Read Phom Naga 2 SHÜPPÜKENGPÜ 9 Bible Online

2 SHÜPPÜKENGPÜ 9 - Phom Naga bible

2 SHÜPPÜKENGPÜ 9

¹Mechem Sheba am onglanyüi Solomonei menmei jung danpa, pinnyüi Jerusalemei büpa kü dokei shah wongpü wongpü phehen pinnyü mü chongphobüthü longi müei ut kü hetnyai, hon hatü ngin longi kotü Solomon touei peiyei pinnyüi mongei deihshi nyupü peü büpa kü phe.

²Pinnyüi phepü peü kü Solomoni shahnyok shuoh; Solomoni pinnyü kü nih-ei ne-eaokhen menüngao wongpü nenyu.

³Mechem Sheba am onglanyüi Solomonei kihikon kü dokei veipa, büpai vepü shem,

⁴büpalei nükdü leipü hahying, büpalei lakchongbüthü uopüyaongpü, jomei owhiai, büpalei yungshong nopüthü, hatü büpai phopshemei jakpü moila shuohpü eetü pinnyü yashan.

⁵Hanangkü pinnyüi ongpa kü, “Nüngi dükaokpü hatü nüngei kihikon jung hamei kahdokei eteiyei danpeyü hingmei khih,

⁶shejao ngei peiyei ngelei müki lekei ne-eepü thahshi ngei hapa shahjang kü hingnelemangpih. Nüngei kihikon longpü jung ngei kü hükkei shingao ne-ephopü khih; nüngü ngei danpü shahjang mao nyeipü khih.

⁷Nüngei nanglakthü-üng vangmei khih! Nüngei chongphobüthü düngei nüng mü nyuei nüngei kihikon nyinghahpüthü vangmei khih.

⁸Nüng kü monghahpü hatü SHEMBÜPA, nüngei Kahvangei ong uoshing kü nüng ong vaiyei tuhpü SHEMBÜPA, nüngei Kahvang moihimantuh. Mehenangkü nüngei Kahvangi Israel am kü bam hatü den kü jom hapakei tuhhen, nüngi shahhing hatü daülangshemshepü dükhen shingvaishi büpai nüng jom shak kü ong vaiyei tuhteke” shei e.

⁹Hapheikü pinnyüi ongpa kü hon dok haja ali mü shei hatü hetnyai hatü douvang yaong longi shuoh. Solomon ongpa kü Sheba am onglanyüi shuohpü hetnyai kei meipü nenyuang.

¹⁰Nyeinya vaishi Hiram hatü Solomonei chongphobüthüi Ophir leipü hon, algum pü hatü douvang yaongthü koei lei.

¹¹Algum pü yah-ei ongpai phopshem hatü ongshem lateen, kesho lokbüthü shing lyre hatü harp ling; Judah kahdok kü hapa leshi shelei ne-eeham.

¹²Solomon ongpai Sheba am onglanyü kü pinnyüi yüpü, napü peü shuoh; pinnyüi koei peipü mao nyeishi büpai pinnyü kü shuoh. Hapheikü pinnyü hatü pinnyü mü peipüthü layaongei laophülei kahmük yemei leidai.

¹³Vangbong hük kü Solomoni dangpü hon dok 23, 000 nyu,

¹⁴hapayü bhei leihpüthüi lat shuohpü neomi nyuteke. Israelei nyupü Arabia ongthü hatü governorthüi Solomon kü hon hi ngin koei peiyei shuoh.

¹⁵Solomon ongpai longpü inyüshung kho nyi ling; inyüshung ieyei kü hon dok nyet baong shih-ei ling,

¹⁶hatü büpai inyüshung maanpü kho jem ling; inyüshung ieyei kü hon dok jem baong shih-ei ling hatü ongpai hathü Lebanon Phaü leipü Shemei tuh.

¹⁷Shao ongpai meinyübha yah-ei uoshing hük ling, hatü hapa kü daülangpü honi jümteke.

¹⁸Hapa uoshing kü lateen vok hatü la shoupshing honi ling, hatü ha ong uoshing kü nyeanei ling, hatü dangpongei lak haüshing shihtü hapa pheilei mailang hükbaong shih-ei ling.

¹⁹Lateen vok kü dangpongei mailang hük baong shihtü peüshep mailang anpünyi nyu. Hapa keipü mepa ong ongchingiyao lingei nenyuham.

²⁰Solomonei yungshong kemei, hatü Lebanon Phaü leipü Shem leipü dükhi-üm kemei daülangpü honi mon ling; Solomonei hepak kü nginü meheyao heshap neshiüi nyu.

²¹Hiramei chongphobüthü mü ongpalei jahas Tarshishlei heih; bong jem kü chem Tarshish leipü jahas hon, ngin, meinyübha, meishang hatü yangmei ou yah-ei leihamteke.

²²Kahdoknyü kübü ongthü peü mü Solomonü mop hatü kihikon peü kü nyeipüba nyuteke.

²³Kahvangi büpalei sholi kü shuohpü kihikon banghen shingvaishi kahdoknyü ongthü peü Solomon touei peihamteke.

²⁴Jom peüi bong ieyei thinthohon, ngin, ashakviha, lahhilaong, hetnyai, koyei hatü gaduthü koei peihamteke.

²⁵Solomonei koyei hatü koyei kharithü tuhhen shem haja ali nyu, hatü koyei haja anpünyi lebü chingnyüthülei hatü Jerusalemei tuhteke.

²⁶Büpai Euphrates kübü Philistia kahdok hatü Ijip viong thahshi kübü ongthü peü shak kü vanglem lem.

²⁷Ongpai Jerusalem kü nginü yaongphaang kei bongeilemei, hatü cedar püyü Shephelah leipü bhukjükpüthü kei bhuh-eilinei angteke.

²⁸Solomon shingvaishi Ijip kahdok hatü lebü kahdokthü peü kübü koyeithü leiteke.

²⁹Shaang Solomoni dükpü lebü douthü peü Nathan thibülei büshah, Shilon am Ahijahlei thihivam shah, hatü Nebatei cheha Jeroboam nangkü Iddo thibülei manghkhang kü nyangei nyüpeih.

³⁰Israel am peü shak kü Solomoni Jerusalemei bong pinyi vanglem lem.

³¹Solomon di, hatü David Chingnyülei chebü chepa mü mahng vü, hatü cheha Rehoboami büpa jeiyei ong vaiteke.