü meshük laolao baong hanei nyinghen.”

⁹Hanangkü Ijip am Shishak ongpa Jerusalem khüei aong; büpai phopshem hatü ongshem leipü dounyünangba kemei koei leilang. Shao büpai Solomon ongpai lingpü hon inyüshung peü shetei leidai;

¹⁰shejao Rehoboam ongpai hathü jeiyei melangnyiam inyüshung lingtü ongpalei shem yompü veshan mübüthü kü shuoh.

¹¹Mechem ongpai phopshemei peihenshang, veshanthüi hathü notü büpa mü chemi daihamteke, hatü hapheikü leiyei veshanthü nyushingei tuhteke.

¹²Büpa maanpü leipü nangkü SHEMBÜPAlei mongshih büpa toueipü nyokei yahlang hatü jom chemjalak kü nemahtük. Judah kahdok nyuhichong meishi nyuteke.

¹³Hanangkü Rehoboam ongpai Jerusalem chongwongei vanglem lem. Mechem Rehoboam vanglem lemei chongpangpa, büpa nyübüh bong pinyipühük nyu. Jatthü peü khong kübü büpa khümhen jepü SHEMBÜPAlei chingnyü Jerusalemei bong anpünyet thahshi vanglem lem. Chenyülei menü Ammon am Naamah nyu.

¹⁴Büpai mang dük, hatü büpalei mongdangi SHEMBÜPA yemhen deih-ei nedang.

¹⁵Shaang chongpangpü kübü dohpü thahshi Rehoboami dükpü dou peü Shemaiah thibü hatü Iddo thibü nyilei bülem iepü lai kü nyangei nyüke. Rehoboam hi Jeroboam nyi aa kü vehok nedoh-i hok.

¹⁶Rehoboam di, hatü chebü chepa mü David Chingnyülei mahng vü, hatü cheha Abijah-i büpa kü jeiteke.