Read Phom Naga 2 SHÜPPÜKENGPÜ 15 Bible Online

2 SHÜPPÜKENGPÜ 15 - Phom Naga bible

2 SHÜPPÜKENGPÜ 15

¹Kahvang laangha Odedei cheha Azariah kü pei.

²Büpai Asa mü pongteinüng heih-ei, “Ngei epü banghümao, Asa, Judah hatü Benjamin am peü. Am SHEMBÜPA mü nyupü thahshi büpayao am mü nyüke. Ammi büpa yemjema, ammi büpa danghen, shejao ammi büpa yaktükjema, büpaiyao am yaktükhen.

³Hepak luangi Israel amü hingshangpü Kahvang, nyuhhen venhen ngongpathü hatü shahkung neshiüi nyupeih.

⁴Shejao jom shanghah shingkü jomi SHEMBÜPA, Israel Kahvang yem hatü jomi büpa dangteke.

⁵Hathü nyih keyü yenlem kü longteihenao nemei-i nyupeih; mehenangkü kahmük kü nyupüthü peü nyempüvüngpai maei nyupeih.

⁶Jat hüki jat hük, hatü ongching hüki ongching hük hahhamteke; mehenangkü Kahvangi jom kü shanghah lemphü homei shangponghüpeih.

⁷Shejao am payü wong kohtuh, hatü ha kübü teyan; mehenangkü ammei dou kü laklei shuohhen” shei e.

⁸Mechem Asa-i Odedlei cheha Azariah thibüi tetpü hathü shah danpa, büpa mongyangei deih. Büpai jiühitnalaipü lajeithü Judah hatü Benjamin kahdok hatü büpai neüei yahpü Ephraim shangchingthü kübü yaktükkem. Büpai phopshem shemshom chingshelei nyupü SHEMBÜPAlei moidü leiyei ling.

⁹Hapheikü büpai Judah hatü Benjamin hatü jom mü nyupü Ephraim, Manasseh hatü Simeon nanglakthü peü thaihü; mehenangkü mechem SHEMBÜPA, büpalei Kahvangü Asa mü nyüke shei jomi veiaokpa, shennyak longi Israel leipü jom mü nyuhen heihteke.

¹⁰Jom Asa-i vanglem lempü lenyang jempabü bong anpüngapabü kü Jerusalemei thai.

¹¹Hahepak kü jomi vehok hepak kü leipü mohoh kho nyet, mi haja nyet hatü yum shei SHEMBÜPA kü moila shuoh.

¹²Jomei mongdang hatü laangha kempai SHEMBÜPA, chebü chepalei Kahvang yemhen vangeishuwteke.

¹³Longpü vaijao maanpü vaijao, nyüha vaijao baha vaijao üami SHEMBÜPA, Israel Kahvang neyem jütükhen shei nyuteke.

¹⁴Jomi SHEMBÜPA kü wongmü leneiwongei, amit hatü nyavaung vüngei vangpüshuwpü yah.

¹⁵Mong kempai vangeishuwpü nangkü Judah am mongongei nyu. Jomi mong shuoh-ei Kahvang yem, hatü jomi büpa dang. Hanangkü SHEMBÜPAi jom kü lem peü philei nyiushemmei shuoh.

¹⁶Asa ongpai chenyü Maakah-ao Asherah kahvang lajei lingpü nangkü ongpalei nyü shei epü hean kübü nüngtük. Asa-i lajei bentü nihtük, hatü Kidron Kahjilei aw kü jaktük.

¹⁷Büpai Israel leipü vaümchongthü nemangtükkemjao, Asa-i büpalei den kemei SHEMBÜPA kü lanei shuoh.

¹⁸Büpa hatü chepa jiji-i daüei tuhpü hon, ngin hatü lebü douthü phopshemei leiyei tuh.

¹⁹Asa-i vanglem lempü bong hapüanpünga mangngoi thahshi vehok nenyuham.