Read Phom Naga 2 SHÜPPÜKENGPÜ 24 Bible Online

2 SHÜPPÜKENGPÜ 24 - Phom Naga bible

2 SHÜPPÜKENGPÜ 24

¹Joash ong vaipü hepak kü büpa nyübüh vangbong nyet nyu, hatü büpai Jerusalemei bong pinyi thahshi vanglem lem; chenyü-ü Beer-sheba am Zibiah nyu.

²Jehoiada ngongpalei nyihthü kü Joash-i SHEMBÜPA touei mehe jiü, ha dük.

³Jehoiada-i nyüha nyi yah, hatü hapeüthü longi büh.

⁴Ong vaipü kanja pheikü büpai phopshem linghen khih shei deih-ei dang.

⁵Büpai ngongpa hatü Levi am nyükei thaitü büpai jomphong kü, “Judah chingnyüthülei daituh, hatü Israel am peü kü bong ieyei phopshem linghen lop thaituh; ha lop lomi thaituh” shei e. Shejao Levi ami lomi lop nethai.

⁶Hanangkü ongpai Jehoiada, jomei mübü kü nyüktü, “Mosai ashakshem shingvaishi Israel am kü thaipü lat Levi ami thaiyei leikahen mehekei nüngi ne-eshuohnya?” shei e.

⁷Hapa nemeipü nyüha Athaliahlei hapeüthüi phopshem lowei shüei haleipü daülangpü douthü kemei Baal kahvang kü khümhen noteitükteke.

⁸Ongpai Levi am kü pela hük lingtü phopshem shaden chingshe philei haühen e.

⁹Hapheikü Judah hatü Jerusalem am kü jahpanei nyushi Kahvang chongphopü Mosai SHEMBÜPA kü Israel ami lat shuohhen yüpü ha shuohtuh shei shah yanteke.

¹⁰Nanglak hatü mübüthü peüi hayü meiangke shei deih, hatü jomi lat shuoh-ei hapa pela mahü.

¹¹Mechem Levi ami ongpalei lakchongbüthü touei hapa pela koei deihen, hatü jomi lop longi maei eehenshang, ongpalei laknyangbü hatü ngongchongei lakchongbü nyi-i hapa lop aokei yahtü hapa pela shao hapa shingei leiyei tuhhamteke. Hanangkü nyihjeih hapakei dük, hatü lop longi thai.

¹²Ongpa hatü Jehoiada nyi-i hapa phopshem linghen dou kü khei vaipü nyi kü ha lop shuoh, hatü jomi yaong dhüngpüthü, mistrithü, nyiam hatü melangnyiam dou dükpüthü leiyei phopshem lingei leiteke.

¹³Hanangkü üami dou dükhen yah, jomi kheyei dou dük, hatü jomi hapa phopshem meishi lingei wong kohhü.

¹⁴Mechem jomi dou tempa, jomi aopü lop kemei ongpa hatü Jehoiada nyi touei yah-ei lei, hatü hapa lopi phopshemei noteihen dükhi-üm, jakpü moila shung, nükshung hatü lebü douthü hon hi ngin yah-ei ling. Jehoiada yemmü nyupü thahshi nedoh-i phopshemei jakpü moila shuohteke.

¹⁵Shaang Jehoiada longi viüei büpa nyübüh bong kho hük mü hapüan kü di,

¹⁶hatü büpayü David chingnyülei ongpathü mü mahng vü; mehenangkü büpai Israel, hatü Kahvang hatü jom shem shing doumei dük.

¹⁷Shaang Jehoiada didaipheikü Judah am lakchongbü peiyei ongpa kü yawh-ei e, hatü ongpai ha bangteke.

¹⁸Jomi SHEMBÜPA, chebü chepalei Kahvangei phopshemei khümpü dohdai, hatü Asherah nyüha kahvang hatü lajeithü kü khüm. Jomi mang thahpü nangkü Judah hatü Jerusalem kü SHEMBÜPAlei mongshih peiteke.

¹⁹Shejao jom mong lepei leihen shingvaishi SHEMBÜPAi thibüthü shom, shejao jomi hathü kü nebang.

²⁰Hahepak kü Kahvang laanghai ngongpa Jehoiadalei cheha Zekhariah yep. Büpai nanglakthüi eehen mü shaoshi aongei yaongtü jomphong kü, “SHEMBÜPAi hapakei enyüke: ‘Am moihiman nedanghen mü mehekei SHEMBÜPAlei shahkungthü kü pungnya? Ammi SHEMBÜPA yakphongpü nangkü büpaiyao am yaktükteke’ ” shei e.

²¹Shejao jomi büpa khüei yaong, hatü ongpalei ngeükhüam homei jomi büpa yaongi shükei phopshem chingshelei jütük.

²²Joash ongpai Zekhariahlei chepa Jehoiada-i büpa kü phahji hupü betüktü büpai cheha jütük. Büpa mong mangshemdai-i, “SHEMBÜPAi ha eetü bhüh nyemyem” shei nyüktü e.

²³Bong dohpü lemei Aram am veshanthü Joash khüei hokhen aong. Jomi Judah hatü Jerusalemei peiyei nanglak mübüthü peü jütük, hatü jomi mophimo longi yah-ei Damaska ongpa touei shomtük.

²⁴Aram ami veshan maani mon peijao, SHEMBÜPAi veshan khong longpü jomei lak kü shuoh; mehenangkü jomi SHEMBÜPA, jomei bühipa Kahvang yakphong. Hapakei jomi Joash kao shahphen.

²⁵Mechem büpa ma longi yah-ei tuhphongtü vepathü leidaipa, Jehoiadalei cheha jütükpü nangkü büpalei chongphobüthüi büpa khüei yaong, hatü lünglei nyushi jomi büpa jütük. Hanangkü büpa di, hatü jomi büpa David chingnyülei vüphong shejao ongthülei mahngchongei büpa nevü.

²⁶Büpa khüei yaongpüthüyü Ammon am Shimeathlei cheha Zabad, hatü Moab am Shimrithlei cheha Jehozabad nyuteke.

²⁷Chehathülei nang hatü büpa khüei epü shahthü, hatü büpai phopshem lingei leipü jung peü ongpathülei Laitap kü nihpükhopü lailei nyangei nyüpeih. Cheha Amaziah-i büpa jeiyei ong vaiteke.