Read Phom Naga 2 SHÜPPÜKENGPÜ 22 Bible Online

2 SHÜPPÜKENGPÜ 22 - Phom Naga bible

2 SHÜPPÜKENGPÜ 22

¹Arab am mü peipü vepathüi baümtapei shüei Jehoramei hapeü behethü peü jütükpü nangkü Jerusalem nanglakthüi Jehoramei ha shombü Ahaziah büpa jeiyei ong vaihü. Hanangkü Judah ongpa Jehoramei cheha Ahaziah-i ong vaihen chongpang.

²Ahaziah ong vaishingkü nyübüh bong pinyipünyi nyu, hatü büpai Jerusalemei bong hük mon ong vai. Chenyü-ü Omrilei chehü Athaliah nyu.

³Büpaiyao Ahab am shemei lemthü kü kam; mehenangkü chenyüi mang dükhen lem huteke.

⁴Ahab am shemi dükpükei büpai SHEMBÜPA touei mehe mang, ha dük; mehenangkü büpa lomohhen mü chepa didaipheikü jomphongü büpalei shahnying venbüthü leiteke.

⁵Ramoth-gileadei Aram am Hazael ongpa khüei Israel am Ahab ongpalei cheha Joram mü sheüh-ei hoknüng daishingkü jomi eshuohpü shah büpai yah, hatü Joram ma yah.

⁶Hanangkü Ramathlei Aram am Hazael ongpa mü hokshingkü ma yahpü meihühen nangkü Jezreelei leiyei nyu. Hahepak kü Jehoramei cheha Judah ongpa Ahaziah-i ma yah-ei nyupü Ahabei cheha Joram mü pongteinüng Jezreelei yiü.

⁷Joram thümnüng Ahaziah yiüpü homei büpa dohpütenpü ngoihen Kahvangi temtükpü nyu. Mechem büpa yiüei ngoipa, büpai Joram mü chemi Nimshilei cheha Jehu, üpa Kahvangi Ahab am shem jütükhen jepa, büpa mü pongteinüng dai.

⁸Jehu-i Ahab am shem shahphenei nyushingkü, büpai Judah am lakchongbüthü mü Ahaziahlei jeihinaüthülei hapeüthü Ahaziah mü chemi yiüpüthü heüei büpai jom peü jütük.

⁹Büpai Ahaziah yemei deishih-ei büpa Samarialei joshi dang. Jomi büpa Jehu touei müei lei hatü jütük. Jomi büpalei mahng chebü Jehoshaphat kü dhüm huei, “Büpayü mongdang kempai SHEMBÜPA yempü Jehoshaphatei chehü khih” shei etü vüteke, hatü hapa ongching kü vanglem lemaokhen mü Ahaziahlei shem am üpayao nenyu.

¹⁰Mechem Ahaziahlei chenyü Athaliah-i cheha jütükteke shei danpa, pinnyüi Judah kübü ongsha ongshem peü jütükhen layaong.

¹¹Shejao Jehoram ongpalei yiükha Jehoshebeah-i Ahaziahlei cheha Joash ongha ongnaü khong kübü jütükhen nyupü müei daiyei büpa mü shao büpa kü junghen nyüha hük shei dung hükei jophong. Mehenangkü Jehoshebeahyü Jehoram ongpalei yiükha, Jehoiada ngongpalei shembünyü nyuteke, hatü Ahaziahlei chenaü nyuteke; pinnyüi hapa naü jotükpü nangkü Athaliah-i büpa nejüaok.

¹²Athaliah-i vanglem lempü hepak kü büpayü phopshemei bong vok thahshi jom mü joshi angteke.