Read Phom Naga 2 SHÜPPÜKENGPÜ 5 Bible Online

2 SHÜPPÜKENGPÜ 5 - Phom Naga bible

2 SHÜPPÜKENGPÜ 5

¹Hapa keiha SHEMBÜPAlei shemei Solomoni douthü peü dükei tem. Chepa Davidi SHEMBÜPA kü daüei shuohpü dou peü koei lei, hatü hon, ngin hatü dükhi-üm peü phopshemei jaoshingei tuhteke.

²Hapheikü Solomoni Israel am mübüthü, jatthü kü shangjingthü, Israel phangthü kü mübüthü peü David Chingnyü Zion leipü Vangpüshuwpü Pela phopshemei yah-ei anhen Jerusalemei nyükei thaihü.

³Hanangkü Israel am peü ongpa touei lenyang nyetpabü mo hepak kü thai.

⁴Mechem Israel am mübüthü thaipa, Levi ami Vangpüshuwpü Pela paiteke.

⁵Hanangkü jomi Vangpüshuwpü Pela, ashakshem hatü halei nyupü daülangpü dükhi-ümthü peü Levi hatü ngongpathüi koei an.

⁶Solomon ongpa hatü büpa touei peipü Israel am khong peü Vangpüshuwpü Pela sheshonghütü ieyei neaoki mi hatü mohoh chebaongthü yah-ei moila shuoh.

⁷Hapheikü ngongpathüi phopshem mongei Vangpüshuwpü Pela shüei Longi Daülangpü Shing leipü cherubim phangei tuh.

⁸Cherubim nyilei yang paanei heihpai hapa Pela hatü kenh kü dhümteke.

⁹Kenh ahshi lupü nangkü Longi Daülangpü Shing she philei veijü hapalei jung eeshi nyuteke, shejao chingshelei veijü ne-ee; hathü shinnyih thahshi halei nyüpeih.

¹⁰Hapa mongeiyü Israel am Ijip leipü vamei daishingkü SHEMBÜPAi Israel am mü vangeishuwpü lingpü Sinai Kahshangei Mosai tuhphongpü yaongshung nyi mü lenei lebü meheyao neshiü.

¹¹Daülangpü Shing leipü mechem Levi am kemei shakei vampa, jom khong khong hanteipü jung ne-e-i peüi daüeilangtük,

¹²hatü Levi am kesho lokbüthü, Asaph, Heman hatü Jeduthun hatü jomei hapeüthü, shem am nyemin ow owtü moidü heong philei yaongtü cymbal, harp hatü lyre vüngteke hatü jom mü ngongpathü 120 thahshi amit vüng.

¹³Amit vüngpü hatü kesho lokpüthü ngeü hük mü chemi SHEMBÜPA kü menvih shuoh. Amit mü chemi cymbal hatü lebü kesho lokpü hadirthü notü SHEMBÜPA kü ngeü anei hapakei lokteke: “SHEMBÜPA vihtuh; mehenangkü büpa meipü nyüke. Büpa bampü dohpü neshiü.” Hahepak kü phopshemü phumi mateke,

¹⁴hatü phumi jümlangpü nangkü ngongpathüi dou nedükaok; mehenangkü SHEMBÜPAlei müknyinshekhangi phopshem madaiteke.