Read Phom Naga 2 SHÜPPÜKENGPÜ 17 Bible Online

2 SHÜPPÜKENGPÜ 17 - Phom Naga bible

2 SHÜPPÜKENGPÜ 17

¹Cheha Jehoshaphati büpa jeiyei ong vai hatü Israel am khüei hokhen wong koh-ei ling.

²Büpai penyü showtükpü Judah chingnyüthü peülei veshanthü tuh hatü Judah kahdok hatü chepa Asa-i yahpü Ephraim kahdokei yombüthü shomei tuh.

³SHEMBÜPA Jehoshaphat mü nyu; mehenangkü büpai chongpangpü philei chepai kampü keiha kamteke. Büpai Baal kahvang kü nekhüm,

⁴shejao chepalei Kahvang yem, hatü Israel ami dükpükei nevai-i Kahvangei shahkungthü kü kam.

⁵SHEMBÜPAi ongchingü büpa phangkü chonglingei tuh, hatü Judah am peü thintho koei pei; hanangkü büpa mop hatü dhüm longi dang.

⁶Büpalei mong SHEMBÜPA kü lanei hinglem; anyei vaishi büpai Judah leipü vaümchong hatü Asherah kahvangthü yaktükkem.

⁷Büpa vanglem lempü bong jempabü kü Judah jilathü kü nyuhhen shingvaishi büpalei lakchongbüthü Ben-Hail, Obadiah, Zekhariah, Nethanel hatü Mikaiah shom,

⁸hatü jom mü Levi am Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah hatü Tob-Adonijah nyu, hatü ngongpa Elishama hatü Jehoram nyiyao nyu.

⁹Jomi SHEMBÜPAlei Shahkungnyü Laitap notü Judah peülei nyuh-ei dai; jomi Judah jilathü peülei daiyei nanglakthü kü nyuhteke.

¹⁰Judah kahdok kü ngeih-ei shonei nyupü ongchingthü peü SHEMBÜPA kü nyempü pei, hanangkü üamiyao Jehoshaphat mü nehok.

¹¹Philistia am hanei Jehoshaphat kü thintho hatü ngin shei bom koei pei, hatü Arab ami büpa kü mi chebaongha 7, 700 hatü yum 7, 700 koei pei.

¹²Jehoshaphat nyeinya wong kohpüba lei; büpai Judahlei penyüshathü hatü hahying tuhhen chingnyüthü ling,

¹³hatü Judah jilathü kü hahying longi shuohhamteke. Büpai Jerusalemei vehok hokhen meishi nyingpü veshanthü tuh.

¹⁴Jomei men shemdep aimü hapakei nyüke: Judah leipü haja hük shak kü mübüthü: Adnah mü veshan 300, 000 nyu;

¹⁵hapheikü Jehohanan mü veshan 280, 000 nyu;

¹⁶hapheikü Zikhrilei cheha, Amasiah, üpai SHEMBÜPAlei dousho kü lanei shuoh, büpa mü veshan 200, 000 nyu.

¹⁷Benjamin leipü: Eliada, wong kohpü veshan mü veshanthü 200, 000 lah hatü inyüshung changshi kotü nyu;

¹⁸hapheikü Jehozabad mü lahhilaong changshi kotü veshan 180, 000 nyu.

¹⁹Judah kü penyü showtükpü chingnyüthü kü tuhpü veshanthü mü lenei hathüi ongpa chongphoei nyu.