Read Phom Naga 2 SHÜPPÜKENGPÜ 6 Bible Online

2 SHÜPPÜKENGPÜ 6 - Phom Naga bible

2 SHÜPPÜKENGPÜ 6

¹Hapheikü Solomon ongpai phopei, “SHEMBÜPA, nüngi phumnyak hatü vangnyak kü nyuhen hih shei epeih.

²Nüng düngei nyuhen shingvaishi ngei longi nethe meipü phopshem hük vetepih” shei e.

³Hapheikü ongpa yaakei leiyei yaongshi nyupü Israel am peü kü moihiman.

⁴Büpai e: “Opa David kü büpalei jui lahpü büpalei laki hingei ha jiühüpü kü SHEMBÜPA, Israel Kahvangei men longtuh. SHEMBÜPAi eteke,

⁵‘Ngei ngelei nanglak Ijip kahdok leipü müei leipü hepak kübü shaang thahshi ngei Israel jat kü mepa chingnyü kao ngei kü khümhen shingvaishi ngei kü shem vehen shing hatü ngelei nanglak shak kü ong vaihen üpayao neje-angpih;

⁶Shejao ngei kü khümhen shing ngei Jerusalem, hatü ngelei Israel nanglak shak kü ong vaihen ngei David jepeih.’ ”

⁷SHEMBÜPA, Israel Kahvang kü khümhen nangkü phopshem vehen shei opa Davidi deihshi nyupü khih.

⁸Shejao SHEMBÜPAi opa David kü, “Ngei shing shem hük vehen shei nüngi meishi deihshi nyuteke,

⁹shejao nüngi nevai, anha-i ngelei shem vehen” shei eteke.

¹⁰Shaang, SHEMBÜPAi büpai lahpü jiühüteke; mehenangkü SHEMBÜPAi lahpükei ngei opa David jeiyei Israel ong uoshing kü uo, hatü SHEMBÜPA, Israel Kahvang khümhen nangkü shem hük ve.

¹¹Halei ngei SHEMBÜPAi Israel am mü vangteipü shahkung yaongshung shihpü Vangpüshuwpü Pela tuhteke.

¹²Hapheikü Solomoni Israel am thaipü khong nyushi büpalei lak haongei SHEMBÜPAlei moidü touei yaong.

¹³Solomoni melangnyiam dü hük bahiyang kü meter 2.2 baong hatü shaopü kü meter 1.3 ling. Büpai hapa dü haütü ha shangei aongei yaong, hatü Israel am thaipü khong touei büpai lashüh-i shüngei uotü vangsho philei lak haongshi phop:

¹⁴“Oh SHEMBÜPA, Israel Kahvang, nüngei chongphobü üami nüng mü mongdang kempai kamnya, hathü kü bampai nüngi lahpü düknyüke.

¹⁵Nüngi opa David kü lahpü jiüshi dükteke. Hingmei nüngei jui lahpü shinnyih nüngei laki hüngei ha jiühüteke.

¹⁶Hanangkü Oh SHEMBÜPA, Israel Kahvang, nüngi ngelei opa David kü, ‘Nüngi ngei mü kampü keiha nüngei hapeüthüi ngelei shahkungnyü kü jiüshi kamjema, ngei touei Israel ong uoshing kü uohen shingvaishi nüng kü jeihen shennyak neshiüi nenyupih’ shei lahpü ha dükshih.

¹⁷Hanangkü Oh SHEMBÜPA, Israel Kahvang, nüngei chongphobü David kü eshuohpü nüngei shah jiühütuh.”

¹⁸Shejao hingmei Kahvangü shennyak mü kahdoknyülei nyuhen je? Vangshothü, hei-üng shaopü vangshothü kü dangkao nüng nechajü hajük maanpü ngei vepü shem kü nüng chahen je?

¹⁹Nüngei chongphobüi phoppü hatü yüpü kü banglangshih, Oh SHEMBÜPA, ngelei Kahvang. Nüngei chongphobüi nüng kü phoppü danlangshih.

²⁰Nüng kü khümhen shei epü shing hapa phopshem kü nyihnüng yanüng shei mük vamei veishih. Hapa shing philei nüngei chongphobüi phoppü danlangshih.

²¹Hapa shing philei meetü nüngei chongphobü hatü Israel nanglakthüi yüpü danlangshih. Nüng nyushing vangsho leipü bangtuh hatü mechem danhenshang mang tükshih.

²²Mechem shennyak hüki hanei am kü nejiüi düktü büpai nedükangpih shei epü nangkü hapa phopshemei chüngteinüng deihenshang,

²³nüngi vangsho leipü ha bangei dou dükshih. Nejiüpüba kü ha shangshi hanghi shouhtuh, jiüpüba dah shakhütuh.

²⁴Mechem nüngei nanglak Israel ami nüng touei mang thahpü nangkü vepai neühahhen, shejao jomi nüng touei mong lepei nüngei men kü mang lah-ei hapa shemei nüng kü phopei yühenshang,

²⁵nüngi vangsho leipü ha danei nüngei nanglak Israel amei mang tükshih, hatü nüngi chebü chepa kü shuohpü kahdokei müei leituh.

²⁶Jomi nüng khüei mang thahpü nangkü mechem vangsho küplangtü vang nekeihen, hatü mechem jomi mong lepei hapa shing philei phophen,

²⁷Oh SHEMBÜPA, nüngi vangsho leipü ha danei nüngei chongphobü, hatü Israel nanglakthülei mang tükshih. Nüngi jom kü jiüpü lem nyuheishuoh, hatü nüngei nanglakthü kü mükjüp shuohpü kahdok kü vang keihütuh.

²⁸Mechem hapa kahdok kü münghishaü, chamhilem, nevaijü sheili vungla diyei, mom aongei, shoukhanbaong nevaijü laonghiyak vamei sheilivungla hahtükhen, nevaijü vepa peiyei chingnyü hanei shümlanghen, hatü mehe shanghah vongshüh peihenshang,

²⁹lomja nevaijü nüngei Israel nanglakthüi phopshingkü, nüngi jomei shanghah hatü mongmang peü nyingei jomi hapa shem philei meetü lak haongshi phopjü,

³⁰nüngi nüng nyushing vangsho leipü bangtuh, hatü mang tükeishuoh. Laophüi dükpü aimü nüngi jom kü dükeishuoh; mehenangkü nüngi mon hangkulei mongdang nyingnyüpeih.

³¹Shejüang nüngi hamei bühipa kü mükjüp shuohpü kahdokei nyupü kü nyemei nüngei lemthü kü kamhen.

³²Hapa keiha kung shennyak nüngei nanglak Israel am nevaipüthü nüngei men longpü, hatü nüngei laklu wong longpü jung danei tailu kahdok leipü peiyei nüng kü hapa shem philei meetü phopjü,

³³nüngi nüng nyushing vangsho leipü bangtuh, hatü nüngei Israel nanglakthüi keiha kahdoknyü hangku peüi nüngei men nyinghen hatü nyemhen, hatü ngei nüng kü vepü hapa shemei nüng kü khümnyeih shei nyinghen shingvaishi nüng kü kung ami yüpü dükeishuoh.

³⁴Mechem nüngei nanglakthü vehok kü daihen, jom melemei daihenshang mechem jomi nüngi jepü chingnyü hatü ngei nüng kü vepü phopshem philei meetü phophenshang,

³⁵nüngi vangsho leipü jomi phoppü hatü yüpü bangtuh hatü jom aokpü danghütuh.

³⁶Jomi nüng khüei mang thahjema; mehenangkü mang nethahpü üpayao neshiü, hatü nüngi ha nangkü mongshih-ei vepathülei lak kü yopailei hatü tailu kahdokei wüpküpei yah-ei daihen shuohtükjü,

³⁷jomi wüpküpei yah-ei daipü kahdokei ha deih-ei dangtü mong lepei wüpküpei nyupü kahdokei nüng kü, “Hami mang thahteke, nejiüi dükteke, hatü mang dou dükteke” shei lahjema;

³⁸jomei mongdang, laangha kempai jom wüpküpei daipü kahdokei chebü chepa kü shuohpü mükjüp kahdok, nüngi jepü chingnyü hatü ngei nüng kü khümhen vepü shem philei meetü phopjema,

³⁹nüngi nüng nyushing vangsho leipü jomi phoppü, yüpü kü bangtuh hatü jom kü phahjiei nüng khüei jomi thahpü mang tükeishuoh.

⁴⁰Shaang, Oh ngelei Kahvang, hapa shingei phoppü kü nüngei müki veituh, hatü nüngei dhaong shaangtuh.

⁴¹Shaang paotuh, Oh SHEMBÜPA Kahvang, Vangpüshuwpü Pela mü hapa phopshemei shüei nyutuh. Nüngei ngongpathü, Oh SHEMBÜPA Kahvang, yemleipü ow owhütuh, hatü nüng kü vaipüthüi nüng meipü kü mongonghütuh.

⁴²Oh SHEMBÜPA Kahvang, nüngi thiteiphuei jepü ong teyakphong. Nüng chongphobü David shingvaishi nüngi bampü deih-ei dangtuh.