Read Phom Naga EZRA 8 Bible Online

EZRA 8 - Phom Naga bible

EZRA 8

¹Hapayü jomei phangdep shangjingthü hatü Artaxerxes ongi vanglem lemshingkü ngei mü Babylonei aongpüthülei bülem hapakei:

²Phinehas phang kü Gershom; Ithamar phang kü Daniel; David phang kü,

³Shekaniahlei cheha Hattush; Parosh phang kü Zekhariah hatü büpa mü jom 150 men nyangei shiüteke;

⁴Pahath-Moab phang kü Zerahiahlei cheha Eliehoenai hatü büpa mü jom 200 nyu;

⁵Zattu phang kü Jahazielei cheha Shekaniah hatü büpa mü jom 300 nyu;

⁶Adin phang kü Jonathanei cheha Ebed, hatü büpa mü jom 50 nyu;

⁷Elam phang kü Athaliahlei cheha Jeshaiah, hatü büpa mü jom 70 nyu;

⁸Shephatiah phang kü Mikhaelei cheha Zebadiah, hatü büpa mü jom 80 nyu;

⁹Joab phang kü Jehielei cheha Obadiah, hatü büpa mü jom 218 nyu;

¹⁰Bani phang kü Josiphiahlei cheha Shelomith, hatü büpa mü jom 160 nyu;

¹¹Bebai phang kü Bebailei cheha Zekhariah hatü büpa mü jom 28 nyu;

¹²Azgad phang kü Hakkatanei cheha Johanan, hatü büpa mü jom 110 nyu;

¹³Adonikam phang kü Eliphelet, Jeuel hatü Shemaiah hatü jomphong mü jom 60 nyu, (jomphongü pheishi leiteke);

¹⁴Bigvai phang kü Uthai hatü Zakkur hatü jiji mü jom 70 nyuteke.

¹⁵Ngei jomphong Ahava yungyenei thaihü, hatü halei baümtap vetü nyih jem nyu. Ngei Levi am hatü nanglakthü kü veishingkü halei Levi am hükao nechongkei.

¹⁶Hanangkü ngei mübüthü Eliezer, Ariel, Shemaiah, Elnathan, Jarib, Elnathan, Nathan, Zekhariah hatü Meshullam, hatü nyingpühingpü shennyak Joiarib hatü Elnathan hathü nyükei,

¹⁷ngei Kasiphia leipü mübü Iddo touei shom. Kahvangei shemei chongphohen shennyak shomphahen nangkü Iddo hatü büpa mü sheühteipü Kasiphia phopshemei chongphobüthü kü mehe ehen ha ngei jom kü eteke.

¹⁸Kahvang phahji homei jomi ham touei Israel ha Levi, Levilei ha Mahli, Mahlilei hühiha Sherebiah longi dou aokpü shennyak mü chehathü jom 18 shomphopeih;

¹⁹shao Hashabiah mü Jeshaiah Merarilei hühihathü mü jomei hapeüthü jom 20 shomteke.

²⁰Ha mü lenei Levi am kü sheühhen shingvaishi David hatü büpalei lakchongbüthüi hayaoha khaatei tuhpü phopshemei chongphopüthü jom 220 shomteke. Hathülei men peü nyangei nyüpeih.

²¹Ham, hamei hapeüthü hatü hamei mophimo kemei yah-ei meishi daihen nangkü hamei Kahvang touei maanpü leiyei shüaeiyunglehen ngei Ahava yungyenei nyükteke.

²²Lemei vepathü kübü yanghen shingvaishi ongpa kü veshan, koyei veshan yahshih shei yühen ngei veüteke; mehenangkü ngei ongpa kü, “Büpa kü hinglempüthü kü hamei Kahvangü phahjinyeih, shejao büpa tuhphongpüthü khüei büpai mongshihnyeih” shei ngei etüktü nyupeih.

²³Hanangkü ham hapa tata kü Kahvang kü shüaeiyungleyei phoppeih hatü büpai phoppü kü jangpeih.

²⁴Hapheikü ngei ngongpa mübüthü jom anpünyi mü Sherebiah, Hashabiah hatü jomei jeihinaüthü jom an khaatei tuhpeih,

²⁵hatü ngei jomphong kü ongpa, büpalei sheühbüthü, lakchongbüthü hatü halei nyupü Israel ami Kahvangei shem nangkü moila shuohpü hon hi ngin hatü lebü douthü dokei shuohpeih.

²⁶Ngei jomphong kü ngin ton 22, ngini lingpü dükhi-üm 100, hayü dok 70, hon dok 3, 400,

²⁷hon shung 20 hayü dok 8.4, hatü hon mü bhei hükkeipü meipü melangnyiam shung nyi dokei shuohpeih.

²⁸Ngei jomphong kü, “Amphong hatü hapa douthü kemei SHEMBÜPA kü daütükpüthü hih. Hon hi ngin kemei SHEMBÜPA, ammei bühipa Kahvang kü moila shuohpüthü khih.

²⁹Ammi hathü Jerusalemei SHEMBÜPAlei shemei doktü ngongpa mübüthü, Levi am hatü Israel phangthü kübü shangjingthü kü mangshuoh thahshi lishi yomhahtuh” shei e.

³⁰Hapheikü ngongpa hatü Levi ami hathü hon hi ngin Jerusalemei Kahvangei shemei doktü koei peijapü yah-ei tuh.

³¹Hapheikü Jerusalemei aonghen shingvaishi shongpü len nyih anpünyipabü kü Ahava yung tuhtü dai; hamei Kahvang ham mü nyu, hatü lemyang kü hamei vepathüi ham kü tappü kübü ham yangpeih.

³²Ham Jerusalemei peiyei halei nyih jem nyupeih.

³³Nyih alipabü kü ham Kahvang phopshemei pei, hatü hon hi ngin hatü dükhi-üm kemei doktü Uriahlei cheha Meremoth ngongpa kü shuoh, hatü büpa mü Phinehaslei cheha Eleazar nyu, hatü jiji mü Levi am, Jeshualei cheha Jozabad hatü Binnuilei cheha Noadiah nyuteke.

³⁴Hathü peüshep ie, hatü dok dokteke, hatü lemphü dokpü nyangei tuhteke.

³⁵Hahepak kü wüpküp leipü leipüthüi Israel Kahvang kü Israel am peü shingvaishi jakpü moila mohohbaong anpünyi, mi chebaongha büalipüanpüvok, mi cheha pejempüanpünyet, hatü mang moila yum chebaong anpünyi; hathü kemei SHEMBÜPA kü jakpü moila shuohteke.

³⁶Jomphongi ongpalei ngeükhüam Euphrates heshüphi kü nyupü governorthü hatü lakchongbüthü kü shuoh, hatü jomiyao nanglak hatü Kahvangei shem dousho kü sheühteke.