Read Phom Naga 2 SHÜPPÜKENGPÜ 35 Bible Online

2 SHÜPPÜKENGPÜ 35 - Phom Naga bible

2 SHÜPPÜKENGPÜ 35

¹Josiah-i SHEMBÜPA kü Hompü Mo Jerusalemei mo, hatü Hompü Mo shing mi shongpü len nyih anpüalipabü kü jü.

²Büpai ngongpathü jomei dousho kü yaonghü hatü SHEMBÜPAlei phopshemei chongphohen mongnang thongei e.

³Büpai Israel am peü kü nyuhbü hatü SHEMBÜPA kü lanei shuohtükpü Levi am kü eteke, “Daülangpü Vangpüshuwpü Pela yah-ei Davidei cheha Solomon, Israel ongpai vepü phopshemei tuhtuh; ammi bhagchongei paishi kamteihen napü neshiü. Shaang SHEMBÜPA, ammei Kahvang hatü büpalei nanglak Israel am chongphotuh.

⁴Israel ongpa David hatü cheha Solomon nyi-i nyangei hanpükei laophü laophülei mükhiphang aimü hanpü dousho kü yaongtuh.

⁵Laophü laophülei mükhiphang hanpü aimü daülangpü shingei yaongtuh hatü khong peü mü Levi am omhütuh.

⁶Mosa homei epü SHEMBÜPAlei shah aimü Hompü Mo shing mithü jütuh, am daütüktuh, hatü ammei jeihinaüthü men kü temtuh.”

⁷Josiah-i nanglakthü peü shingvaishi Hompü Mo moila shuohhen mi hatü yum haja hapüan hatü mohoh haja jem shuohhathü kemei ongpalei yemhimakthü nyuteke.

⁸Büpalei lakchongbüthüi laophüi mongpü moila nanglakthü, ngongpathü hatü Levi am kü shuoh. Kahvangei phopshem leipü lakchongbüthü Hilkiah, Zekhariah hatü Jehiel hathüi ngongpathü kü Hompü Mo moila mi hatü yum haja nyi mü kho vok hatü mohoh kho jem shuoh.

⁹Levi am mübüthü, Konaniah hatü chenaüthü Shemaiah, Nethanel, Hashabiah, Jeiel hatü Jozabad hathüi Levi am kü Hompü Mo moila mi hatü yum haja nga hatü mohoh kho nga shuoh.

¹⁰Mechem Hompü Mo shingvaishi lemphü tempa, ngongpathü hatü Levi ami ongpai epükei laophü laophülei shingei yaong.

¹¹Jomi Hompü Mo kü mi jü hatü ngongpathüi jom kü yahshuohpü iy hai, hatü Levi ami yemhalei shuw nyiukteke.

¹²Mosa shahkung kü nyangei nyupükei SHEMBÜPA kü moila shuohhen nangkü jomi mükhiphang hanpü aimü shuohhen shingvaishi jakpü moilathü hayaoha tuh. Hapa keiha jomi mohohthüao hanei tuh.

¹³Dükhen epü keiha jomi Hompü Mo kübü phai aw kü shouk, hatü daülangpü moila langdük, haümdük hatü klai hathü kü cheü, hatü lomi nanglakthü peü kü hahhen shuoh.

¹⁴Hapheikü jomi jom hatü ngongpathü shing cheüteke; mehenangkü Aaronei hühiha ngongpathü peü nyakpü thahshi jakpü moila hatü cheü jakei moila shuoh-ei nyuteke. Hanangkü Levi ami jom shing hatü Aaronei hühiha ngongpathü shing cheüei nyu.

¹⁵Asaphei hühiha kesho lokpüthüyü Davidi epü shingei nyu: Jomphongü Asaph, Heman hatü ongpalei thibü Jeduthun nyu. Shaden dangpongei yompüthü shaden kübü yanei daihen napü neshiü; mehenangkü jomei jeihinaü Levi ami jom shing cheüei nyuteke.

¹⁶Hanangkü Josiah ongpai epü keiha hapa nyih SHEMBÜPA kü khümhen, Hompü Mo moei hatü SHEMBÜPAlei moidülei jakpü moila shuoh-ei nyuteke.

¹⁷Halei omei nyupü Israel ami Hompü Mo, hatü Daw Neshihpü Aan Mo nyih nyet thahshi moteke.

¹⁸Samuel thibülei nyih pheikü Israel kü hapakei Hompü Mo nemo, hatü Israel ongthü üpaiyao Josiah-i dükpükei ngongpathü, Levi am, hatü Judah, Israel hatü Jerusalem nanglakthü omshi nedük.

¹⁹Hapa Hompü Moyü Josiah-i vanglem lempü bong anpüshetpabü kü moteke.

²⁰Hathü peü tempheikü, mechem Josiah-i phopshem hengei tempa, Ijip am Neko ongpai Euphrates yungkung Karkhemishlei hokhen aong, hatü Josiah büpa mü hoknüng dai.

²¹Shejao Neko-i büpa kü shahjang shomei eteke, “Ji aa kü hokhen mehe nyüpa, Oh Judah ongpa? Shinnyih-ü ngei nüng mü hoknüng dainyu nevaipih, shejao ngei hokpü mükhiphang mü hoknüng dainyeih, hatü Kahvangi ngei kü shülangi daituh shei epeih. Büpai nüng nemahtükhen shingvaishi ngei mü nyupü Kahvang khüei nüng teyaong” shei e.

²²Shejao Josiah-i büpa toueipü nyokei neleidai-i vehok hokhen shingvaishi büpai owyeiowya temtü dai. Kahvangi epü aimü mehe Neko-i etepa büpai ha nebangi büpa mü hokhen Megiddo Kahjilei dai.

²³Pülah nopüthüi Josiah ongpa kü kap hatü büpai chongphopüthü kü, “Ngei leituh, mehenangkü ngei nemei-i ma yahteke” shei e.

²⁴Hanangkü chongphopüthüi büpa koyei khari hük kübü yah-ei hükpa kü shihtü Jerusalemei yahei lei. Halei büpa di hatü chebü chepalei mahngchongei büpa vüteke. Judah hatü Jerusalem am peü Josiah kü mahng thep.

²⁵Jeremiah-i Josiah kü mahng kesho hük ling hatü shaang thahshi nyüha baha kesho lokpüthüi jomei mahng kesho kü Josiah deih-ei loknyeih. Hapayü Israel kü bü vanglem hük leipeih hatü hapayü Mahng Kesho kü nyangei nyüpeih.

²⁶Josiah ong vaishingkü dükpü lebü douthü hatü SHEMBÜPAlei shahkung kü nyangei nyupükei büpai hinglemei dükpü douthü,

²⁷hatü büpai dükpü douthü pangpü kübü dohpü thahshi Israel hatü Judah ongthülei Büshah Laitap kü nyangei nyüpeih.