Read Phom Naga EZRA 9 Bible Online

EZRA 9 - Phom Naga bible

EZRA 9

¹Hathü dou peü dükpheikü, mübüthü ngei touei peiyei, “Israel nanglakthü mü ngongpa hatü Levi am omshi jom mü chingyow yowpü Kanan, Hit, Perizz, Jebus, Ammon, Moab, Ijip hatü Amor am hatü jomei jiühitnalai dükhiling kübü hayaoha yanei nenyunyu” shei ephüteke.

²Mehenangkü jomi ha amei yiükhathü laophülei nyüha vaihen hatü hapeüthü shing yiük yahteke. Hapa keiha daülangpü li jom kü shonei nyupü nanglakthü mü vukdaiteke, hatü hapa hingnelempü dousho kü mübüthü hatü lakchongbüthüi mütü huluh shuohnyüke shei eteke.

³Ngei ha danei ngelei ashakviha, büm-ow shaaktük hatü ngelei sho hatü jumum bhitüktü mongshangei uoshi nyupeih.

⁴Hahepak kü wüpküp leipü leipüthüi mang thahpü nangkü Israel Kahvangei shah danei kheü, hatü ngei mongshangei om kü moila shuohpü hepak thahshi uoshi nyushingkü ngei shonei thaiküteke.

⁵Mechem om kü moila shuohhen hepak ngoipa, ngei shüaeiyungleyei shaaktükpü ashakviha owtü nyupü kübü pao, hatü SHEMBÜPA, ngelei Kahvang kü lashüh-i shüngei lak haongtü,

⁶“Oh ngelei Kahvang, ngei ahshi-üng veüangke, hatü ngelei dhe nüng kü ngangei veihen neaoknyu; ngelei Kahvang; mehenangkü hamei mangi hamei shangjing lümlangteke, hatü pungpü shaipai vangsho thahshi aongdaiteke.

⁷Hamei bühipathülei nyih kübü shinnyih thahshi hami mang longpü thahteke; hamei mang tata kü ham, hamei ongthü, hamei ngongpathü kemei shinnyihpü keiha kung amei ongthü kü shuoh, yani mah, wüpküpei dai, mop aetlangkem, hatü hai danghüpeih.

⁸Shejao shaang kanja mongkü SHEMBÜPA, hamei Kahvangi phahji huei ham yangei tuh, hatü hapa daülangpü shingei lakbowlayangei tuhpeih, hatü hamei Kahvangi hamei mük kü vangngai shuoh, hatü aa kübü bümei leihüpeih.

⁹Hamü aa nyuhampeih, shejao hamei Kahvangi ham aa laphen kü netuhphong, shejao büpai ham kü Kahvangei shem lingei leihen yangnyu ja shuohhen, bendaipü lingei leihen, hatü ham yanghen Judah hatü Jerusalem kü bham linghen nangkü büpai ham kü bampü Persia ongpa touei vamhüpeih.”

¹⁰Shejao shaang, Oh hamei Kahvang, hapheikü hami mehe ehen? Mehenangkü hami,

¹¹nüng chongphopü thibüthü homei ham kü, “Am peiyei yahhen nyupü kahdokü halei nyupü shennyakthüi jomei jiühitnalai dou homei sheihtükpü nedaünelangpü kahdok khih. Jomi kahdok jung hük kübü jung hük thahshi nedaünelangpai matükteke.

¹²Hanangkü ammi jom mü yiük teyahtei. Am wong koh-ei leihen hatü kahdok kü vampü meipü ammi hahhen, hatü ammei hapeüthü shing denden mükjüp tuhhen shingvaishi jom mü meheyao chingmeivangmei teling, nevaijü mophimo teyemtei.

¹³Ham kü mehe vamtepa hayü amei mang hatü pungpüshaipü tata kü vampeih, shejao hamei Kahvang, nüngi hamei mang neshangi komshi hanghihüpeih, hatü hapakei ham yangei tuhpeih.

¹⁴Hami shao nüngei shahkung manghen je hatü henüngkei jiühitnalai dou dükpü shennyakthü mü yiük yahteihen je? Ham hükao yangei aoei netuhhen mü nüngi ham kü mongneshihhen je?

¹⁵Oh SHEMBÜPA, Israel Kahvang, nüngü shahhing! Shinnyih nüngi ham yangei tuhteke. Hamei mang nüng kü lahnyüpeih; ham nüng touei peihen jiüpü neshiüpih” shei phopei e.