Read Phom Naga 2 SHÜPPÜKENGPÜ 20 Bible Online

2 SHÜPPÜKENGPÜ 20 - Phom Naga bible

2 SHÜPPÜKENGPÜ 20

¹Hapheikü Moab hatü Ammon am mü Meun am hanei Jehoshaphat mü hoknüng pei.

²Phongmokbüthü peiyei Jehoshaphat kü, “Nüng khüei hokhen veshan khongnyü longpü hük Dipü Yungching phihükphi Edom lemeipü peikünyüke. Jom Hazazon-Tamar ngoiteke (hapayü En-Gedi)” shei e.

³Jehoshaphati nyemei SHEMBÜPA kü phehen tem hatü Judah kahdok peü kü shüaeiyunglehen baongteke.

⁴Judah ami SHEMBÜPAleipü sheühpü naei thai; Judah kahdok jila peü leipü peiteke.

⁵Hahepak kü Jehoshaphati phopshem chingshe shing japalei thaipü Judah hatü Jerusalem am touei yaongtü,

⁶wongmü phopei e, “Oh SHEMBÜPA, hamei bühipa Kahvang; nüngü vangsho leipü Kahvang nevaipü je? Nüngi jatthü ongching peü shak kü vanglem lemnyüke. Wong hi ngan kemei nüngei lakei nyüke; üpaiyao nüng khüei neyaongaokpih.

⁷Oh hamei Kahvang, nüngi nüngei Israel nanglak toueipü hapa kahdok kü nyupü am nechangtükangpü je, hatü nüngei küphü Abrahamei hühihathü kü den shing neshuohangpü je?

⁸Jom halei nyu, hatü halei nüngei men kü phopshem hük vetü,

⁹‘Ham kü shanghah, vehok, shahphenpü, nevaijü chamhilem hatü münghishaü peijema, hami hapa shem touei yaongtü ham shanghahpai lenjema, nüngi ha danei ham yangphahen; mehenangkü hapa shemei nüng kü khümnyüpeih’ shei epeih.

¹⁰Israel am Ijip kahdok leipü vamei daishingkü nüngi Israel am kü tehah shei khüamei tuhpü nangkü jom khüei lüdaitü hathü nejütüki tuhphongpeih; Ammon, Moab hatü Edom ami ham hahtükhen peiteke.

¹¹Ha kü shemei nüngi ham kü mükjüp shuohpü kahdok leipü ham changtükhen peiyei nyüke.

¹²Oh hamei Kahvang, nüngi jom kü shah nephenhen je? Ham hahnüng peipü veshanthü mü baong hokhen wong neshiü. Mehe dükhen hami nenyingang, shejao hamei mük nüng kü veinyüpeih.”

¹³Judah am nyüha, baha, hashih naüha peü SHEMBÜPA touei yaongteke.

¹⁴Hahepak kü thaipü khong jiamei Levi am Asaphei hühiha, Mattaniahlei cheha, Jeiel, Jeielei cheha Benaiah, Benaiahlei cheha Zekhariah, Zekhariahlei cheha Jahaziel kü Kahvang laangha pei.

¹⁵Jahazieli e, “Bangtuh, Jehoshaphat ongpa, hatü Judah hatü Jerusalemei nyupüthü! SHEMBÜPAi am kü hapakei enyüke: ‘Hapa veshan khongnyü eeyei am tenyem nevaijü mongtemaan. Mehenangkü vehokü ammei nevai, hapayü Kahvangei.

¹⁶Ngenyih jom khüei hoknüng yiütuh; jomao Ziz lembaong thahshi aongkahen, hatü ammi jom kahji dohpü Jeruel jahpan mangngoi shekü pongteihen.

¹⁷Ammi hapa vehok hokhen nevai. Ami show lingtuh, hatü SHEMBÜPAi am kü aokpü shuohpü kü yaongshi veituh, Oh Judah hatü Jerusalem. Am tenyem nevaijü mongtemaan. Ngenyih am thepjulei heihtuh, hatü SHEMBÜPA am mü nyukahen.’ ”

¹⁸Hahepak kü Jehoshaphati kahdokei dhe aümei sha, hatü Judah hatü Jerusalem am peü aümei shaei SHEMBÜPA kü khüm.

¹⁹Levi am Kohath hatü Korah nanglakthüi yaongtü ngeüwong anei SHEMBÜPA, Israel Kahvang kü menvih shuoh.

²⁰Jom dhom mü lomi paoei Tekoa jahpan lemei heih. Jom layaong shingkü Jehoshaphati yaongtü e, “Judah hatü Jerusalem nanglakthü, ngei epü banghümao! SHEMBÜPA, ammei Kahvang kü hinglemtuh, shejüang wong kohshi yaongaokhen; büpalei thibüthüi epü kü hinglemtuh, shejüang am aokpü danghen.”

²¹Nanglakthü mü shahnying eteiyei temphei kü büpai veshanthü shekü SHEMBÜPA kü menvih shuoh-ei büpa daülangshemshepü nethe meipü jung kesho lokhen shennyak hanei jeyei hapakei eteke: “SHEMBÜPA kü menvih shuohtuh, mehenangkü büpa bampü nedohneteni nyüpeih.”

²²Jom menvih shuoh-ei kesho lokei chongpang shingkü SHEMBÜPAi Ammon, Moab hatü Edom am khüei hok, hatü Judah hahhen peipüthü kü vehok neütük.

²³Ammon am hatü Moab am nyi sheptü Edom am khüei hok hatü jom jütükkem. Edom am jükem pheikü shao jiji hüki hük mü mangshi hokteke.

²⁴Mechem Judah am jahpan peü kü chipü shangdü leipü veshanthü kü veipa, hükao ne-ao-i kahdokei mahng yaüshi eeteke.

²⁵Mechem Jehoshaphat hatü veshanthüi douhinang yahhen heihpa, jomi yemhimak, douhinang, ashakviha, hatü douvang douthü longi jomi neko-aoki yah. Longi nyupü nangkü jomi nyih jem thahshi douhinang thaihah-ei nyu.

²⁶Nyih alipabü kü jomi Berakah Kahjilei thaitü jomi SHEMBÜPA kü menvih shuoh. Hanangkü hapa shingkü shaang thahshi Berakah Kahji shei nyüknyeih.

²⁷Hapheikü Jehoshaphati mütü Judah hatü Jerusalem nanglakthü peü mongongshi Jerusalemei lei; mehenangkü SHEMBÜPAi vepathü shak kü mongonghen jom kü shuohteke.

²⁸Jomi Jerusalem ngoiyei phopshemei harp, liping hatü amit vüngei nyu.

²⁹SHEMBÜPAi Israel amei vepathü khüei hokpü danei kahdoknyü ongchingthü peü kü Kahvang kü nyempü pei,

³⁰hatü Jehoshaphatei ongching chingmeivangmei kü nyu; mehenangkü Kahvangi büpa kü lem peü philei nyiumei shuohteke.

³¹Hanangkü Jehoshaphati Judah kü vanglem lem. Mechem büpa Judah kü ong vaipa, büpa nyübüh bong hapüanpünga nyu, hatü büpai Jerusalemei bong hapünga thahshi ong vai. Chenyü-ü Shilhilei yiükha Azubah nyu.

³²Büpai chepa Asa kei kam, hatü hathü kübü lemnyong kü nedai; SHEMBÜPA touei mehe jiü, büpai ha dükteke.

³³Shejoong, vaümchongthü nemangtük; hatü nanglakthüi chebü chepalei Kahvang kü jomei mong lanei neshuoh.

³⁴Shaang Jehoshaphati dükpü lebü douthü chongpangpü kübü dohpü thahshi Israel ongthülei Büshah Laitap kü phaihan hük Hananilei cheha Jehulei Laitap kü nyangei nyüpeih.

³⁵Shomshi, Judah ongpa Jehoshaphati mang dou longi dükpü Israel ong Ahaziah mü mongjem pong.

³⁶Büpai büpa mü shepteitü Tarshishlei heihteihen Jahas ling; jijinyi-i hapayü Ezion-Geberlei ling.

³⁷Hapheikü Mareshah am Dodavahulei cheha Eliezer-i teteivanei Jehoshaphat kü, “Nüngi mang dou longi dükpü Ahaziah mü mongjem pongpü nangkü SHEMBÜPAi nüngi lingpü dou mangtükhen” shei e. Hingmei hapa jahas yungching yinglükleisho-i mangtüktü chemao Tarshishlei nedeishihaok.