Read Phom Naga 2 SHÜPPÜKENGPÜ 19 Bible Online

2 SHÜPPÜKENGPÜ 19 - Phom Naga bible

2 SHÜPPÜKENGPÜ 19

¹Mechem Judah am Jehoshaphat ongpa Jerusalemei yangei leipa,

²Hananilei cheha Jehu thibü büpa mü heününg peiyei ongpa kü, “Nüngü nemeipü am kü sheühhen hatü SHEMBÜPA kü jiühitpü am kü bamhen je? Ha med kü SHEMBÜPA mongshihpü nüng kü nyüke.

³Shejoongpa nüng kü meipü hük nyupeyü nüngi kahdok kübü Asherah kahvang lajeithü yaktük, hatü nüngei mongdangi Kahvang yempü ha khih” shei e.

⁴Jehoshaphat Jerusalemei nyu, hatü büpa shao Beer-sheba leipü nanglakthü hatü phaüshang kahmük Ephraim thahshi daiyei jomphong SHEMBÜPA, chebü chepalei Kahvang touei mong lepei lei.

⁵Büpai penyü showtükpü Judah chingnyüthü peülei shahphenpüthü jeyei tuh.

⁶Büpai jom kü, “Ammi mehe düknya kenhingei deihtuh; mehenangkü am shennyak shing shahphennyu nevai, shejao mechem ammi shahphenhenshang am mü nyupü SHEMBÜPA shingvaishi phennyüpeih.

⁷Hanangkü SHEMBÜPA kü nyempü am mü nyuhütuh. Kenhingshi shahphentuh; mehenangkü SHEMBÜPA, jenei Kahvang mü shahhing ne-epü, baong hanei noteipü hatü yawhdou neshiüpih” shei e.

⁸Jerusalem leiyao Jehoshaphati Levi am, ngongpathü hatü Israel shemdep kübü shangjingthü SHEMBÜPAlei shahkung nohen hatü dehilao shahphenhen jeyei tuh, hatü jomphong Jerusalemei nyu.

⁹Büpai hathü kü hathü ngeükhüam shuoh: SHEMBÜPA kü nyempü kü ammi shahhing hatü mong kempai chongphotuh.

¹⁰Mechem jempü bühü shennyakthü hapa chingnyüthü kü nyupü am touei iy-aongmashapü nevaijü shahkung mangpü nevaijü vanglem shaipü nangkü shahphenhen peikahenshang, ammi hathü kü SHEMBÜPA khüei mang nethahhen shahvüng shuohtuh; hei nevaijema büpalei mongshih am hatü ammei jeihinaüthü kü peikahen. Ha dükjema, am mang nethahhen.

¹¹SHEMBÜPA nangkü shei ejema Amariah ngongchongü am shak kü veihen; ongpa nangkü shei ejema Ishmaelei cheha Zebadiah, Judah jatei mübüi am shak kü veihen, hatü Levi amü am shak kü lakchongbüthü vaihen. Monglongei düktuh, hatü SHEMBÜPAyü mei dükpüthü mü nyukahen.