Read Phom Naga 2 SHÜPPÜKENGPÜ 32 Bible Online

2 SHÜPPÜKENGPÜ 32 - Phom Naga bible

2 SHÜPPÜKENGPÜ 32

¹Hezekiah-i hathü kemei mong shuoh-ei dükpheikü Assyria ongpa Sennakeribi Judah hahhen pei. Büpai hathü neühen shei deihshi penyü showtükpü chingnyüthü shüm.

²Mechem Sennakerib peiyei Jerusalem khüei hokhen deihpü eepa,

³büpai büpalei lakchongbüthü hatü veshanthü mü eteitü Assyria ami yung nedanghen mü chingnyü haolei yunglem bontükhen eteke, hatü jomi büpa kü sheüh.

⁴Nanglak khong longi thaiyei yunglok hatü yungyen kemei kahmük homei shapü bontük. “Mehekei Assyria ongpa halei peiyei yung changshi danghühenang?” shei jomi etei.

⁵Hapheikü büpai bham mangdaipü shing peü kheyei ling hatü halei shangdü ve. Büpai ha haolei shao lebü bham laap hük ling, hatü David Chingnyü kü Millo wong koh-ei ling. Büpai lahhilaong hatü inyüshung longi ling.

⁶Büpai nanglakthü shak kü veshan lakchongbüthü je, hatü jom peü büpa touei chingnyü penyüsha chingshelei thaihütü jomphong kü hathü shah eyei nangthongteke:

⁷“Amphong wongkoh monglongtuh. Ammi Assyria ongpa hatü büpa mü nyupü veshan khongnyü eeyei am tenyem nevaijü mongtemaan; mehenangkü büpa mao nyeipü hük jen mü nyüpeih.

⁸Büpa keyü hangkulei wong mon nyüke shejao jen meyü jen kü sheühhen hatü jen nangkü hokhen SHEMBÜPA, jenei Kahvang nyüpeih.” Hanangkü nanglakthüi Judah am Hezekiah ongpai epü shah kü mongyangei deih.

⁹Hapheikü mechem Assyria am Sennakerib ongpa büpalei veshanthü mü Lakhishlei nyupa, büpai laophülei chongphobüthü Jerusalemei Judah am Hezekiah ongpa hatü Judah nanglakthü peü touei shomei hapakei e,

¹⁰“Assyria am Sennakerib ongpai hapakei enyüke: Mih-i Jerusalem shümei yahtü am mehe kü mongnyangshi nyunya?

¹¹Hezekiah-i am kü, ‘SHEMBÜPA, jenei Kahvangi Assyria ongpalei lak kübü jen yangphahen’ shei eshi büpai am pungei aeipülepü lemei münyeih shei nenyingnyu je?

¹²Kahvangei vaümchongthü hatü moidüthü kemei mangtüktü Judah hatü Jerusalem am kü, ‘Moidü hük kü mon am khümhen hatü hapalei mon ammi moila shuohhen shei epü hapa aihük Hezekiah nevaipü je?’

¹³Hathü kahdok kübü jatthülei kahvangthüi ngelei lak kübü jomei kahdok yangei aokla?

¹⁴Ngelei bühipathüi mangtükpü jatthülei kahvang üpai ngelei lak kübü jomei nanglak yangaokpa? Mekei etü ammei Kahvangi ngelei lak kübü am yangaokhen?

¹⁵Shaang Hezekiah-i am telutelemhü nevaijü hapakei lemnyong kü temühü. Ammi büpa kü hingtelem; mehenangkü mepa jat nevaijü ongchingei kahvangiyao ngelei lak hatü ngelei bühipalei lak kübü laophülei nanglak yangei neaokangpih. Hajük maanpü ammei Kahvangi mekei etü ngelei lak kübü am yangaokhen!” shei e.

¹⁶Sennakeribei lakchongbüthüi nedoh-i SHEMBÜPA Kahvang hatü büpalei chongphobü Hezekiah khüei e.

¹⁷Ongpai SHEMBÜPA, Israel Kahvang vüshih-ei lai nyang hatü büpa khüei hapakei e, “Lebü kahdokthü kübü kahvangthüi laophülei nanglak ngelei lak kübü neyangaokpü keiha Hezekiahlei Kahvangi ngelei lak kübü büpalei nanglak neyangaokpih.”

¹⁸Jomi Hebrew shah mü bham touei nyupü Jerusalem nanglakthü kü hapa chingnyü hahhen nangkü jom kü nyemshao-ei nyemhühen shingvaishi wongmü lenei nyük.

¹⁹Hangkulei laki lingpü lebü nanglakthülei kahvangthü jung epü keiha jomi Jerusalem Kahvang jungao e.

²⁰Hahepak kü Hezekiah ongpa hatü Amozlei cheha Isaiah thibü nyi-i hapa nang eshi vangsho am kü lenei phop,

²¹hatü SHEMBÜPAi vangsho phongshan hük shomei Assyria ongpalei baümtapei nyupü veshanthü, mübüthü hatü lakchongbüthü peü jütük. Hanangkü büpa mongshangei laophülei kahdok yemei leidai. Mechem büpa laophülei kahvang khümshemei shüpa, chehapeü hanei büpa kü yani bapei jü.

²²Hapa keiha SHEMBÜPAi Hezekiah hatü Jerusalem nanglakthü Assyria ongpa Sennakeribei lak hatü lebüthülei lak kübü yangteke. Büpai jom kü lem peü phikü jung.

²³Longshi shingi Jerusalemei SHEMBÜPA kü moila hatü Judah am Hezekiah ongpa kü bhei wongpü thinthothü koei pei. Ha shan kü pangei jat peüi Hezekiah kü dhüm shuoh.

²⁴Hathü nyih kü Hezekiah tüng hatü dihen mü nyuteke. Büpai SHEMBÜPA kü phop, hatü büpa kü jangei yashanpü nyangeihepü hük shuoh.

²⁵Shejao Hezekiahlei mongkü changmeiyei deih hatü büpa kü hushuohpü phahji kü mongongei nedeih; hanangkü büpa, Judah hatü Jerusalem kü hanghi pei.

²⁶Shomshi Hezekiah hatü Jerusalem nanglakthüi jom changmeipü nangkü maanpü lei; hanangkü Hezekiahlei nyih kü SHEMBÜPA mongshihpü jom kü nepei.

²⁷Hezekiah ongpai mop longi ang hatü dhüm kohshi nyu, hatü büpai laophülei hon, ngin, douvang yaongthü, hetnyai, iithü hatü dounyünangba peü tuhhen shemthü veteke.

²⁸Büpai hah, yiüja hatü mainga tuhhen puongthü, hatü yemhimak lemphü shing khaok hatü mi khaokthü ve.

²⁹Büpai ching agei halei mi hatü mohoh longi tuh; mehenangkü Kahvangi büpa kü mop longi shuoh.

³⁰Hezekiah-i Gihon yunglem bontü yunglem laetei David chingnyü heshü philei yenei shanteke. Hezekiah-i dükpü dou peü kü moihimanteke.

³¹Shejao mechem Babylon am vanglem lempüthüi kahdok kü mehe mehe yashanshi nyangeihepü vampü jung phehen shompa, Kahvangi büpa kü dokhen hatü büpalei mongei deihpü lemphü nyinghen nangkü büpa mon tuhphong.

³²Shaang Hezekiah-i dükpü lebü douthü peü hatü büpai Kahvang kü hinglempü peü Amozlei cheha Isaiah thibülei manghkhang kü hatü Judah hatü Israel ongthülei Büshah Laitap kü nyangei nyüpeih.

³³Hezekiah di hatü Davidei hühihathülei mahngchong nyupü shangtaolei vüteke. Mechem büpa dipa, Judah hatü Jerusalem nanglakthü peüi büpa kü dhüm shuoh, hatü büpa jeiyei cheha Manasseh-i ong vaiteke.