Read Phom Naga 2 SHÜPPÜKENGPÜ 33 Bible Online

2 SHÜPPÜKENGPÜ 33 - Phom Naga bible

2 SHÜPPÜKENGPÜ 33

¹Mechem Manasseh ong vaipa, büpa nyübüh vangbong anpünyi nyu, hatü büpai Jerusalemei bong pinyipüanpünga thahshi vanglem lem.

²SHEMBÜPAi Israel am toueipü changtükpü jiühitnalai dou dükpü jatthü phei müei büpai SHEMBÜPA touei mang dük.

³Büpai chepa Hezekiah-i bentükpü vaümchongthü lingei lei, hatü Baal kahvangei moidüthü hatü Asherah nyüha kahvangei lajeithü ling. Büpai lithathü kü khüm.

⁴Büpai SHEMBÜPAlei shem mepa kü SHEMBÜPAi, “Halei den kü ngei kü khümhen” shei e, halei moidüthü veteke.

⁵SHEMBÜPAlei shem chingshe nyiphenei büpai lithathü kü khümhen moidüthü ling.

⁶Büpai Ben-Hinnom Kahjilei chehapeüthü aw kü jakei moila shuoh; büpai phongyomei, teteivanei, thibü kü pheyei hatü yimpi laangthü mü pheyeiyuei nyu. Büpai SHEMBÜPAi mongshihhüei mang longi dük.

⁷Büpai laki lingpü lajei yah-ei SHEMBÜPAlei shemei tuh, hapa nang Kahvangi David hatü cheha Solomon nyi kü, “Israel jat peü khongkü ngei jepü hapa shem hatü Jerusalem kü ngei kü khümhen;

⁸jomi-üng ngei Mosa homei shuohpü shahkung, vanglem hatü yemya peü kenhingei dükjema ammei bühipa kü shuohpü kahdok kübü hajük kü Israel amei la shinei nedeishihhen” shei e.

⁹Manasseh-i Judah am, hatü Jerusalem am lemnyongei mü; hapa keiha SHEMBÜPAi Israel am toueipü changtükpü jatthü mao nemeipüba mang jomi dük.

¹⁰SHEMBÜPAi Manasseh hatü büpalei nanglakthü kü shah e, shejao jomi ha kü mongneshuoh.

¹¹Hanangkü SHEMBÜPAi jom khüei Assyria ongpalei veshan mübüthü shomei Manasseh am khoklatei yepei küp, shong kü nyiamphaaki kentü melangnyiami shatü Babylonei müei dei.

¹²Büpa shanghahpü nangkü büpai SHEMBÜPA büpalei Kahvangei dhe yem, hatü chebü chepalei Kahvang touei longi maanpü lei.

¹³Mechem büpai büpa kü phoppa, Kahvangi büpai yüpü hatü phoppü kü jang, hatü Jerusalemei nyokei leiyei shao vanglem lem. Hahepak küang Manasseh-i SHEMBÜPAyü Kahvang khih shei nying.

¹⁴Hapheikü büpai kahji leipü Gihon yunglok heshüphi leipü David chingnyü dokpa bham lingei anei Nyah Shaden thahshi hatü Ophel shangjing kü shonei ling; büpai hayü longi shaoshi ling. Penyü showtükpü Judah jilathü peü kü büpai veshan mübüthü tuh.

¹⁵Büpai SHEMBÜPAlei shem leipü kung amei kahvangthü hatü lajeithü yaktük, hatü phopshem shangching hatü Jerusalemei büpai lingpü moidü peü chingnyü haolei yah-ei daiyei yaktük.

¹⁶Hapheikü büpai SHEMBÜPAlei moidü leiyei tuh hatü halei mongjempü moila, menvih shuohpü moila shuoh, hatü Judah am kü SHEMBÜPA, Israel Kahvang chongphohen eteke.

¹⁷Shejao nanglakthüi nedoh-i vaümchongthülei moila shuoh, shejao hayü SHEMBÜPA, jomei Kahvang kü shuohteke.

¹⁸Shaang Manasseh-i dükpü lebü douthü, büpai Kahvang kü phoppü hatü Israel amei SHEMBÜPA Kahvangei men kü büpa kü thibüthüi epü shahthü peü Israel ongthülei Büshah Laitap kü nyangei nyüpeih.

¹⁹Büpai phoppü, hatü mekei Kahvangi büpai phoppü yahpa, büpalei mang peü hatü büpa hingnelempü, hatü büpa mong lep shekü vaümchongthü hatü Asherah nyüha kahvangei lajeithü hatü lebü lajeithü lingei tuhpa, hathü kemei thibüthülei laitap kü nyangei nyüke.

²⁰Manasseh di hatü büpalei ongshemei vüteke, hatü büpa jeiyei cheha Amon ong vaiteke.

²¹Amon ong vaipü hepak kü büpa nyübüh vangbong hapünyi nyu, hatü büpai Jerusalemei bong nyi vanglem lem.

²²Chepa Manasseh-i keiha büpai SHEMBÜPA touei mang dou dük. Amoni chepa Manasseh-i lingpü lajeithü peü kü moila shuoh-ei khüm.

²³Shejao chepa Manasseh-i mong leppü keiha büpa SHEMBÜPA touei mong lepei nelei; Amoni mang nyeinya thah.

²⁴Amonei lakchongbüthüi büpa khüei phaüshah show hatü büpa laophülei ongshemei jütük.

²⁵Hahepak kü nanglakthüi Amon ongpa khüei yaongpüthü peü jütük, hatü jomi büpa nangjei cheha Josiah ong vaihüteke.