Read Phom Naga 2 SHÜPPÜKENGPÜ 31 Bible Online

2 SHÜPPÜKENGPÜ 31 - Phom Naga bible

2 SHÜPPÜKENGPÜ 31

¹Mechem moei kempa, halei thaipü Israel am kemei Judah jilathülei yanei daiyei daülangpü yaong shemnyüthü hatü Asherah nyüha kahvangei lajeithü mangtük. Jomi Judah, Benjamin hatü Ephraim hi Manasseh kü nyupü vaümchong hatü moidü peü bentük. Jomi hathü peü mangtükpheikü Israel ami laophü laophülei ching hatü kahphei shemshing yemei leidaikem.

²Hezekiah ongpai ngongpathü hatü Levi am kü laophü laophülei dousho aimü hanei shuoh: Jomei dousho-ü jakpü moila, mongjempü moila shuohhen, chongphohen, menvih shuohhen hatü SHEMBÜPAlei shem shadenei menvih kesho lokhen nyuteke.

³Ongpai büpalei mop kübü dhom, om hatü Sabbath nyih, Lenja Mo hatü SHEMBÜPAlei Shahkung kü nyangei nyupü lebü mothü kü shuohhen jakpü moila shuoh.

⁴Büpai Jerusalemei nyupü nanglakthü kü ngongpathü hatü Levi ami SHEMBÜPAlei Shahkungnyü kei lanei shuoh-ei dou dükhen shingvaishi jom kü shuohhen hean jiüshi shuohtuh shei ngeükhüam shuoh.

⁵Ngeükhüam danghinüng, Israel ami nekaungi shongpü betjük, yiüja, mainga, nyahjiü hatü kahlei vampü lemphüli shuoh. Jomi lemphü kübü ankhong longi koei pei.

⁶Judahlei nyupü Israel hatü Judah ami jomei yemhimak kübü mohoh, mi hatü SHEMBÜPA, jomei Kahvang kü daütükpü douthü kübü ankhong shuoh, hatü hathü shüngei tuh.

⁷Jomi ha len jempabü kü dükei chongpangpü len nyetpabü kü doh.

⁸Mechem Hezekiah hatü büpalei lakchongbüthüi hathü shüngpü eepa, jomi SHEMBÜPA kü menvih shuoh, hatü Israel nanglakthü kü moihiman.

⁹Hezekiah-i ngongpathü hatü Levi am kü hapa shüngpü dou nang phe,

¹⁰hatü Zadok am shem ngongchong Azariah-i, “Sheyü nanglakthüi phopshemei moila koei peiyei pangdaipü nangkü hami changshi hahtü shao longi aonyüpeih; mehenangkü SHEMBÜPAi laophülei nanglakthü kü longi moihimannyu khih, hatü hathüyü aopü khih” shei jangei e.

¹¹Hezekiah-i phopshem dungnuk haneilei ha tuhshing linghen e, hatü ling.

¹²Hapheikü jomi mong shuoh-ei moila, ankhong hatü thintho longi shuoh. Levi am Konaniah-i hathü kü vei, hatü chenaü Shimei-i büpa kü sheühteke.

¹³Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath hatü Benaiah hathüyü Konaniah hatü chenaü Shimei nyi phangkü dükhen shingvaishi Hezekiah ongpa hatü phopshem kü veipü lakchongbü Azariah nyi-i jeyei hanteke.

¹⁴Heong peshaden yombü Levi am Imnahlei cheha Kore-ü Kahvang kü shuohpü mongong moila, hatü thinthothü demei hanei shuohhen kü khei vaiteke.

¹⁵Eden, Miniamin, Jeshua, Shemaiah, Amariah hatü Shekaniah hathüi büpa kü lanei shuoh-ei jempü Levi am khong khong behe hashih peü kü hathü demei hanei shuohpü kü sheühteke.

¹⁶Ha mü chemi, bahanaü bong jem hatü ha dok kübü üamei men shüei nyu, hatü laophü kü hanpü dousho dükhen mü phopshemei peiaokhenthü peü kü hapa hanei shuoh,

¹⁷hatü jomi ngongpathüi lai kü men shüei nyupüthü shemdep aimü hatü hapakei Levi am bong kukha hatü ha dok kübü jomei dousho hatü khong aimü hathü demei hanei shuohteke.

¹⁸Jomi naü maanpü, nyüha, yeshang hatü yiükhathü peü jomei bülem laitap kü men nyangei tuh. Mehenangkü jomphongü laophü nyingi hingshangi daüeitüktü nyuteke.

¹⁹Aaronei hühihathü Levi am jomei jilathü shinei kahlei hatü lebü jilalei nyupüthü shingvaishiyü shennyak hanei jeyei hathü bahathü peü kü hatü Levi am bülem nyangpü laitap kü men nyupüthü peü kü hahying demei hanei shuoh.

²⁰Hapayü Hezekiah-i Judah kempülei SHEMBÜPA, büpalei Kahvang kü hinglemei mehe mei hatü jiü, ha dükteke.

²¹Büpai phopshemei hatü shahkung bangei dükhen shei tempü dou lemphü kü büpai Kahvang yem hatü mongdang kempai dük. Hapa keiha büpa daeisheyei dai.