Read Phom Naga 2 SHÜPPÜKENGPÜ 30 Bible Online

2 SHÜPPÜKENGPÜ 30 - Phom Naga bible

2 SHÜPPÜKENGPÜ 30

¹Hezekiah-i Israel hatü Judah am peü kü shah shom, hatü Ephraim hi Manasseh am kü lai nyangei jom kü SHEMBÜPA, Israel Kahvangei men kü Hompü Mo hahhen Jerusalem phopshemei thaikütuh shei thong.

²Ongpa, lakchongbüthü hatü Jerusalemei thaipü khong peüi nyipabü len kü Hompü Mo hahhen shei temtei.

³Jomi düngei payü ha nemoaok; mehenangkü ngongpathü bhei-ie lomei jom nyingi daüeilangei nenyu, nevaijü nanglakthü Jerusalemei nethai.

⁴Hapa küpjan ongpa hatü nanglakthüi meiangke shei deih,

⁵hanangkü jomi Israel kempülei Beer-sheba kübü Dan thahshi baongeiyaüei SHEMBÜPA, Israel Kahvang kü Hompü Mo hahhen nanglakthü peü Jerusalemei peihen thongei shom. Shahkungnyü kü nyangei nyupükei khong longi thaiyei ne-omham.

⁶Ongpai shah shuohpükei lai kopüthü Israel hatü Judah peü lemei ongpa hatü büpalei lakchongbüthülei lai hapakei nyangtü koei dai. “Israel nanglakthü, SHEMBÜPA, Abraham, Isak hatü Jakob Kahvang touei mong leptuh, shejüang Assyria ongpalei lak kübü yangpü am touei büpa lepkahen.

⁷Amphongü SHEMBÜPA, ambü ampalei Kahvang kü hingnelempü ambü ampa, anjei anaüthü kei tenyu; hanangkü büpai jomphongü lavüngtoiyei leitükpü ammi eeteke.

⁸Ambü ampa keiha am mong tevaan; SHEMBÜPA touei maanpü leituh. Büpai den shing daüei tuhpü phopshemei peikei. Am toueipü büpalei mongshih yahlangphahen nangkü SHEMBÜPA, ammei Kahvang chongphotuh.

⁹Ammi SHEMBÜPA touei mong lepjema ammei vepathüi yah-ei lüdaipü ammei jeihinaü hatü hapeüthü kü phahji huhen hatü hapa kahdokei müei leikahen; mehenangkü Shembüpa, ammei Kahvangü phahji yahyangpü Kahvang nyüke. Am-üng büpa touei mong lepjema büpalei dhe am toueipü nelepdaipih” shei e.

¹⁰Lai kopüthü Ephraim hatü Manasseh kü, hatü Zebulun thahshi jila hük kübü hük shei dai, shejao nanglakthüi jomphong kü deyeinaamei, yaüeilungei e.

¹¹Shejao Asher, Manasseh hatü Zebulem shennyak hanei-i nenteiaokei leitü Jerusalemei pei.

¹²Judah leiyao SHEMBÜPAlei shah kü epükei mehe ongpa hatü lakchongbüthüi epa, ha kü mongjemtü dükhen shingvaishi Kahvangi dou dükteke.

¹³Len nyipabü kü Daw neshihpü Aan Mo hahhen shingvaishi khong longi Jerusalemei thai.

¹⁴Jomi Jerusalem leipü moidü hatü ayingshü jakpü moidü peü yah-ei daiyei Kidron Kahjilei yaktük.

¹⁵Jomi len nyipabü nyih anpüalipabü kü Hompü Mo moila mithü jü. Ngongpa hatü Levi ami veüei deih, hatü jom nyingi daütüktü phopshemei jakpü moila koei pei.

¹⁶Hapheikü jomi Kahvang shennyak, Mosa Shahkung kü nyupükei shingnüngei yaong. Levi ami shuohpü iy ngongpathüi haiteke.

¹⁷Khongnyü longi nedaütüki nyupü nangkü jom SHEMBÜPA touei daülangi leihen shingvaishi Levi ami Hompü Mo moila mü jüteke.

¹⁸Ephraim, Manasseh, Issakhar hatü Zebulun leipü peipü nanglakthüi jom nedaütüki tuhtü vanglem kü pungei Hompü Mo hah. Shejao Hezekiah-i jom shing hapakei phopei e, “Meipü SHEMBÜPAi peü kü mang tükshih.

¹⁹Üamei mongdangi Kahvang, chebü chepalei SHEMBÜPA Kahvang yemnya, vanglem kü jiüpükei daüeilangei nedükjao mang tükshih.”

²⁰Hezekiah-i epü SHEMBÜPAi danei mang tüktü hanghi neshuoh.

²¹Jerusalemei thaipü Israel ami nyih nyet thahshi Daw neshihpü Aan Mo longi mongongshi moteke, hatü Levi am hatü ngongpathüi nyihjeih kesho lokpü hadir notü vüngei SHEMBÜPA kü menvih-ei kesho lok.

²²SHEMBÜPA chongphopü dousho meishi yaoei dükjapü Levi am peü kü Hezekiah-i menvih shuoh-ei e. Nyih nyet thahshi jom kü hahhen epü hean hah-ei mongjempü moila shuoh-ei SHEMBÜPA, chebü chepalei Kahvang kü menvih shuohteke.

²³Hapheikü thaipü khongi shao nyeinya nyih nyet mohen mongteiyei shao nyih nyet mongongshi moteke.

²⁴Judah ongpa Hezekiah-i khong shing mohohbaong haja hük, mi hatü yum haja nyet shuoh, hatü lakchongbüthüiyao mohohbaong haja hük, mi hi yum haja an shuoh. Ngongpathü khong longi daüeilangteke.

²⁵Judah am thaipü peü, ngongpathü hatü Levi am hatü Israel kübü peipüthü mü Israel leipü peipü yenpathü hatü Judahlei nyupüthü peü longi mongong.

²⁶Jerusalem kü mongong longpai maei nyu; mehenangkü Davidei cheha Solomon, Israel ongpalei nyih mebü Jerusalemei hapakei mechemao nenyuham.

²⁷Ngongpathü hatü Levi ami nanglakthü kü moihimanhen yaong hatü Kahvangi jomi phoppü dan; mehenangkü jomi phoppü büpa nyushing daülangpü vangsho ngoiteke.