Read Phom Naga 2 SHÜPPÜKENGPÜ 26 Bible Online

2 SHÜPPÜKENGPÜ 26 - Phom Naga bible

2 SHÜPPÜKENGPÜ 26

¹Hahepak kü Judah nanglakthüi Uzziah, nyübüh vangbong anpüvok nyushi chepa Amaziah kü jeiyei ong vaihüteke.

²Büpai Amaziah didaiphei kü Elath hah, hatü lingei leitü Judah phangkü tuh.

³Uzziah ong vaipü hepak kü büpa nyübüh bong anpüvok nyu, hatü Jerusalemei bong pinyipüanpünyi thahshi ong vai. Chenyü-ü Jerusalem am meni, Jekoliah nyu.

⁴Büpaiyao chepa Amaziah-i kei mehe SHEMBÜPA touei jiü, ha dük.

⁵Zekhariahlei nyih kü Kahvang kü nyemhen nyuhpü nangkü büpai Kahvang yem. Büpai SHEMBÜPA yempü thahshi Kahvangi büpa kü moihiman.

⁶Büpai Philistia am khüei hok hatü Gath, Jabneh hatü Ashdod bhamthü mangtük. Büpai Ashdod yopai leipü hatü Philistia kahdok kü shingmü shingmü jilathü ling.

⁷hatü Philistia am, Gur-Baalei nyupü Arab am, hatü Meun am mü hokshing kü Kahvangi büpa kü sheüh.

⁸Ammon ami Uzziah kü bom ühteke, hatü büpalei men Ijip thahshi dai; mehenangkü büpa longi wong koh-ei lei.

⁹Uzziah-i Jerusalemei Shouk Shaden hatü Kahji Peshaden, hatü bham baongteipü shingei shangdüthü ling hatü hathü kü pe showteke.

¹⁰Büpai jahpanei shangdü longi ling, hatü yungkukthü longi kuk; mehenangkü kahshangla hatü kahjilei yemhimak longi haümshi nyu, hatü büpai shangchingthü hatü kahjilei kahling am hatü nyalingngupai kah lingpüthü longi tuh; mehenangkü büpai kah linghen kü longi kenteke.

¹¹Uzziah-i veshan longi hokhen temtüktü tuh. Hathü shüpeikengei ongpalei lakchongbü khong kübü Hananiah phangkü laknyangbü Jeiel hatü Maaseiah nyi tuhteke.

¹²Veshanthü shak kü shemdep peü kübü mübüthüyü peüshep jom 2, 600 nyu.

¹³Jom phangkü meishi nyuh-ei temtükpü veshanthü 3, 07, 500 thahshi ongpa kü sheüh-ei vepathü khüei hokhen temei nyu.

¹⁴Uzziah-i hathü kü inyüshung, phung, nyiam athen, vehok bhagthuh, pülah hatü lahhan changshi shuoh.

¹⁵Jerusalemei büpai shangdü hatü shuokhivaung peülei lahhan, hatü yaong kaphen shingvaishi lahhinpü shennyakthüi lingpü hadir tuhteke. Büpalei men bahiyang peü lemei dai; mehenangkü büpa wong koh-ei manglei thahshi Kahvangi longi sheühteke.

¹⁶Shejao Uzziah wong koh-ei leipheikü büpa changmeipai büpa doteke. Büpai SHEMBÜPA, büpalei Kahvang kü hingnelem, hatü ayingshü jakpü shingei ayingshü jakhen phopshemei nyu.

¹⁷Ngongpa Azariah mü wongkoh monglongpü ngongpathü jom büali thahshi büpa phei müei shü.

¹⁸Jomphongi büpa mü shah dakteiyei e, “Uzziah, nüngi SHEMBÜPA kü ayingshü jakpeyü jiüpü nevaipih. Hapayü ngongpathü, Aaronei hühihathüi ha dükhen nangkü jepüthülei dou hih. Hapa Daülangpü Shing leipü vamdaituh; mehenangkü nüng pungteke, hatü SHEMBÜPA Kahvangi ha nangkü shei nüngi moihiman hatü vangdhüm nedangpih.”

¹⁹Hahepak kü Uzziah mongshih; mehenangkü büpai ayingshü jakhen noshi nyu. Büpai phopshem mongei ayingshü moidü touei yaongtü ngongpathü kü loh-ei nyushi büpalei shangba kü ngomdin vam.

²⁰Mechem ngongchong Azariah hatü ngongpathüi büpa kü veishuohpa, jomphongi büpalei shangba kü ngom bah-ei ee, hanangkü jomphongi shülangi phopshem leipü ngaitük; büpa nyingi lomi vamdaihen yaong; mehenangkü SHEMBÜPAi büpa kü shanghah shuohteke.

²¹Uzziah ongpa dipü nyih thahshi hapa ngomdin nemei-i nyu. Nedaüpü nangkü büpa phopshemei nepeiaok; büpa lebü shemei khaatei meheyao dou nedüki nyu; cheha Jothami kahmük kü vanglem lempü dou dükei nyu.

²²Amozlei cheha Isaiah thibüi Uzziah ongpai dükpü douthü chongpangpü kübü dohpü thahshi nyangei nyüke.

²³Uzziah di, hatü ongthülei mahngchongei büpa vü, shejao büpa ngompü nangkü ongei mahngsha kü nevü. Büpa kü jeiyei cheha Jotham ong vaiteke.