Read Phom Naga EZRA 3 Bible Online

EZRA 3 - Phom Naga bible

EZRA 3

¹Mechem len nyet lompa, Israel am jilathülei nyu, hatü nanglakthü mong hük leitü Jerusalemei thai.

²Hahepak kü Jozadakei cheha Jeshua hatü büpa mü jempü ngongpathü hatü Shealtielei cheha Zerubbabel hatü büpa mü jempüthüi Kahvang shennyak Mosa Shahkung kü nyangei nyupükei jakpü moila shuohhen Israel Kahvangei moidü vehen chongpang.

³Ngeihpü shonpü shennyakthü kü nyemlangmao jomi hapa chongnyiam shing kü moidü ve, hatü dhom hi om shing SHEMBÜPA kü jakpü moila shuoh.

⁴Hapheikü nyangei nyupü keiha nyihjeih shuohhen jiüpü jakpü moila shuoh-ei Ashakshem Mo moteke.

⁵Hapheikü jomi nyingnyoi kübü jakpü moila, Lenja moila, hatü eyei nyupü SHEMBÜPAlei mo, hatü SHEMBÜPA kü koei peipü mongong moilathü shuoh.

⁶Len nyetpabü shongpü nyih kü SHEMBÜPAlei phopshem chongnyiam manglingjao jomi SHEMBÜPA kü jakpü moila shuoh.

⁷Persia ongpa Cyrus-i shahkung shuohpükei jomi yaong shangpüthü hatü pü mistrithü kü lop shuoh, hatü Sidon hi Tyre ami Lebanon kübü Joppa thahshi cedar pü yung kü bhongei shanhen nangkü hahying hatü mainga shuoh.

⁸Jomphong Jerusalem leipü Kahvangei shem ngoiphei kü vangbong nyi mü lenyang nyipabü kü Shealtielei cheha Zerubbabel, Jozadakei cheha Jeshua hatü büpalei lebü jeihinaüthü, ngongpathü hatü Levi am hatü wüpküp leipü Jerusalemei leipüthü peü dou chongpang. Jomi vangbong kukha hatü ha dok kübü Levi am SHEMBÜPAlei shem vepü dou kü veihen jeteke.

⁹Jeshua mü chehathü hatü shem am, hatü Kadmiel hi chehathü (Hodaviahlei hühihathü) hatü Hanadadlei hapeüthü, hüpeüthü hatü jeihinaüthü Levi am kemei Kahvangei shem vepü dousho kü veiteke.

¹⁰Mechem shem vepüthüi SHEMBÜPAlei phopshem chongnyiam yaong haüpüshang, ngongpathüi jomei owhiai hatü amit mü, hatü Levi ami (Asaphei hapeüthü) cymbal longi vünghen notü laophülei shingei yaongtü Israel ongpa Davidi epükei SHEMBÜPA kü men vihhen yaong.

¹¹Duei-ouei jomi SHEMBÜPA kü menvih shuoh-ei hapakei jangteiyei lokteke: SHEMBÜPAi chongnyiam yaong haüpü nangkü nanglakthü peüi SHEMBÜPA kü menvih shuoh-ei jangteiyei wongmü lenteke: “Mehenangkü büpa meipü nyüke; büpai Israel am kü bampü denden kü nyüke.” Hatü nanglakthü peüi ngeüwong anei SHEMBÜPA kü menvih shuohteke; mehenangkü SHEMBÜPAlei shem chongnyiam yaong haüteke.

¹²Shejao ngongpathü, Levi am hatü phang kü shangjingthü hatü shennyak changthü üami sheleipü shem chongnyiam eepa, longshi shingi mongongi lenjao jomphongi ngeüwong anei thep;

¹³hanangkü nanglakthüi theppü ngeü hi mongongpü ngeü nyi baong nehanaok; mehenangkü nanglakthüi wongmü lenpü nangkü tailu leiyao ha ngeü danteke.