Read Phom Naga 2 SHÜPPÜKENGPÜ 34 Bible Online

2 SHÜPPÜKENGPÜ 34 - Phom Naga bible

2 SHÜPPÜKENGPÜ 34

¹Mechem Josiah ong vaipa, büpa nyübüh vangbong shet nyu, hatü büpa Jerusalemei bong hapüanpühük vanglem lem.

²Büpai SHEMBÜPA touei mehe jiü, ha dük, hatü laknyong lakdah melemeiyao neleplüki chebü Davidei lem kü kam.

³Büpa vanglem lempü bong shetpabü maanpü hashih hük nyushi büpai chebü Davidei Kahvang yemhen chongpang. Bong anpünyipabü kü büpai Judah hatü Jerusalem kübü vaümchongthü, Asherah nyüha kahvangei lajeithü hatü lebü lajeithü peü mangei yaktükhen chongpang.

⁴Büpai epü aimü Baal kahvangei moidü kemei bentük; büpai hathü kü jakpü ayingshü moidü kemei bentük, hatü Asherah nyüha kahvangei lajei hatü lebü lajeithü peü nihtük. Büpai hathü kemei nihtü hathü kü moila shuohteipüthülei mahngchongei haitük.

⁵Büpai ngongpathülei vangtaothü jomei moidü shangei jaktük; hapa keiha Judah hatü Jerusalem daühü.

⁶Manasseh, Ephraim hatü Simeon kübü Naphtali jilathü thahshi hatü hathü kü shinei nyupü mangtükpü shingthü peü kübü,

⁷büpai moidüthü hatü Asherah nyüha kahvangei lajeithü hatü Israel kahdok kempülei nyupü lajeithü hatü hathü kü ayingshü jakpü moidü kemei khih mü nih-ei ngümtüktü büpa Jerusalemei leidai.

⁸Josiah vanglem lempü bong anpüshetpabü kü kahdok hatü phopshem daüpheikü büpai Azaliahlei cheha Shaphan hatü Jerusalem leipü governor Maaseiah mü Joahazlei cheha Joah nyangbü shei SHEMBÜPA, büpalei Kahvangei phopshem lingei leihen shom.

⁹Jomi ngongchong Hilkiah touei peiyei Levi am shaden yombüthüi Kahvangei shemei Manasseh, Ephraim hatü Israel am aopüthü peü, hatü Judah, Benjamin hatü Jerusalemei nyupüthüi koei peipü lop büpa kü shuoh.

¹⁰Hapheikü jomi SHEMBÜPAlei phopshemei dousho kü veihen jepüthü kü ha shuohphong. Hathüi phopshemei dou dükpüthü kü nanglat shuoh.

¹¹Jomi mistrithü hatü shem vepüthüi shangtükpü yaong, hatü shemha hatü pülu shei Judah ongthüi nejungi mangtükpü nangkü hathü shakhen lop shuoh.

¹²Hathü shennyakthüi hingshangi dou dük. Jomphong kü dousho huhen shingvaishi Jahath hatü Obadiah, Merari kübü vampü Levi am hatü Kohath phang kübü Zekhariah hatü Meshullam hathü nyu. Levi am üami kesho lokpü hadir meishi vüngeiaok,

¹³hathüi dou hük kübü hük shei dou dükpüthü peü shak kü dou kü veiteke. Levi am haneiyü laknyangbüthü, lakchongbü hatü shaden yompüthü nyuteke.

¹⁴Mechem jomphongi SHEMBÜPAlei shemei tuhpü lop aokei ngaipa, Hilkiah ngongpai Mosa homei shuohpü SHEMBÜPAlei shahkungnyü laitap dangteke.

¹⁵Hilkiah-i laknyangbü Shaphan kü, “Ngei SHEMBÜPAlei shem leipü shahkungnyü laitap dangtepih” shei e, hatü Hilkiah-i Shaphan kü ha laitap shuoh.

¹⁶Shaphani ongpa touei hapa laitap dei, hatü büpa kü, “Nüngei lakchongbüthüi jom kü eshuohpükei lemphü düknyüke.

¹⁷Jomi SHEMBÜPAlei shem leipü lop shuohteke hatü dousho kü veipüthü hatü dou dükpüthü kü shuohteke” shei shah-om aokjateke.

¹⁸Hapheikü laknyangbü Shaphani ongpa kü, “Hilkiah ngongpai ngei kü laitap hük yahphopeih” shei e, hatü Shaphani haleipü ongpa touei ieteke.

¹⁹Mechem ongpai shahkungnyü leipü shahthü danpa, büpai laophülei ashakviha shaaktük.

²⁰Büpai Hilkiah, Ahikamei cheha Shaphan, Mikaiahlei cheha Abdon, laknyangbü Shaphan, hatü ongpa chongphopü Asaiah hathü kü ha ngeükhüam shuoh:

²¹“Daituh hatü ngei hatü Israel am aopüthü hatü Judah shingvaishi hapa dangpü laitapei mehe nyangei nyüpa ha SHEMBÜPA kü phetuh; SHEMBÜPAlei shahthü jenei bühipathüi nedükpü nangkü SHEMBÜPAlei mongshih longpü jen kü khüpphahen khih; hapa lai kü nyangei nyupükei jomi nedükang” shei e.

²²Hilkiah hatü büpa mü ongpai shompüthü Huldah thibüla kü phehen heih. Pinnyü-ü phopshem leipü ashakviha yomteipü Hasrahlei cheha Tokhath, Tokhathlei cheha Shallumei chenyüha nyuteke. Pinnyü-ü Jerusalemei Nyipabü Districtlei nyu, hatü pinnyü kü ha jung ejateke.

²³Pinnyüi jomphong kü, “SHEMBÜPA, Israel Kahvangi hapakei enyüke: Ngei touei amphong shompü shennyak kü hapakei etuh,

²⁴SHEMBÜPAi hapakei enyüke: Hingmei ngei hapa shing hatü haleipü nanglakthü kü shanghah hatü Judah amei ongpa touei iepü laitap kü nyangei nyupü thaüvaü peü koei peihen.

²⁵Mehenangkü jomphongi ngei yakphong hatü lebü kahvangthü kü moila shuohpai jomi dükpü doui ngei mongshih vamhüteke; ngelei mongshih hapa shing kü khüphühen hatü hapa nedohhen.

²⁶Shejao Judah ongpa üpai SHEMBÜPA kü phehen shompa, büpa kü amphongi hapakei etuh: SHEMBÜPA, Israel Kahvangi hapakei enyüke: Nüngi danpü shahthü nangkeyü,

²⁷nüngi hapa shing hatü haleipü nanglakthü nangkü nüng mong lepei Kahvang touei maanpü leipü nangkü; nüngi maanpü leiyei nüngei ashakviha shaakei ngei touei theppü nangkü ngeiyao nüngi phoppü dantepih shei SHEMBÜPAi enyüke.

²⁸Ngei ambü ampa touei deishihhen, hatü nüng chingmeivangmei kü dihühen; ngei hapa shing hatü haleipü nanglakthü kü koei peipü shanghah nüngei müki ha ne-eehühen” shei e. Jomphongi ha shahjang koei ongpa touei leiteke.

²⁹Hahepak kü Josiah-i shahyan shomei Judah hatü Jerusalem kübü behethü peü nyükei chemi thaihü.

³⁰Ongpai SHEMBÜPAlei shemei Judah nanglak hatü Jerusalemei nyupüthü, ngongpathü hatü Levi am, nanglak longpü maanpü peü yah-ei aong; büpai jom peüi danshi SHEMBÜPAlei shemei dangpü Vangpüshuwpü Laitap kübü shahthü peü ieteke.

³¹Ongpai shemnyü tüngei yaongtü SHEMBÜPA phei mühen, büpalei shahkungthü noteihen, hatü vanglem kemei jomei mongdang kempai, laangha kempai hapa laitap kü nyangei nyupü vangpüshuwpü shahthü ven danhen shingvaishi SHEMBÜPA touei vangpüshuwpü ja lingei leiteke.

³²Hapheikü Jerusalem hatü Benjamin kü nyupüthü peüi hapa kü vangteke; Jerusalem nanglakthüi chebü chepalei Kahvangi vangeishuwpü aimü dük.

³³Josiah-i Israel kahdok peü leipü jiühitbenüng douthü peü yaktük, hatü chemi nyupü Israel am peüi SHEMBÜPA, jomei Kahvang chongphohü. Büpa nyupü thahshi jomi SHEMBÜPA, chebü chepalei Kahvang phei nemü-i nenyu.