Read Phom Naga 2 SHÜPPÜKENGPÜ 16 Bible Online

2 SHÜPPÜKENGPÜ 16 - Phom Naga bible

2 SHÜPPÜKENGPÜ 16

¹Asa-i vanglem lempü bong hapüanpü vokpabü kü Israel am Baasha ongpai Judah am khüei aong, hatü Judah am Asa ongpalei kahmük kübü üpayao laoei nedaihen nevaijü neshühen shingvaishi Ramahlei penyü showteke.

²Hahepak kü Asa-i phopshemei, ongshemei tuhpü hon hi ngin yah-ei Damaskalei ong vaipü Aram am Ben-Hadad ongpa kü shom.

³“Opa hi ampa nyi aa kü nyupükei ji aa kao chingmei nyushah. Veituh, ngei nüng kü hon hi ngin shomphünyeih. Büpa ngei toueipü nyemleidaiphanüng nüngi Baasha mü chingmei nyupü mangkütuh” shei e.

⁴Asa ongpai epü kü Ben-Hadad ongpai mongteke, hatü büpai veshan mübüthü Israel jilathü hahhen shom. Jomi Ijon, Dan, Abel-Beth-Maakah, hatü hahying tuhpü Naphtali chingnyüthü peü hahteke.

⁵Mechem Baasha-i ha danpa, büpai Ramah lingpü doh-ei dousho yakphong.

⁶Hapheikü Asa ongpai Judah shennyak peü thaihütü Ramah leipü Baasha-i noteipü yaong hatü taukta peü shetei leiyei Giba hatü Mizpah chingnyü nyi lingteke.

⁷Hahepak kü Hanani thibü-i Judah am Asa ongpa touei peiyei büpa kü, “Mehenangkü nüngi SHEMBÜPA, nüngei Kahvang kü nevai, Aram amei ong kü mongnyangpü nangkü Aram am ongpalei veshanthü nüngei lak kübü yangdaiteke.

⁸Ethiopia hatü Libya amü veshan longi mü koyei khari hatü koyei veshanthü longi neshiüpü je? Shejao nüngi SHEMBÜPA kü mongnyangpü nangkü büpai nüngei lak kü jom shuohpeih.

⁹SHEMBÜPA kü mong kemei shuohpüthü kü wong kohhühen büpalei mük kahdoknyü peü lemei veishi nyüpeih. Nüngü ngadou dükteke, hanangkü shaang mebü vehok hokei mon nyuhen” shei e.

¹⁰Hapa thibüpai ha eshuohpü nangkü Asa longi mongshih; büpa longi mongshih-ei büpa yepei khoklatei tuh. Hahepak kü-üng nanglak hanei kü longi nemei-i shüvei.

¹¹Asa-i vanglem lempü chongpangpü kübü dohpü thahshi Judah hatü Israel ongthülei büshah laitap kü nyangei nyüke.

¹²Asa ong vaipü bong hapüanpü shüpabü kü la kü din vamei shangpong. Büpa kü longi tüngjao, büpai SHEMBÜPAleipü sheühpü neyem shejao meli nopüthü mon yemteke.

¹³Büpa ong vaipü bong pinyipühükpabü kü Asa di hatü chebü chepa mü mahng vü.

¹⁴David chingnyülei büpai thukei linghahpü mahngsha kü jomi büpa vüphong. Jomi vong meipü melivungla shangkü büpalei mahng lemhü hatü büpa kü dhüm huei aw shangshi jak.