Read Phom Naga 2 SHÜPPÜKENGPÜ 14 Bible Online

2 SHÜPPÜKENGPÜ 14 - Phom Naga bible

2 SHÜPPÜKENGPÜ 14

¹Abijah ongpa di hatü chebü chepa mü David chingnyülei mahng vü. Cheha Asa-i büpa jeiyei ong vaiteke. Büpa hepak kü kahmük kü chingmeivangmei bong an thahshi nyu.

²Asa-i SHEMBÜPA, büpalei Kahvang touei mehe mei hatü jiü, ha dük.

³Büpai kung kahvangthülei moidü, vaümchong, daülangpü shemnyüthü, Asherah nyüha kahvangei lajeithü mangtükkem,

⁴hatü büpai Judah am kü SHEMBÜPA, chebü chepalei Kahvang yemhen hatü büpalei shahkungnyü hatü vanglemthü banghen e.

⁵Büpai Judah chingnyü peü leipü vaümchong hatü ayingshü jakpü moidü peü yaktükkem. Büpa phangkü ongching nyiushemmei kü nyu.

⁶Kahmük kü chingmeivangmei nyupü nangkü büpai Judah kü penyü showei chingnyüthü ling. Ha bongthü kü üpaiyao büpa mü nehok; mehenangkü SHEMBÜPAi büpa kü nyiushemmei shuoh.

⁷Büpai Judah am kü, “Jeni hathü chingnyüthü lingshah hatü hathü kü bham, shangdü, shaden hatü nyiampe lingshah; jeni SHEMBÜPA, jenei Kahvang yempü nangkü büpai jen kü peü lemei chingmeivangmei shuohpeih” shei e. Jomi hathü lingtü daeisheyei nyu.

⁸Judah leipü Asalei veshanthü inyüshung hatü phunglang changshi kotü jom 300, 000 nyu, hatü Benjamin leipü veshanthü inyüshung hatü pülah changshi kotü jom 280, 000 nyu. Jom peü monglongpü veshanthü nyuteke.

⁹Ethiopia am Zerah-i veshan lakh an mü koyei khari kho jem mütü Mareshah thahshi pei.

¹⁰Asa-ao büpa mü thep ponghen heih-ei Mareshah yopailei Zephathah Kahjilei show ling.

¹¹Hahepak kü Asa-i SHEMBÜPA, büpalei Kahvang kü, “SHEMBÜPA, wong kohpü am khüei wong nekohpü am kü sheühhen nüng keipü üpayao neshiü. Ham kü sheühshih, Oh SHEMBÜPA, hamei Kahvang; mehenangkü hami nüng kü mongnyangnyeih, hatü nüngei men kü hapa veshan khongnyü khüei hokhen daipeih. Oh SHEMBÜPA, nüngü hamei Kahvang; nüng kü hangkui teneühü” shei nyükei e.

¹²Asa hatü Judah am tou kü SHEMBÜPAi Ethiopia am neütük. Ethiopia am nyaidai,

¹³hatü Asa hatü veshanthüi Gerar thahshi changei dai, hatü Ethiopia am hükao yemmü aoei netuh-i mahtük; SHEMBÜPA hatü büpalei veshanthü touei jom longi mah. Judah ami dounyünangba longi shetei lei.

¹⁴Jomi Gerar shinpü chingthü longi hah; mehenangkü jom kü SHEMBÜPAleipü nyempü longi pei. Mophimo longi nyupü nangkü jomi douhinang longi shetei lei.

¹⁵Jomi yemhimak yompüthülei baümtapao hah, hatü mi, yum hatü ut longi yah-ei lei. Hapheikü jom Jerusalemei leidai.