Read Phom Naga EZRA 7 Bible Online

EZRA 7 - Phom Naga bible

EZRA 7

¹Bong longi peihpheikü Persia am Artaxerxes ong vaishingkü shennyak hükei men Ezra shei nyu. Ezralei bülem hapakei: Ezralei chepa Seraiah, Seraiahlei chepa Azariah, Azariahlei chepa Hilkiah,

²Hilkiahlei chepa Shallum, Shallumei chepa Zadok, Zadokei chepa Ahitub,

³Ahitubei chepa Amariah, Amariahlei chepa Azariah, Azariahlei chepa Meraioth,

⁴Meraiothlei chepa Zerahiah, Zerahiahlei chepa Uzzi, Uzzilei chepa Bukki,

⁵Bukkilei chepa Abishua, Abishualei chepa Phinehas, Phinehaslei chepa Eleazar, Eleazarlei chepa Aaron ngongchong nyuteke.

⁶Hapa Ezra Babylon leipü leiteke. Büpayü SHEMBÜPA, Israel Kahvangi shuohpü Mosa Shahkung meishi nyingpü nyuhbü. Büpai yüpü lemphü ongpai shuoh; mehenangkü SHEMBÜPA, büpalei Kahvangei lak büpa shangkü nyu.

⁷Artaxerxes ongpai vanglem lempü bong nyetpabü kü Israel am hanei ngongpathü, Levi am, kesho lokbüthü, pe shaden yompüthü, hatü phopshemei chongphopüthü omtü Jerusalemei lei.

⁸Ongpai ong vaipü bong nyet mü lenyang ngapabü kü jomphong Jerusalemei leiteke.

⁹Shongpü len shongpü nyih kü jom Babylon leipü layaong, hatü lenyang ngapabü shongpü nyih kü Jerusalem ngoi; mehenangkü büpalei Kahvangei phahjipü lak büpa shangkü nyu.

¹⁰Mehenangkü Ezra-i SHEMBÜPAlei shahkung yemhen, hatü ha dükhen, hatü Israel kü hapa shahkung hatü vanglem nyuhhen büpalei mongdang lanei shuoh.

¹¹Hapayü Artaxerxes ongpai ngongpa hatü nyuhbü, Israel am shingvaishi SHEMBÜPAlei shahkung nyingpü shennyak Ezra touei shompü lai:

¹²Artaxerxes, ongthü khongkü ongpai vangsho Kahvangei Shahkung nyuhbü hatü ngongpa Ezra touei selam:

¹³Shaang ngelei ongching kü nyupü Israel am hanei ngongpathü hatü Levi am omshi nüng mü Jerusalemei leihüpüthü leihen aok shei ngei shahkung shuohnyeih.

¹⁴Nüngü ongpa hatü büpalei sheühbü jom nyet homei nüng kü epü Kahvangei Shahkung mekei Judah hatü Jerusalem kü dükteinya ha kü veihen shompeih.

¹⁵Nüngi nüng mü ngei hatü ngelei sheühbüthüi shuohpü hon hi ngin moila Jerusalemei phopshem nyupü Israel Kahvang kü shuohpü koei leite.

¹⁶Shao nüngi Babylon kahmük kübü thaipü hon hi ngin hatü Jerusalemei Kahvang phopshem shingvaishi Israel nanglaki hatü ngongpathüi shuohpü moila koei leite.

¹⁷Nüngi hathü lopi mohohbaongthü, mi chebaongha, hatü mi chebaongthü mü hahying moila, yiü moila shaktuh, hatü Jerusalemei Kahvang phopshem moidü shingei hathü moilatuh.

¹⁸Ammei Kahvangi mongpü aimü aopü hon hi nginthü yah-ei nüng hatü Jehoda am jeihinaüthü kü meipükei düktuh.

¹⁹Nüngei Kahvang phopshemei khümhen shingvaishi nüngi epü douhinangthü peü Jerusalem Kahvang kü yah-eishuoh.

²⁰Phopshem shingvaishi napü dou peü nüngi ongpalei dou jaoshing leipü yahtuh.

²¹Shaang ngei, Artaxerxes ongpai Euphrates heshüphi kü nyupü mop kü khei vaipüthü peü kü ngongpa Ezra, vangsho Kahvangei shahkung nyuhbüi mehe mehe yüphahen meishi hengei shuohhen ngeükhüam shuohnyeih.

²²Ngin dok 3, 400, wheat aung dok 10, 000, yiü liter 2, 000, olive mainga 2, 000, hatü napüshük shuohtuh.

²³Mepa vangsho Kahvangi dükhen etepa, vangsho Kahvangei phopshem shingvaishi kenhingei ha düktuh. Hei nevaijema ongpa hatü hapeüthü kü mongshih peikahen khih.

²⁴Ammi ngongpathü, Levi am, kesho lokbüthü, pe shaden yompüthü, phopshemei chongphopüthü nevaijü Kahvangei phopshemei dou dükpü lebüthü kü lat yahhen, bom thaihen nevaijü lebü shathai meheyao yahhen wong neshiüpih shei nyingtuh.

²⁵Ezra, nüng kü nüngei Kahvangi shuohpü kihikon nüng kü nyupü shangshi Euphrates heshüphi kü nyupü Kahvangei shahkung nyingpü nanglakthü peü kü shahhingi vanglem lemhen shingvaishi vanglem lembüthü hatü shahphenbüthü jetuh, hatü nüngi shahkung nenyingpüthü kao nyuhtuh.

²⁶Üpai nüngei Kahvangei shahkungnyü hatü ongpalei shahkungnyü nebanghen, hingmei jütükhen, changtükhen, mop kemei aetlanghen nevaijü khoklat kü tuhtuh.

²⁷SHEMBÜPA, jenei bühipa Kahvangei men longtuh; mehenangkü büpai hapa keiha Jerusalemei SHEMBÜPAlei shem müknyinshekhangshi linghen ongpalei mongkü eteke,

²⁸hatü büpalei phahji homei ongpa hatü büpa mü sheühteipüthü hatü lakchongbüthüi ngei kü bamei deih. Mehenangkü SHEMBÜPA, ngelei Kahvangei lak ngei shak kü nyu; ngei monglongei deih hatü ngei mü aonghen shingvaishi Israel kü mübüthü thaihüpeih.