Read Phom Naga 2 SHÜPPÜKENGPÜ 7 Bible Online

2 SHÜPPÜKENGPÜ 7 - Phom Naga bible

2 SHÜPPÜKENGPÜ 7

¹Mechem Solomoni phoppü dohpa, vangsho leipü aw yiüei jakpü moila hatü lebü moilathü hahtük, hatü SHEMBÜPAlei müknyinshekhangi phopshem ma.

²Ngongpathüi phopshemei neshüaok; mehenangkü SHEMBÜPAlei müknyinshekhangi phopshem madaiteke.

³Mechem Israel nanglak peüi aw yiüpü hatü SHEMBÜPAlei müknyinshekhang phopshemei eepa, jom peüi kahdokei aümei shatü SHEMBÜPA kü khümei, menvih shuoh-ei e, “Büpa meipü nyüke; mehenangkü büpa bampü hüdenhalenshi nyüke.”

⁴Hapheikü ongpa hatü nanglak peüi SHEMBÜPA kü moila shuoh.

⁵Solomoni mohohbaong 22, 000 hatü mi 120, 000 moila shuoh. Hapa keiha ongpa hatü nanglakthüi Kahvangei shem daüteke.

⁶Ngongpathüao jom kü yaonghen shei epü shingthülei hatü Levi amao Davidi kangpü shuohpükei yaong; Davidi SHEMBÜPA kü menvih shuohhen shingvaishi lingpü kesho lokhen hadir notü, “Büpa bampü dohpü neshiü” shei kesho lokei yaong. Jom mü khangei ngongpathüi amit vüng, hatü Israel am kemei yaongteke.

⁷Solomoni phopshem chingshe jiam daühütü hatouei jakpü moila, mongjempü cheü moila shuoh; mehenangkü büpai lingpü melangnyiam moidü kü jakpü moila, hahying moila hatü cheü moila nechahen mü maanshi nyuteke.

⁸Hahepak kü Solomon hatü Israel nanglakthüi nyih nyet thahshi mo moteke, hatü khongnyü longi Lebo-hamath kübü Ijip thahshi thai.

⁹Nyih shetpabü kü jom thaipü longpü nyu. Nyih nyet thahshi phopshem daüei thempheikü shao nyih nyet thahshi mo moteke.

¹⁰Len nyetpabü nyih hapüjempabü kü SHEMBÜPAi David, hatü cheha Solomon hatü Israel nanglakthü kü doumei dükpü shingvaishi mongkü mongongmonglepai maei laophü laophülei shemei leishih.

¹¹Hapa keiha Solomoni phopshem hatü ongshem vehen shei deihhahpü peü aokpü dangei veyei tem.

¹²Hapheikü yanüng Solomon touei SHEMBÜPA peiyei büpa kü, “Ngei nüngi phoppü dantepih, hatü hapa shingü ngei kü moila shuohhen shing shei ngei jetepih.

¹³Mechem ngei vangsho küplangtü vang nekeihen, nevaijü ngei shoukhanbaong kü sheili hahtüktuh shei ehen, nevaijü nanglakthü kü din nemeipü shomhenshang,

¹⁴ngelei men kü nyükpü ngelei nanglakthüi maanpü leiyei phopei ngelei dhe yemjema, hatü nemeipü lem kübü mong lepjema, ngei vangsho leipü ha danei jomei mang tükhen hatü jomei kahdok meihühen.

¹⁵Shaang ngelei mük vamhen, hatü hapa shingei phoppü kü ngelei dhaong shaanghen.

¹⁶Mehenangkü düngei ngei kü khümhen shingvaishi ngei hapa shing jetepih hatü daütüktih; ngelei mükhimong hepak peü kü halei nyuhen.

¹⁷Nüngao ampa Davidi kampü keiha ngei epü peü dükei ngelei shahkung hatü vanglemthü dükei ngei mü kamjema,

¹⁸ngei ampa David kü, ‘Israel kü nüng jeiyei ong vaihen shennyak neshiüi nenyupih’ shei vangeishuwpü keiha ngei nüngei ong uoshing chonglingei tuhhen” shei e.

¹⁹Shejao ngei nüng kü shuohpü shahkung hatü vanglemthü yakphongtü lepei daiyei lebü kahvang chongphoei khümjema,

²⁰ngei Israel am kü shuohpü kahdok kübü bhitükhen, hatü ngei kü khümhen daütükpü hapa phopshem yaktükhen. Ngei ha ngei toueipü yaktükhen, hatü mih jatthü touei kandok hük nevaijü shahsho kü shihhen mü leitükhen,

²¹hatü shaang hapa phopshem dhüm kohshi nyüke, shejao peihpü shaipü peüi, “Mehekei SHEMBÜPAi hapa kahdok hatü phopshem kü hapakei dükshuohpa yo?” shei ehen.

²²Hahepak kü jomi-üng, “Jom Ijip kahdok leipü müei leipü SHEMBÜPA chebü chepalei Kahvang yakphongtü lebü kahvangthü yah-ei hapa chongphoei khümpü nangkü büpai hapa shanghah vongshüh peü shuohpüja” shei eteihen.