Read Phom Naga 2 SHÜPPÜKENGPÜ 28 Bible Online

2 SHÜPPÜKENGPÜ 28 - Phom Naga bible

2 SHÜPPÜKENGPÜ 28

¹Ahaz ong vaishingkü nyübüh bong kukha nyu, hatü büpai Jerusalemei bong anpüvok ong vaiteke. Chebü David kei nevai-i, büpai SHEMBÜPA touei mehe jiü, ha nedük.

²Büpai Israel ongpathülei lem kü kam, hatü Baal kahvangthü kü khümhen lajei shükteke.

³Büpai Ben-Hinnom Kahjilei jakpü moila shuoh, hatü Israel am toueipü SHEMBÜPAi changtükpü jatthüi dükpü jiühitpü dou keiha büpai cheha aw kü jakei moila shuoh.

⁴Büpai vaümchongthü, shangtao hatü püdhüm peü phangei moila hatü ayingshü jakei moilateke.

⁵Hanangkü SHEMBÜPA, büpalei Kahvangi büpa Aram ongpa kü shuohtük. Aram ami büpa neütüktü büpalei nanglakthü longi yepei Damaskalei leilang. Shao büpa Israel amei lak kü shuoh hatü büpalei nanglak longi mah.

⁶Nyih hük kü Remaliahlei cheha Pekah-i Judah veshanthü 1, 20, 000 jütük; mehenangkü Judah ami SHEMBÜPA, jomei bühipalei Kahvang yaktük.

⁷Ephraim am hampa Zikhri-i ongpalei cheha Maaseiah, ongshem veipü lakchongbü Azrikam, hatü ongpa phangkü kü nyipabü Elkanah jütük.

⁸Israel ami jomei jeihinaü Judah am nyüha hashih 2, 00, 000 thahshi yepei mophimo longi yah-ei Samarialei leilang.

⁹Shejao SHEMBÜPAlei thibü hük meni, Oded shei nyu, hatü büpai Samarialei leijapü veshanthü mü pongteinüng heih-ei büpai jomphong kü, “SHEMBÜPA, ambü ampalei Kahvangi Judah kü mongshihpü nangkü büpai jom ammei lak kü shuohpeih, shejao ammi nemei-i hokei jüpai vangsho thahteke.

¹⁰Shaang ammi Judah hatü Jerusalem am nyüha hashihthü ammei aa leihühen deihshi nyüke. Shejao amao SHEMBÜPA, ammei Kahvang touei mang nethahnyih shei deihnyu je?

¹¹Shaang ngei epü bangtuh! Ammi yepei daipü ammei jeihinaü am nyokei leishihtuh; mehenangkü SHEMBÜPA mongshihpü am khüei nyüke” shei e.

¹²Hahepak kü Ephraim am mübüthü hanei — Johananei cheha Azariah, Meshillemothlei cheha Berekhiah, Shallumei cheha Jehizkiah, hatü Hadlailei cheha Amasa hathüi vehok leipü veshanthü khüei yaong hatü jomphongi,

¹³“Ha yeppü shennyakthü halei teleikei. Shaang jeni thahpü mang hatü pungpü kü üei jen kü shao SHEMBÜPA touei mang thahhen mü amphongi koei leikünyüke. Mehenangkü jenei mang ahshi longshi hatü Israel khüei mongshih longpü nyüpeih” shei e.

¹⁴Hanangkü veshanthü yeppü shennyak hatü yah-ei leipü mophimo peü lakchongbüthü hatü thaipü khong touei tuhphong.

¹⁵Jomi shennyak je, hatü hathüi yepei deipü shennyakthü bümkong nyupü kü ashakviha owhü, lathuh thuhhü hahhen yinghen shouh hatü makaw kü olive mainga-i nyioteke. Kamhen neaokpüthü gadu kü uohütü jomei jeihinaüthü palm pü Chingnyü Jerikolei leishih, hatü jom Samarialei leidai.

¹⁶Hahepak kü Ahaz ongpai Assyria ong kü sheühpü yüei phe.

¹⁷Edom am shao peiyei Judah hah, hatü neütük hatü shennyak longi yepei dai,

¹⁸hatü Philistia ami hahepak kü-üng heshüphi kahshangla hatü pehephi Judah hahteke. Jomi Beth-Shemesh, Aijalon, hatü Gederoth hatü Soko chingnyüthü, Timnah hatü Gimzo mü jomei chingthü omshi hahteke.

¹⁹Judah ongpa Ahaz tata kü SHEMBÜPAi Judah am bhih-ei maanei leishihpeih; mehenangkü büpai Judah kü mang dahüpeih, hatü peü mü SHEMBÜPA kü hingnelempü shennyak nyuteke.

²⁰Assyria ongpa Tiglath-Pileseri büpa touei peiyei sheühhen nangjei longi tok shuoh.

²¹Ahaz-i phopshem, ongshem hatü lakchongbüthülei shem leipü hon yah-ei Assyria ongpa kü shuoh, shejao hapaiyao dou nedük.

²²Ahaz ongpa longi ponghahpü hepak kao nyeinya büpai SHEMBÜPA touei mang thah.

²³Büpa kü hok neüshuohpü Damaska amei kahvang kü büpai moila shuoh; mehenangkü büpai, “Aram ongpalei kahvangi jom kü sheühpü nangkü ngei kao nyemsheühphanüng ngei hathü kahvangthü kü moila shuohhen hih” shei deih. Shejao hathü homei büpa hatü Israel am kemei doteke.

²⁴Ahaz-i phopshem leipü dükhi-ümthü yahei khih mü dehtük. Büpai phopshem sha küptük, hatü Jerusalem chingshouk ieyei kü büpa shing moidü ling.

²⁵Büpai Judah chingnyü peülei lebü kahvangthü kü moila jakhen vaümchongthü ling, hapai SHEMBÜPA, chebü chepalei Kahvang mongshih vamhü.

²⁶Shaang büpai dükpü lebü douthü hatü büpalei lemthü peü pangpü kübü dohpü thahshi Judah hatü Israel ongthülei Büshah Laitap kü nyangei nyüke.

²⁷Ahaz di hatü Jerusalemei mahng vü, shejao Israel ongthülei mahngsha kü nevü. Cheha Hezekiah-i büpa jeiyei ong vaiteke.