Read Phom Naga 2 SHÜPPÜKENGPÜ 36 Bible Online

2 SHÜPPÜKENGPÜ 36 - Phom Naga bible

2 SHÜPPÜKENGPÜ 36

¹Judah nanglakthüi Josiahlei cheha Jehoahaz yah-ei chepa nangjei Jerusalem kü ong vaihüteke.

²Jehoahaz ong vaishingkü büpa nyübüh vangbong hapüjem nyu, hatü büpai Jerusalemei lenyang jem mon vanglem lem.

³Ijip ongpai Jerusalem ong uoshing kübü büpa vüshih, hatü ngin dok 3, 400 hatü hon dok 34 bom yahteke.

⁴Ijip ongpa Neko-i Jehoahazlei chenaü Eliakim, Judah hatü Jerusalem kü ong vaihü hatü büpalei men Jehoiakim shei jeishuohteke, shejao Neko-i Jehoahaz-ü Ijiplei müei yülang.

⁵Jehoiakim ong vaishingkü büpa nyübüh vangbong hapünga nyu, hatü büpai Jerusalemei bong anpühük vanglem lem. Büpai SHEMBÜPA, büpalei Kahvang touei mang dou dük.

⁶Babylon ongpa Nebukadnezzari Judah hahtü büpa yepei nyiamvüi shatü Babylonei deilang.

⁷Shao Nebukadnezzari SHEMBÜPAlei phopshem leipü douthü yah-ei leiyei halei büpalei khümshemei tuhteke.

⁸Jehoiakimi vanglem lemshingkü vampü lebü douthü, büpai dükpü jiühitnalai douthü hatü büpa khüei vampü douthü peü Israel hatü Judah ongthülei Büshah Laitap kü nyangei nyüpeih. Büpa kü jeiyei cheha Jehoiakin ong vaiteke.

⁹Jehoiakin ong vaishingkü büpa nyübüh vangbong anpüshet nyu, hatü büpa Jerusalemei lenyang jem mü nyih an vanglem lem. Büpai SHEMBÜPA touei mang dou dük.

¹⁰Sheileilila hepak kü Nebukadnezzar ongpai büpa yahnüng deishih-ei büpa mü SHEMBÜPAlei phopshem leipü dounyünangba kemei shetei lei, hatü büpa jeiyei chepa naü-eepa Zedekiah Judah hatü Jerusalem kü ong vaihüteke.

¹¹Zedekiah ong vaishingkü büpa nyübüh vangbong hapühük nyu, hatü büpai Jerusalemei bong anpühük vanglem lem.

¹²Büpai SHEMBÜPA, büpalei Kahvang touei mang dou dük hatü SHEMBÜPAlei shah epü Jeremiah thibü touei maanpü nelei.

¹³Hingshangi nyuhen shei epü nangkü Kahvangei men kü vangeishuwpü shuohpü Nebukadnezzar ongpa khüei yaong. Büpa ngaümvang haüei mongdang vaanei SHEMBÜPA, Israel Kahvang touei mong lepei nelei.

¹⁴Anyei vaishi ngongpa mübüthü peü hatü nanglakthü nyeinya hingnelemi jatthüi dükpü jiühitnalai douthü dükei SHEMBÜPAi Jerusalemei daüei tuhpü phopshemao sheihtük.

¹⁵SHEMBÜPA, chebü chepalei Kahvangi laophülei nanglak hatü büpalei nyushing kü bampü nangkü büpalei shahjang kobüthü homei nedoh-i shah shom,

¹⁶shejao SHEMBÜPAi laophülei nanglak kü longi mongshih-ei meilem neshiüi manglei thahshi jomi Kahvangei shahjang kobüthü kü ne-ienelem, büpalei shahthü yaktük hatü thibüthü kü yaüteke.

¹⁷Hanangkü büpai jom khüei Babylon ongpa vamhü, hatü büpai jomei daülangpü shemei thehila yani mahhü; hatü büpai nephahji-i thehila, viüdaipüthü nevaijü nekam neyaongaokpüthü peü büpalei lak kü shuoh.

¹⁸Kahvangei shem leipü yungshong longpü maanpü peü, hatü SHEMBÜPAlei shem leipü mophimo peü, ongpa hatü büpalei lakchongbüthülei mophimo kemei Babylonei shetei deilang.

¹⁹Jomi SHEMBÜPAlei shem awi shamtük, Jerusalem bham mangtük, ongshem kemei awi shamtük hatü haleipü douvang yungshongthü kemei mangtük.

²⁰Yani mahtü aopüthü peü büpai Babylon wüpküpei shetei dai, hatü Persia ongching mangvam thahshi jomü büpa hatü chehathülei chongphopüthü vaiteke.

²¹Jeremiah homei epü SHEMBÜPAlei shah jiüei vangbong pejempüan manglom thahshi lavüngtoiyei nyupü hepak kemei kü hapa kahdokei Sabbath themei nyu.

²²Persia kü Cyrus-i ong vaipü shongpü bong kü Jeremiah homei epü SHEMBÜPAlei shah jiühühen shingvaishi Persia ong Cyrus-i büpalei ongching phangkü nyupü peü kü hapa shahyan baonghen hatü nyanghen SHEMBÜPAi Cyrus ongpalei mong kü thongpü shuoh.

²³Persia ongpa Cyrus-i hapakei enyüke: “SHEMBÜPA, vangsho Kahvangi kahdoknyü ongching peü ngei kü shuohteke, hatü büpai Judah kahdok Jerusalemei laophü shing phopshem hük vehen ngei jeteke. Am mü büpalei nanglak üam nyüpa, jom leishihtuh; SHEMBÜPA, jomei Kahvang jom mü nyemnyu!” shei e.