Read Phom Naga EZRA 6 Bible Online

EZRA 6 - Phom Naga bible

EZRA 6

¹Hanangkü Darius ongpai Babylonei tuh-ei nyupü ongthülei büshah lai kü yemei veihen ngeükhüam shuoh.

²Media kahdok Ekbatana chingei laidü hük hapakei nyangtü dang:

³Cyrus ongpai vanglem lempü shongpü bong büpai shahkung yan: Moila shuohhen hatü jakpü moila shuohhen shingvaishi Jerusalem leipü phopshem veyei leituh hatü hapalei chongnyiam yaong haüei pangtuh. Hapa shaopü kü feet 90, ba kü feet 90,

⁴hapalei bham kü yaong laap jem dok kü taukta laap hük shih-ei lingtuh. Hapa kü lop kemei ongpalei mop tuhpü leipü tüktuh.

⁵Shao Kahvangei shem leipü hon hi ngini lingpü douhinangthü mepa Nebukadnezzari Jerusalem moila shem leipü yah-ei Babylonei koei leipa, hathü peü Jerusalem phopshemei yah-ei leituh, hatü hathü Kahvangei shemei küpei tuhtuh.

⁶Hanangkü Euphrates heshü philei nyupü Tattenai governor hatü Shethar-Bozenai hatü jiji mü nyupü am lakchongbüthü, am hatoueipü khaatei nyutuh.

⁷Kahvangei phopshem vepü dou kü am tebaok. Jehoda amei governor hatü Jehoda am behethüi hapa shing kü Kahvangei shem nyemve.

⁸Nyeinya vaishi Jehoda am behethüi hapa Kahvangei shem vepü kü amphongi mehe dükhen ngei hapa shahkung shuohnyeih. Hapa dou yaongei nenyuhen shingvaishi hathüi tükpü lop kemei Euphrates heshüphi kübü leipü lat ongpalei mop tuhpü leipü tüktuh.

⁹Vangsho Kahvang kü jakpü moila shuohhen nangkü mohoh baonghathü, mi baonghathü, nevaijü mithü mepa mepa nahen, shao Jerusalem leipü ngongpathüi wheat aung, hüm, yiü nevaijü mainga mepa mepa yühen, neshai-i nyihjeih jom kü hathü shuohtuh.

¹⁰Shejüang jomi vangsho Kahvang kü yah-aokbenüng moilathü shuohhen hatü jomi ongpalei yangnyu hatü hapeüthü shing phophen.

¹¹Shao nedoh-i ngei ha shahkung shuohnyeih; shennyak üpai hapa ngeükhüam nebanghen, hapa shem leipü pülu hük yah-ei daüpei tüktü hapa kü hümei jühen, hatü jomei shem nyüp tükshing leitükhen.

¹²Üpa shennyaki hapa shahkung nebanghen, hatü Jerusalem leipü phopshem mangtükhenshang, büpa kü khümhen shingvaishi Jerusalem jepü Kahvangi ong nevaijü nanglak büpai yaktükhen. Ngei, Darius-i hapa ngeükhüam shuohnyeih. Hapayü kenhingshi düktuh.

¹³Hahepak kü Euphrates heshü philei nyupü Tattenai governor, Shethar-Bozenai hatü jiji mü sheühteipüthüi Darius ongpai epükei kenhingshi dük.

¹⁴Hanangkü Jehoda am behethüi Haggai thibü hatü Iddolei cheha Zekhariah thibü nyi-i teteivanei epü homei shem vepü dousho daei dai. Jomi Israel Kahvangi epükei hatü Persia am Cyrus, Darius hatü Artaxerxes ongthüi shuohpü shahkung keiha phopshem veyei tem.

¹⁵Hapa phopshemü Darius ongpai vanglem lempü bong vokpabü Adar len nyih jempabü kü temteke.

¹⁶Hapheikü Israel nanglakthü, ngongpathü, Levi am hatü wüpküp leipü shennyakthü peü mongongei hapa Kahvangei shem leüei temteke.

¹⁷Hapa Kahvangei phopshem leühen shingvaishi jomi mohoh chebaong kho hük, mi chebaongha kho nyi, mi chebaong kho ali hatü Israel am peü shingvaishi mang moila shuohhen yum chebaong anpünyi, Israel jat ieyei shing hükbaong shuohteke.

¹⁸Hatü jomi Mosa shahkung kü nyangei nyupükei ngongpathü hatü Levi am laophü laophü khong aimü Jerusalemei Kahvang chongphohen hanteke.

¹⁹Shongpü len nyih anpüalipabü kü wüpküp leipü leipüthüi Hompü Mo moteke.

²⁰Ngongpathü hatü Levi ami jom nyingi daüeilangei nyu, hatü daülangi lei. Levi ami wüpküp leipü leipüthü, jomei jeihinaü ngongpathü hatü jom peü shing Hompü Mo mi jüteke.

²¹Hanangkü wüpküp leipü leipü Israel ami hapa mo hah, hatü SHEMBÜPA, Israel Kahvang kü khümhen shingvaishi lebü jatthülei nedaünelangpü dükhiling kübü yanei nyu, hathüiyao hapa mo hahteke.

²²Nyih nyet thahshi jomi mongongshi Daw Neshihpü Aan Mo hahteke; mehenangkü Israel Kahvangei shem lingei leipü kü Assyria ongpai sheühhen mü büpalei mong yeiyahüpü kü jom mongongpai mateke.