Read Phom Naga 2 SHÜPPÜKENGPÜ 18 Bible Online

2 SHÜPPÜKENGPÜ 18 - Phom Naga bible

2 SHÜPPÜKENGPÜ 18

¹Shaang Jehoshaphatü mop hatü dhüm longi dang, hatü büpai yiükhila lemei Ahab mü shentei.

²Bong shohük pheikü büpai Samarialei Ahab thümnüng yiü. Ahabi mi hatü mohoh longi büpa hatü büpa mü yiüpüthü shing jü, hatü büpa kü Ramothgilead hahshah shei nyeanteke.

³Israel am Ahab ongpai Judah ong Jehoshaphat kü, “Ramothgilead hahnüng nüng ngei mü yiükü-üla?” shei phe. Jehoshaphati, “Ngeiyao nüng keiha, hatü ngelei nanglakü nüngei nanglak keipü hih; hamao nüng mü chemi hoknüng yiükahen” shei e.

⁴Shejao Jehoshaphati Israel ongpa kü, “Shongei SHEMBÜPA kü pheyei veishah” shei e.

⁵Hanangkü Ahab ongpai thibüthü jom kho ali chemi thaihütü jomphong kü, “Ngei Ramoth-gilead am khüei hoknüng daihen hi nedaihen?” shei phe. Jomphongi, “Daituh; mehenangkü Kahvangi ongpalei lak kü jom shuohhen khih” shei e.

⁶Shejao Jehoshaphati, “Jeni SHEMBÜPA kü phehen mü hatouei lebü thibü neshiüpü je?” shei e.

⁷Ahabi jangei, “Shao hük, Imlahlei cheha Mikaiah nyüpeih; jeni büpa homeiyao SHEMBÜPA kü phehen aokpeih, shejao ngei büpa kü jiühitnyeih; mehenangkü büpai ngei kü meheyao meipü jung ne-ephünyih” shei e. Nüngi hapakei te-e shei Jehoshaphati e.

⁸Hanangkü Israel ongpai büpalei lakchongbü hük nyükei, “Imlahlei cheha Mikaiah ngei touei nyükei deikei” shei e.

⁹Ong ow owtü Israel ong hatü Judah ongpa Jehoshaphat nyi ong uoshing kü uotü hahten shingei Samaria penyüsha shadenei uotü thibüthü peüi teteivanei jiji touei nyuteke.

¹⁰Shaang Kenaanahlei cheha Zedekiah-i nyiamvaung hük lingtü büpai, “SHEMBÜPAi hapakei enyüke: ‘Nüngi Aram am kemei mangjükem thahshi ha vaungi hokhen’ shei enyüke.

¹¹Aopü thibüthü peüi aihük mü teteivanei Ramoth-gilead hahtuh, hatü aokpü danghen khih; mehenangkü SHEMBÜPAi ongpalei lak kü jom shuohhen” shei e.

¹²Mikaiah kü nyüknüng daipü phongmokbüthüi büpa kü, “Veituh, lebü thibüthü peüi aihük mü ongpa kü aokpü danghen khih shei tetei enyüke. Nüngiyao jomi epükei meishi eyeishuoh” shei e.

¹³Shejao Mikaiah-i, “Vanyangyem SHEMBÜPAlei men kü ngei ngelei Kahvangi mehe enya, ha mon büpa kü ehen” shei e.

¹⁴Mechem büpa ongpa ngoipa, ongpai büpa kü, “Mikaiah, ngei Ramoth-gilead am khüei hoknüng daijü hi nedaijü meihen khih?” shei e. “Daiyei hoktuh hatü aokpü dangte; nüngei lak kü jom shuohhen khih” shei jangei e.

¹⁵Shejao Ahabi büpa kü, “SHEMBÜPAlei men kü lebü nevai, shahhing mon eshih shei meshükpa ngei nüng kü lahhühenang?” shei e.

¹⁶Hahepak kü Mikaiah-i jangei, “Ngei Israel veshanthü mi yombü neshiüpü mithü kei haidaipü eepeih, hatü SHEMBÜPAi, ‘Hathü nanglakü mübü neshiü; jom peü chingmei kü shemei nyemleidai’ shei epeih” shei eteke.

¹⁷Israel ongpai Jehoshaphat kü, “Büpai mechemao ngei kü meipü nevai, ten mon enyeih shei ngei nüng kü ela?” shei e.

¹⁸Mikaiah-i nedoh-i shao e, “Hanangkü SHEMBÜPAlei shah bangtuh: Ngei SHEMBÜPA ong uoshing kü uotü büpalei laknyong lakdah kü vangsho phongshanthü yaongshi eeteke,

¹⁹hatü SHEMBÜPAi, ‘üpai Israel ong Ahabi Ramoth-gilead hahhen shei daiyei büpa halei dihen nangkü yawhhen?’ shei eteke. Hüki lemhük kei hatü hüki lebü kei eteke.”

²⁰Hapheikü laangha hük shesha philei heih-ei SHEMBÜPA touei yaongtü, “Ngei büpa yawhhen hih” shei e. “Mekei mekei etü?” shei SHEMBÜPAi phe.

²¹“Ngei daihen hatü büpalei thibüthülei ju kü shahshem laangha hük leitü teteivanei ehühen” shei e. SHEMBÜPAi, “Büpa yawhhen nüngi aokhen khih. Daituh hatü ha düktuh” shei e.

²²Hanangkü shaang SHEMBÜPAi nüngei thibüthülei ju kü shahshem laangha shihteke. SHEMBÜPAi nüng shingvaishi shanghah temei nyüke.

²³Hahepak kü Kenaanahlei cheha Zedekiah thibüi aongei Mikaiahlei dhe kü aptü, “Nüng kü ehen mü mechem SHEMBÜPAlei laangha ngei leipü melemei daipa?” shei phe.

²⁴Mikaiah-i jangei, “Nüngi dungnuk mongpalei jonüng shüpü nyih eehen hih” shei e.

²⁵Hahepak kü Ahab ongpai büpalei lakchongbü hük kü, “Mikaiah yeptuh, hatü hapa chingnyü kü vanglem lempü Amon hatü ongpalei cheha Joash nyi touei shomtuh,

²⁶hatü ongpai hapakei enyüke shei etuh: Hapa shennyak khoklatei küptuh, hatü ngei mangleikei thahshi yung hatü aan mü lenei meheyao teshuoh” shei e.

²⁷Mikaiah-i, “Nüng hingmei yemmü leiküjema SHEMBÜPAi ngei homei ne-epü vaihen” shei e. Hapheikü büpai shao, “Ngelei shah bangtuh, am nanglakthü peü!” shei e.

²⁸Hanangkü Israel ongpa hatü Judah ongpa Jehoshaphat nyi Ramoth-gileadei aong.

²⁹Ahab ongpai Jehoshaphat kü, “Ngei ow jeitü thepjulei heihhen, shejao nüng payü ong ow owtuh” shei e. Hanangkü Israel ongpai ow jeitü thepjulei heih.

³⁰Aram ongpai büpalei koyei mübüthü kü ongpa mü lenei longpü maanpü üpa mao nehokhen eteke.

³¹Hanangkü mechem jomi Jehoshaphat ongpa eepa, jomi, “Hapayü Israel ong khih” shei deih. Hanangkü jomi büpa jününg leijashingkü Jehoshaphati len, hatü SHEMBÜPAi büpa kü sheüh. Kahvangi hathü büpa toueipü deitük;

³²mehenangkü mechem koyei khari mübüthüi büpayü Israel ong nevaiang shei veiaokpa, jomi büpa kü changpü dohdai.

³³Shejao Aram am veshan hanei-i lahhan kap, hatü ngangahük kü vehok ow baong aa kü lahhan shü. Ongpai koyei khari mübü kü, “Ngei nyokei leituh, hatü thepju leipü leilangtuh; ngei ma yahteke” shei e.

³⁴Helu longi mangshi hok, hatü Israel ongpa koyei khari kü beitü Aram am philei veishi them, hatü vanghe shüpü mü büpa di.