Read Phom Naga NEHEMIAH 13 Bible Online

NEHEMIAH 13 - Phom Naga bible

NEHEMIAH 13

¹Hapa nyih nanglakthüi danshi Mosa Shahkung wongmü ieshingkü halei Ammon am nevaijü Moab am Kahvangei nanglak mü omnüng neaok shei nyangei nyuteke.

²Mehenangkü jomi Ijip leipü Israel am leishingkü hahying yungying neshuoh, shejao Israel am kü thaüvaühen lop shuohtü Balaam shak. Shejao hamei Kahvangi hapa thaüvaü moihiman leihüpeih.

³Mechem nanglakthüi hapa shahkung danpa, jomi kung am peü khaattükkem.

⁴Sheleiyü Eliashib ngongpai Kahvang shemei dou jaoshing kü veiyei nyu. Büpayü Tobiah mü meiteishi nyu.

⁵Büpai halei Levi am, kesho lokbüthü, shaden yombüthü hatü ngongpathülei moila, hahying moila, ayingshü, phopshem leipü douthü, hahying, ankhong, yiüja, mainga tuhpü dungnuk Tobiah kü shuoh.

⁶Hathü shahhidou vamshingkü ngei Jerusalemei nyu, mehenangkü Babylonei Artaxerxes ongpai vanglem lempü bong hapüanpünyi kü shah-om aokhen ngei ongpa touei leidaitü nyupeih. Hepak kansho hük pheikü ngei büpa leipü mongpü yahtü,

⁷Jerusalemei nyokei lei. Haleiang Eliashibi Kahvangei shemei Tobiah kü dung hanshuohpü hapa mang dou ngei danpeih.

⁸Hanangkü ngei longi mongshih-ei shemongeipü Tobiahlei dou kemei yaktükpeih.

⁹Ngei jom kü ha dung daütüktü Kahvangei shem leipü douhinang, hahying moila hatü ayingshü tuhtuh shei ngeükhüam shuohpeih.

¹⁰Levi am kao jomei hean neshuohpü nangkü Levi am, kesho lokbüthü kemei laophü laophülei kah yemei Jerusalem leipü leidaipeih shei danpeih.

¹¹Hanangkü ngei lakchongbüthü kü, “Mehekei Kahvang phopshem vüngtükpa?” shei lohshuohpeih. Hapheikü ngei jom peü nyükei thaitü laophü laophü kü hanpü hean kü tuhphongpeih.

¹²Hapheikü mon Judah ami hahying, ankhong, yiüja hatü mainga moila koei jaoshingei peipeih.

¹³Ngei ngongpa Shelemiah, nyangbü Zadok, hatü Levi am hük meni Pedaiah hapa mop jaoshing kü veihen tuhphongpeih, hatü ha kü sheühteihen Zakkurlei cheha, Mattaniahlei chehü Hanan jeiyei tuhpeih; mehenangkü hathüyü shahhing epüthü vaipü nangkü jeihinaüthü kü hahying hanhen dousho shuohpeih.

¹⁴Ngei deih-ei dangtuh, Oh ngelei Kahvang, hatü ngelei Kahvangei shem hatü halei khümhen shingvaishi mehe ngei lanei shuoh-ei düktepa, ha nüngi dhitei teyaktük.

¹⁵Hathü nyih kü ngei Judahlei Sabbath nyih nyalingngupai ngümpü, hah shetei leitü ha mü gadu kü kohühen yiü, nyalingngupai, adhajük, hatü lebü hanggo peü kohütü Jerusalemei leipü eetepih. Sabbath nyih hahying yupü khüei shahvüng shuohtepih.

¹⁶Jerusalemei nyupü Tyre ami Sabbath nyih nyah hatü lebü douhinang koei leiyei Judah am kü yushuohhamteke.

¹⁷Ngei Judah behethü kü loh-ei, “Sabbath nyih mangei mehe mang dou ammi düknya?

¹⁸Ambü ampai henüng dou dükpü tata kü jen kü hatü hapa chingnyü kü hathü shanghah peihüpü nevaipü je? Shaang ammi Sabbath nyih mangpü homei nyeinya Israel am kü Kahvangi mongshih vamhünyu khih” shei ngei jom kü eteke.

¹⁹Sabbath nyihshong mechem Jerusalem peshaden mükmangei peihen, Sabbath nyih mangpeih thahshi Jerusalem peshaden ne-api küpshi tuhtuh shei ngei ngeükhüam shuohteke, hatü Sabbath nyih mepa hanggo-ao koei neshühen; ha kü veihen ngelei chongphobüthü hanei peshadenei tuhteke.

²⁰Chem nyipa thahshi bhei leihpüthü Jerusalem pedaüei yanüng paümteke.

²¹Shejao jomphong kü shahvüng shuoh-ei, “Mehekei amphong yanüng penyüsha daüei paümnya? Am ne-yei hapakei dükjema ngei lak shihhen” shei eshuohteke. Hapa nyih mü leitü jom Sabbath nyih nepei,

²²hatü Sabbath nyih daülangi tuhhen nangkü Levi am jom nyingi daütüktü shaden yomhen ngeükhüam shuoh. Hayao deih-ei dangtuh, Oh ngelei Kahvang, hatü nüngi bampü shangshi ngei yangei tuhshih.

²³Hathü nyih kü ngei Jehoda am Ashdod, Ammon, Moab am mü shem yempü eetepih,

²⁴hatü jomei hapeüthü hükkeishing Ashdod shah nevaijü lebü jatthülei shah eteke, shejao Judah shah nemani eepeih.

²⁵Ngei jom kü lohshuohpeih, hatü thaüvaüpeih hatü hanei kü üptü shonyü kü shishuohpeih, hatü Kahvangei men kü hapakei lah-ei ehüpeih: “Hamei yiükhathü jomei hapeüthü kü doi nedeishuohhen, hatü jomei yiükhila ammei hapeüthü shing yiük neyahhen.

²⁶Kungyiük yahpü homei Solomon ongpai mang thahpeih. Jatthü khongkü büpa keipü ong nenyuham, hatü büpa kü Kahvangi longi bamei Israel kü büpa ong vaihüpeih, shejao kungyiüki büpa mang thahhüpeih.

²⁷Kungyiük yahpai hamphongao Kahvang shah nebangi am pheikü mühen je?”

²⁸Joiadayü Eliashib ngongchongei hapeü nyuteke, shejao büpalei hapeü hüki Beth-Horon leipü Sanballatlei yiükha yahteke. Hanangkü ngei Joiada Jerusalem leipü changtükpeih.

²⁹Oh Kahvang, hathüi ngongpalei dousho hatü ngongpathü hatü Levi am mü vangteipü sheihtükpü deih-ei dangtuh.

³⁰Hapakei ngei hathü kung amei nedaünelang peü kübü daühü, hatü ngongpathü hatü Levi am peü laophü laophülei dousho kü yaonghüpeih;

³¹hatü ngei pü moila hatü shongpü betjük moila koei peihen hepak itei shuohpeih. Bampai ngei deih-ei dangtuh, Oh ngelei Kahvang.