Read Phom Naga 2 SHÜPPÜKENGPÜ 13 Bible Online

2 SHÜPPÜKENGPÜ 13 - Phom Naga bible

2 SHÜPPÜKENGPÜ 13

¹Israel kü Jeroboami ong vaipü bong anpüshetpabü kü Judahlei Abijah vanglem lemei pang.

²Büpa Jerusalemei bong jem mon ong vai. Büpalei chenyü-ü Gibeah am Urielei yiükha Mikaiah nyu. Shaang Abijah hi Jeroboam nyi aa kü vehok vam.

³Abijah-i veshan 400, 000 mütü vehokei chongpang; hatü Jeroboami veshan 800, 000 mütü büpa khüei hokhen show ling.

⁴Hapheikü Abijah-i Ephraim phaüshang kahmük Zemaraim kahshangei yaongtü, “Ngei epü bangtuh, Jeroboam hatü Israel am peü!

⁵SHEMBÜPA, Israel Kahvangi hapa Israel ong hean-ü David hatü chehathü kü hüm homei vangeishuwei shuohpeih shei nenyingnyu je?

⁶Shejao Davidei cheha Solomonei chongphobü Nebatei cheha Jeroboami laophülei shembü khüei yaongteke,

⁷hatü shahhing ne-e, vanglem nenyingpü shennyak tenthü thaiyei yahtü Solomonei cheha Rehoboam hashih meheyao mangnyingpü hepak kü Rehoboam khüei yaongpeih” shei e.

⁸Shaang nüngi Davidei hüpeüthülei lak leipü SHEMBÜPAlei ongching khüei yaonghen küpjan temnyu je? Hih, nüng mü veshan longi nyüke, hatü Jeroboami ammei kahvang vaihen lingpü hon mohoh cheha nyüke.

⁹Shejao nüngi SHEMBÜPAlei ngongpathü, Aaronei hühihathü hatü Levi am changtüktü lebü kahdokei dükteipükei nüng nyingi ngongpathü neje-angpü je? Üam mohoh cheha hük hatü mi chebaongha nyet mütü ngongpa vaihen shei peinya, hathü kemei kahvang nevaipülei ngongpa leihünyüke.

¹⁰“Ham shingvaishi SHEMBÜPAyü hamei Kahvang, hatü hami büpa neyakphong. SHEMBÜPA chongphopüthüyü Aaronei hühihathü, ha kü Levi ami sheühnyeih.

¹¹Nepjeih yajeih jomi SHEMBÜPA kü jakpü moila hatü ayingshü jaknyeih. Jomi daütükpü nükdü kü aan haüei tuhnyeih, hatü yajeih hon awdük kü aw jakei tuhnyeih. Hami SHEMBÜPA, hamei Kahvangi mongpü düknyeih. Shejao nüngi büpa yakphongteke.

¹²Kahvangü ham mü nyüpeih; büpayü hamei lem mübü. Büpalei ngongpathüi amit vüngei nüng khüei thep nyükhen. Israel shennyakthü, SHEMBÜPA, ammei bühipa Kahvang khüei tehok; ammi neaokpih” shei eteke.

¹³Jeroboami büpalei veshanthü hanei Judah amei shangphei lem hatü shesha lemei show lingei deishih.

¹⁴Mechem Judah am shinei veipa, vepathüi jom shonlangtü ee. Jomi SHEMBÜPA kü len, hatü ngongpathüi amit vüng,

¹⁵hatü Judah am thep nyükei men dhüngteke. Jomi thep nyükei lenpü ngeü kü Abijah hatü Judah am tou kü Kahvangi Jeroboam hatü Israel am neütük.

¹⁶Judah am toueipü Israel am nyaidai, hatü Kahvangi jom Judah ami neühü.

¹⁷Abijah hatü büpalei veshanthüi Israel am veshanthü 500, 000 jütü neüteke.

¹⁸Hapa keiha Judah ami ha shan kü neü; mehenangkü jomi SHEMBÜPA, chebü chepalei Kahvang kü mongnyangteke.

¹⁹Abijah-i Jeroboam kü chang, hatü büpalei chingnyü Bethel, Jeshanah hatü Ephron hathü mü yopailei shonei nyupü chingthü omei yah.

²⁰Jeroboami Abijahlei nyih kü mechemao wong koh-ei nelei. SHEMBÜPAi büpa kü bhei hatü didai.

²¹Shejao Abijah wong kohpüba lei, hatü büpai nyüha anpüali yah, hatü hathüi yeshang hapünyi, hatü yiükha anpüvok büh.

²²Abijah-i dükpü lebü douthü; büpai epü hatü dükpü douthü peü Iddo thibülei büshah lai kü nyangei nyüpeih.