Read Phom Naga 2 SHÜPPÜKENGPÜ 21 Bible Online

2 SHÜPPÜKENGPÜ 21 - Phom Naga bible

2 SHÜPPÜKENGPÜ 21

¹Jehoshaphat di hatü David chingnyülei chebü chepa mü mahng vü, hatü cheha Jehorami büpa kü jeiyei ong vaiteke.

²Jehoshaphat ongpalei cheha Jehoramei jeihinaüthü jom vok nyu: Azariah, Jehiel, Zekhariah Azariahu, Mikhael hatü Shephatiah.

³Chepai jomphong kü thintho, hon, ngin, hatü lebü douvang mophimo longi shuoh, hatü jom peü penyü showtükpü Judah chingnyü ieyei kü shembü shaei tuh. Shejao Jehoram kü büpa jeiyei ong vaihen shuoh; mehenangkü büpayü hashongpa nyuteke.

⁴Mechem Jehoram chepalei ong uoshing kü uotü wong koh-ei leipa, büpai chejei chenaüpeüthü peü hatü Israel kü lakchongbüthü hanei jütük.

⁵Jehoram ong vaipü hepak kü büpalei nyübüh vangbong hapüanpünyi nyu, hatü büpa Jerusalemei bong shet thahshi vanglem lem.

⁶Büpai Israel ongthülei lem kü kam hatü Ahab am shemi dükpükei dük; mehenangkü büpai Ahabei yiükha mü shem yemteke.

⁷Shejoongpa SHEMBÜPAi David mü vangpüshuwpü lingpü nangkü SHEMBÜPAi David am shem nemahtükhü; mehenangkü büpai Davidei hühihathüi düngei vanglem lemhen shei vangeishuwpü lingteke.

⁸Jehoram ong vaipü hepak kü Edom ami Judah khüei yaongei bümei hean dang.

⁹Hanangkü Jehoram hatü büpalei lakchongbüthü Edom hahhen koyei khari kü heih. Edom ami büpa hatü koyei khari mübüthü kü shonlang, shejao jomphongi nyak kü laongei lüdaikem.

¹⁰Hapa nyih kübü Edom ami Judah khüei yaongpeih. Hahepak kü-üng Libnah amao khüei yaong; mehenangkü Jehorami chebü chepalei SHEMBÜPA Kahvang yakphong.

¹¹Büpai Judah shangtaothülei vaümchongthü lingtü Jerusalem nanglakthü ha kü khümhü, hatü Judah shennyakthü lemnyongei mülang.

¹²Jehorami Elijah thibü leipü lai hük hapakei nyangtü dang: “SHEMBÜPA, ambü Davidei Kahvangi hapakei enyüke: ‘Nüngi ampa Jehoshaphat nevaijü Judah ongpa Asa nyilei lem kü nekam,

¹³shejao nüngi Israel ongthülei lem kü kamei nüngi Judah hatü Jerusalem nanglakthü mang thahhüei Ahab am shemi dükpükei dükteke. Nüng mao meipü anjei anaüpeü nüngi jütükteke.

¹⁴Hanangkü shaang SHEMBÜPAi nüngei nanglak, hapeüthü, nyühathü hatü nüngei dou lemphü kü büpai lak hinghen.

¹⁵Nüngao hepak luangi leihilang kü dinten vamei tünghen, hatü hapa din nyihjeih nemeipüba leiyei leihilang kemei laohen.’ ”

¹⁶SHEMBÜPAi Jehoram khüei Philistia hatü Ethiopia yopailei nyupü Arab am mongshih vamhü.

¹⁷Jomi Judah hah, hatü ongshemei nyushuohpü dou peü mü nyüha hapeüthü peü yah-ei lüdai. Shombüpa Ahaziah mü lenei hapeüthü hükao netuh-i yah-ei lüdai.

¹⁸Hathü peü vampheikü SHEMBÜPAi Jehoram kü leihilang kü nemeibenüng din vamhü.

¹⁹Hapakei nyuei vangbong nyipabü dohpü lemei din homei büpalei leihilang peü laoei vam, hatü büpa longi ponghah-ei di. Nanglakthüi chebü chepa kü dükpükei büpa kü dhüm huei aw jakei mahng nethep.

²⁰Jehoram ong vaishingkü nyübüh bong hapüanpünyi nyu, hatü büpai Jerusalemei bong shet vanglem lem. Büpa didaipü kü üpaiyao mongkü tüngei nedeih; büpa David chingnyülei mahng vü, shejao ongpathülei mahngchongei büpalei mahng nevü.