Read Phom Naga 2 SHÜPPÜKENGPÜ 29 Bible Online

2 SHÜPPÜKENGPÜ 29 - Phom Naga bible

2 SHÜPPÜKENGPÜ 29

¹Hezekiah ong vaishingkü büpa nyübüh bong hapünga nyu, hatü büpai Jerusalemei bong hapüshü ong vaiteke. Chenyü-ü Zekhariahlei yiükha Abijah shei menpü nyu.

²Büpai chebü Davidi keiha mehe SHEMBÜPA touei jiü, ha dük.

³Büpa ong vaipü bong shongpü len kü büpai phopshem sha ap, hatü hathü lingei lei.

⁴Büpai ngongpathü hatü Levi am phopshem heongphi chingshelei thaihütü eteke,

⁵“Ngei epü bangtuh, Levi am! Am nyingi daütüktuh, hatü SHEMBÜPA, ambü ampalei Kahvangei shem daütüktuh. Phopshem leipü nedaünelangpü lemphü yaktüktuh.

⁶Jenei bühipathüi hingnelem; jomi SHEMBÜPA, jenei Kahvang touei mang dük, hatü büpa yaktük. Jomi SHEMBÜPA nyushing phopshem leipü dhe yaakdai, hatü büpa kübü dok lepdaipeih.

⁷Jomi phopshem shaden küptüktü awdük mettük; jomi ayingshü nejak, hatü Israel Kahvangei shemei jakpü moila neshuoh.

⁸Hanangkü SHEMBÜPAlei mongshih Judah hatü Jerusalem kü peipeih; büpai hathüyü nyemhivüng hatü ne-ienelem dou hük leitükpeih, hatü ha ammei müki eenyüke.

⁹Ha med kü jenei nyühihathü yepei deilangpeih.

¹⁰Shaang ngei SHEMBÜPA, Israel Kahvang mü vangeishuwpü hük linghen deihshi nyüpeih; shejüang büpalei mongshih jen toueipü yahlangphahen.

¹¹Hapeüthü, shaang nyüshulük kü tenyu; mehenangkü SHEMBÜPAi am büpa touei yaonghen, büpa chongphohen, hatü büpa touei ayingshü jakei chongphohen jepeih.”

¹²Hahepak kü hathü Levi ami dou dükhen yaong: Kohath am phang kübü Amasailei cheha Mahath, hatü Azariahlei cheha Joel, Merari am phang kübü Abdilei cheha Kish, hatü Jehallelelei cheha Azariah, Gershon am phang kübü Zimmahlei cheha Joah hatü Joahlei cheha Eden;

¹³Elizaphanei hühihathü kübü Shimri hatü Jeuel nyi; Asaphei hühihathü kübü Zekhariah hatü Mattaniah nyi;

¹⁴Hemanei hühihathü kübü Jehuel hatü Shimei nyi; Jeduthunei hühihathü kübü Shemaiah hatü Uzziel nyi nyuteke.

¹⁵Mechem jomi jomei jeihinaüthü thaijapa, jom laophü laophü daütüktü SHEMBÜPAlei shah bangei ongpai ngeükhüam shuohpükei phopshem daühen mongei shü.

¹⁶Ngongpathüi phopshem daühen shü. Jomi phopshem mongei dangpü nedaünelangpü dou lemphü yah-ei ngai. Levi ami ha yah-ei Kidron Kahjilei koei dai.

¹⁷Jomi phopshem daühen shongpü len shongpü nyih kü pang, hatü ha len nyih shetpabü kü shemshom thahshi daüei tem. Shao nyih shet phopshem daüei nyu, hatü hapayü shongpü len nyih anpüvokpabü kü tem.

¹⁸Hapheikü jom leiyei Hezekiah ongpa kü hathü shah-om aokteke: “Hamphongi phopshem kempü, jakpü moila shuohpü moidü hatü haleipü dükhi-üm, daütükpü aan haühen haüdü, hatü douhinangthü peü daütüktih.

¹⁹Ahaz ongpa ong vaishingkü büpai hingnelemi shing chaitükpü douthü peü daütüktü shaangü SHEMBÜPAlei moidü shelei haüshi shepeih.”

²⁰Nepphei lomi Hezekiah ongpai chingnyü leipü lakchongbüthü nyüktü chemi phopshemei aong.

²¹Jomphongi mohoh chebaong nyet, mi chebaong nyet, mi chebaongha nyet, yum chebaong nyet ongching, phopshem hatü Judah am shing mang moila koei pei. Ongpai ngongpathü, Aaronei hühihathü kü hathü yah-ei moidülei moila shuohhen eteke.

²²Hanangkü jomphongi mohohbaongthü jü, hatü ngongpathüi iy yah-ei moidü kü hai; hapheikü jomi mi chehathü jü, hatü moidü kü iy hai; hapheikü jomi mi chebaonghathü jü hatü iy yah-ei moidü kü hai.

²³Shompülei mang moila shuohhen yumthü peü ongpa hatü nanglakthü touei deiyei hathü kü jomei laki shüngteke,

²⁴hatü ngongpathüi hathü yum jütü Israel am kempülei mang tükhen shingvaishi moidülei ha iy shuoh; mehenangkü ongpai Israel am peü shingvaishi jakpü moila hatü mang moila shuohhen ngeükhüam shuoh.

²⁵Büpai phopshemei Levi am cymbal, harp hatü lyre notü David hatü ongpalei thibü Gad hatü Nathan thibü hathüi epükei yaonghü; hapayü SHEMBÜPAi thibüthü homei eteke.

²⁶Hanangkü Levi ami Davidei kesho lokteipü hadirthü hatü ngongpathüi amit notü temei yaong.

²⁷Hezekiah-i moidülei jakpü moila shuohhen ngeükhüam shuoh. Moila shuoh-ei pangshingkü amit hatü Israel ongpa Davidei hadirthü notü ha vüngei SHEMBÜPA kü kesho lokei chongpang.

²⁸Kesho lokpüthüi kesho amit vüngshingkü thaipü khong peü aümei khüm. Jakpü moila shuoh-ei mangkem thahshi hapakei nedoh-i nyu.

²⁹Mechem moila shuoh-ei tempa, ongpa hatü büpa mü nyupüthü peü aümei shaei khüm.

³⁰Hezekiah ongpa hatü büpalei lakchongbüthüi Levi am kü David hi Asaph thibü nyi-i nyangpükei SHEMBÜPA kü menvih kesho lokhen e. Hanangkü jom men vihpai kesho lokei aümei shaei khüm.

³¹Hahepak kü Hezekiah-i, “Shaang am nyingi SHEMBÜPA touei daüteke. Shaangü moila hatü menvih moila SHEMBÜPAlei shemei koei peikei” shei e. Hanangkü khongi moilathü hatü menvih moila hatü mongpüthüi jakpü moila koei pei.

³²Thaipü khongi koei peipü jakpü moilayü mohohbaong pejempüan, mi chebaong kho hük hatü mi chebaongha kho hükhathü peü SHEMBÜPA kü jakpü moila nyuteke.

³³Moila shuohhen lanei shuohpü mohohbaong kho vok hatü mi hi yum haja jem nyuteke.

³⁴Jakpü moila shuohpü yemhimak longi nyupü nangkü hapalei shuw nyiukhen ngongpathü maani mon nyu; hanangkü jomei jeihinaü Levi ami dou mangtem thahshi hatü lebü ngongpathü mangdaü thahshi sheüh; mehenangkü ngongpathü leimü Levi ami jom nyingi daüei nyuhen longi nyakpükenpü nyuteke.

³⁵Jakpü moila changshi nyu, hatü ha mü chemi mongjempü moilalei cheü hatü yiü moila-ao omshi nyuteke. Hapa keiha phopshemei khümpü leiyei chonglingteke.

³⁶Hezekiah hatü nanglakthüi Kahvangi lomi dou dükpü nangkü mongong.