Read Phom Naga 2 SHÜPPÜKENGPÜ 23 Bible Online

2 SHÜPPÜKENGPÜ 23 - Phom Naga bible

2 SHÜPPÜKENGPÜ 23

¹Bong nyetpabü kü Jehoiada ngongpai monglongei deihtü kho shak kü müpü veshan lakchongbüthü jom nga mü vangpüshuwpü ling: Hathüyü Jerohamei cheha Azariah, Jehohananei cheha Ishmael, Obedei cheha Azariah, Adaiahlei cheha Maaseiah, hatü Zikhrilei cheha Elishaphat nyuteke.

²Jomphongi Judah peü homei shinei dai hatü Judah jilathü leipü Levi am peü, hatü Israel shemdep kü shangjingthü thaihü hatü jom Jerusalemei pei.

³Hapheikü thaipü khong peü phopshemei ongpa mü vangpüshuwpü ling. Jehoiada-i hathü kü, “Hatoumü ongpalei ha hük nyüke! SHEMBÜPAi Davidei hühihathü nangkü lahpükei büpai vanglem nyemlemkei.

⁴Ammi ha düktuh: amphong ngongpa hatü Levi am shing jem kü shing hük Sabbath nyih dousho kü peipüthüi shaden yomtuh,

⁵shing jem kü shing hük ongshem yomtuh, hatü shing jem kü shing hük Chongnyiam Shaden yomtuh, hatü nanglakthü peü phopshem chingshelei nyuhen.

⁶Chongphopü ngongpathü hatü Levi am mü lenei üpayao phopshem mongei teshüshih; jom shühen aok mehenangkü jomphongü daütükpüthü nyüke, shejao lebü nanglak peü SHEMBÜPAi epü banghen.

⁷Levi ami lahhilaong notü ongpa kü shinei yaonghen, hatü üam mongei shükahen jühen. Ongpa daipü leipü peü lemei büpa mü nyutuh” shei e.

⁸Levi hatü Judah am peüi Jehoiada ngongpai epükei dük; peüi laophülei shennyak Sabbath nyih dousho benpü hatü nebenpüthü peü neyantüki tuh.

⁹Jehoiada ngongpai phopshemei nyupü David ongpalei phung hatü inyüshung longpü maanpü veshan mübüthü kü shuoh,

¹⁰hatü büpai nanglakthü peü ongpa yomei lahhilaong notü phopshem apsha pehe hatü moidü hatü phopshem shinei tuh.

¹¹Hapheikü büpai ongpalei cheha müei deiyei ong athen thenhü, hatü büpa kü vangpüshuwpü shuoh; jomi büpayü ongpa shei len hatü Jehoiada hatü chehathüi büpa thiteiphuei yah, hatü, “Ongpa yangnyu shoshoshi nyutuh!” shei len.

¹²Mechem Athaliah-i nanglakthü mokteipü hatü menvih shuohpü ngeü danpa, pinnyü nanglakthü touei phopshemei heih;

¹³hatü mechem pinnyü veishuohpa, shaden shemnyü touei ongpa yaongtü veshan mübüthü hatü amit vüngpüthü ongpa touei yaongtü nanglak peü mongongpai amit vüngei kesho lokpü ee. Athaliah-i pinnyülei ashak shaaktü, “Ngei luhahteke! Ngei yutükteke!” shei len.

¹⁴Hahepak kü Jehoiada ngongpai veshan mübüthü kü, “Pinnyü veshanthü yaongpü aa kü müei ngaituh; üpai pinnyü yanghen khehenshang jütuh” shei e. Mehenangkü ngongpai jomphong kü, “Pinnyü Phopshem mongei tejü” shei eteke.

¹⁵Hanangkü jomphongi pinnyü yepei ongshem leipü Koyei Shadenei müei deiyei halei jütük.

¹⁶Hapheikü Jehoiada-i büpa, nanglak hatü ongpa jom peü SHEMBÜPAlei nanglak vaihen shei vangpüshuwpü ling.

¹⁷Nanglak peü Baal kahvang phopshemei heih-ei ha bentük. Jomi moidü hatü lajeithü kemei mangtüktü Baal kahvangei ngongpa Mattan moidü touei jü.

¹⁸SHEMBÜPAlei shem kü veihen, jakpü moila Mosa Shahkung kü nyangei nyupükei shuohhen, Davidi epükei mongongpai menvih kesho lokhen hanpükei Jehoiada ngongpai Levi am ngongpathü kü phopshem kü veihen hanteke.

¹⁹Nedaüpüthü üpayao phopshemei neshühen shingvaishi SHEMBÜPAlei shem shaden yombüthü yomei tuh,

²⁰hatü büpai veshan mübüthü, hamhiman, nanglak shak kübü governorthü hatü kahmük kü nyupü nanglak peü thaihütü phopshem leipü dokpa shaden homei ongshemei müei lei. Jomi ong uoshing kü ongpa uohü.

²¹Hanangkü kahmük kübü nanglak peü mongong, hatü Athaliah jütük pheikü chingnyüyü chingmeivangmei kü nyu.