Read Phom Naga 2 SHÜPPÜKENGPÜ 25 Bible Online

2 SHÜPPÜKENGPÜ 25 - Phom Naga bible

2 SHÜPPÜKENGPÜ 25

¹Amaziah ong vaiyei pangshingkü büpa nyübüh bong hapünga nyu, hatü büpai Jerusalemei bong hapüshü vanglem lem. Chenyü-ü Jerusalem am meni Jehoaddan nyu.

²Büpai SHEMBÜPA touei mehe jiü, ha dük, shejao hingshangpü mongdangi nevai.

³Büpalei ongching wong koh-ei leihinüng büpai chepa ongpa jütükpü nangkü büpalei chongphobüthü jütük.

⁴Shejao SHEMBÜPAi Mosa shahkung kü, “Hapeüthülei mang nangkü nyühipathü nejühen, nevaijü nyühipalei mang nangkü hapeüthü nejühen, shejao peüi laophü laophülei mang nangkü dihen” shei nyangei nyupükei büpai jomei hapeüthü nejütük.

⁵Amaziah-i Judah nanglakthü chemi nyükei thaihütü Judah hatü Benjamin am haja shak kü, hatü kho shak kü mübüthü shemdep aimü hengteke. Hapheikü büpai bong kukha hatü ha dok kübü nyükei thaihü, hatü veshan dousho kü shüaokhen, lahhilaong no-aokhen shennyak jom 3, 00, 000 thahshi nyuteke.

⁶Büpai shao ngin dok 3, 400 shuohtü veshan 1, 00, 000 yah-ei lei.

⁷Shejao büpa touei thibü hük peiyei, “Oh ongpa, nüngi Israel leipü müei leipü veshanthü nüng mü vehokei tedei; mehenangkü SHEMBÜPAyü Israel am mü Ephraim nanglak üpa mao büpa nenyu.

⁸Nüng daiyei monglongei vehok hoklangmao Kahvangi nüngei vepa touei nüng mahhühen; mehenangkü aokpü danghen nedanghenü Kahvangei lakei nyüpeih” shei e.

⁹Amaziah-i thibüpa kü, “Shejema ngei ngin hajükjük jom kü shuohtükpeyü mekei ehen?” shei phe. Hapa thibüpai jangei, “Kahvangi ha mao nyeishi yahpha-aokhen hih” shei e.

¹⁰Hanangkü Amaziah-i Ephraim leipü deipü veshanthü dohtüktü shem yemei leitük. Shejao jomi Judah am kü longi mongshih, hatü mongshihdaitü shemei leidai.

¹¹Amaziah-i monglongei deih, hatü büpalei veshanthü Hüm Kahjilei müei dai; halei büpai Edom am haja an jü.

¹²Judah ami shao shennyak haja an yemmü yepei yaongvakei anei jom peü khih mü nihshi shükei shanshih.

¹³Hahepak kü Amaziah-i vehok kü hean neyahhen shei shomtükpü veshanthüi Samaria kübü Beth Horon thahshi Judah chingthü hahteke. Jomi shennyak haja jem jütü haleipü mophimo longi shetei leidai.

¹⁴Amaziah-i Edom am jütü leishingkü büpai Edom amei kahvangthü koei lei. Büpai hathü yah-ei büpalei kahvang vaihütü ha kü khümei jakpü moila shuoh.

¹⁵SHEMBÜPAi Amaziah kü mongshih, hatü büpai büpa touei thibü hük shomei, “Nüngei lak kübü laophülei nanglak dangkao neyangaokhen kahvangthü kü mehekei nüngi khümnya?” shei e.

¹⁶Mechem büpai ha eyei nyupa, ongpai büpa kü, “Hami nüngü ongpa kü shahnying venhen jepü je? Shah te-e; hei nevaijema jühen” shei e. Hanangkü thibüpai shah epü doh shejao eteke, “Mehenangkü nüngi ha dükpü nangkü Kahvangi nüng jütükhen temei nyüke shei ngei nyingnyüke, hatü nüngi ngei epü kü nebang.”

¹⁷Judah ongpa Amaziah-i büpalei lakchongbüthü mü chudeih hanteitü büpai Israel am Jehulei cheha Jehoahaz, Jehoahazlei cheha Joash ongpa kü, “Dhe dhe gongei hokshah, aongkei” shei e.

¹⁸Shejao Israel ongpa Joash-i Amaziah kü shahnyok hapakei shuoh: “Chem Lebanon leipü hühthang hüki Lebanon leipü cedar pü hük kü, ‘Nüngei yiükha ngelei hapeü shing doi yahshih’ shei e. Hahepak kü Lebanon leipü phaüyem hük peiyei hapa hühthang la-i shouptük.

¹⁹Nüngi Edom am kü neüpeih shei eshi shaang nüng changmeinyüke. Shemei nyudaituh! Mehekei nüng hatü nüng mü Judah amao dohen shanghah yemhahnya?” shei e.

²⁰Shejao Amaziah-i ha nebang; mehenangkü büpai Edom amei kahvang lajei kü khümpü nangkü Kahvangi jom Joashlei lak kü shuohtükhen mongpü nyuteke.

²¹Hanangkü Israel ongpa Joash-i Judah am Amaziah ongpa mü Judah kahdok Beth-Shemeshlei hokteke.

²²Israel ami Judah am neü, hatü Judah am nyaiyei shemei lei.

²³Israel ongpa Joash-i Beth-Shemeshlei Ahaziahlei cheha Joash, Joashlei cheha Amaziah Israel ongpai yep. Hapheikü Joash-i büpa Jerusalemei lei, hatü Ephraim Peshaden kübü Shouk Peshaden thahshi Jerusalem bham meter 200 hükshing bentük.

²⁴Büpai Obed-Edomi jungei veipü phopshem leipü hon hi ngin hatü douhinang kemei, ongshem leipü mophimothü mü shennyak longi yepei Samarialei leidai.

²⁵Jehoahazlei cheha Israel ongpa Joash didaiphei kao Joashlei cheha Judah ongpa Amaziah vangbong anpünga thahshi nyu.

²⁶Amaziah-i vanglem lempü hepak kü büpai dükpü lebü douthü peü Judah hatü Israel ongthülei Büshah Laitap kü nyangei nyüpeih.

²⁷Amaziah-i SHEMBÜPA toueipü yandaipü hepak mebü jomi Jerusalemei büpa khüei yaong hatü büpa Lakhishlei laongei lüdaijao jomi büpa phei changei Lakhishlei daiyei büpa halei jütükpeih.

²⁸Büpalei mahng koyei kü haüei leiyei chebü chepa am mü David Chingnyülei vüpeih.