Read Phom Naga NEHEMIAH 6 Bible Online

NEHEMIAH 6 - Phom Naga bible

NEHEMIAH 6

¹Mechem Sanballat, Tobiah, Arab am Geshem hatü lebü vepathüi ngei mütü shingkong neshiüi bham lingei temteke shei danpahahepak thahshi shaküp manglingi nyujao,

²Sanballat hatü Geshem nyi-i, “Ono Kahji leipü chingthü hükei jen pongteishah” shei ngei kü shah shom. Shejao jijinyi-i ngei kü nemei-i dükhen deihpü shiüteke.

³Hanangkü ngei phongmokbüthü shomei jiji kü, “Ngei dou longpü düknyeih; ngei neyiüküaokpih. Anji touei yiühen tata kü ngei mehekei dou yakphonghen?” shei eteke.

⁴Jijinyi-i hapakei alipa thahshi shah shom, hatü ngeiyao jiji kü hapakei alipa thahshi shanlei.

⁵Hapa keiha ngapabü Sanballati büpalei chongphobü hük laiyao apeitüktü shomteke.

⁶Ha lai kü, “Jatthü peüi hatü Geshemiyao hapakei enyükenüng hatü Jehoda amü khüei yaonghen deihnyu khih; hanangkü am bham lingei leinyu khih, hatü hapa shahjang aimeyü nüngü ong vaihünyu khih.

⁷‘Judah kü ong hük nyüpeih!’ shei teteivanei ehühen shingvaishi nüngi Jerusalemei thibüthü jeyei tuh-ei nyüke. Hanangkü danpü shah aimü ongpa kü lushuohhen hih. Hanangkü ha nang chemi eteinüng yiükei” shei nyangteke.

⁸Hahepak kü ngei büpa kü, “Nüngi epü keipü dou nedükangpih; nüngi deihtü deihtü lingei enyu khih” shei lainyok shomteke.

⁹Mehenangkü jomphongi hapa dou nedüki dohhühen shingvaishi nyemshaopü nyuteke. “Shejao shaang, Oh Kahvang, ngelei lak wong kohhütuh” shei ngei phop.

¹⁰Nyih hük Mehetabelei chehü, Delaiahlei cheha Shemaiah, üpa düngei shemei mon dhetshi nyu, ngei büpalei shemei heih; büpai ngei kü, “Jiphen phopshemei heih-ei Daülangpü Shingei shüei shanyong lattü nyudaishah; mehenangkü nüng jününg hathü peikünyüke; nüng jününg hathü yanüng peikahen khih” shei e.

¹¹Shejao ngei, “Ngei shenshenpü shennyak nyemei dainyu je? Ngei shükpü shennyak yanghen nangkü phopshemei johen je? Ngei hapakei nedaipih!” shei eteke.

¹²Ngei meishi deih-ei veijü Kahvangi büpa neshom, shejao Sanballat hatü Tobiah nyi-i büpa shaklangpü nangkü ngei khüei eteke.

¹³Büpai epükei dükpai ngei mang thahhühen shingvaishi ngei kü nyem shaoei nyemhühen, hatü ngei kü yaüeilungei menten shuohhen mükhong kü büpayü shaklangtü nyuteke.

¹⁴Oh ngelei Kahvang, Tobiah hatü Sanballat nyi-i dükpü dou shangshi, hatü thibülanyü Noadiah hatü ngei kü nyem shaopü thibüthü deih-ei dangtuh.

¹⁵Hanangkü Elul len nyih hapüngapabü kü nyih pinyipüan mongkü bham lingei temteke.

¹⁶Mechem hamei vepathü peüi ha danpa, hatü ham shonpü jatthü longi nyem hatü mong maandai; mehenangkü hapa dou-ü hamei Kahvangi sheüh-ei temaokpü khih shei nying.

¹⁷Nyeinya vaishi hathü nyih kü Judah am behethüi Tobiah kü lai longi shom, hatü Tobiah leipao lainyok dangei nyuhamteke.

¹⁸Mehenangkü Judah am longi büpa philei nyu; mehenangkü büpalei nyühalei chepayü Arahlei cheha Shekaniah nyu, hatü cheha Jehohanani Berekhiahlei cheha Meshullamei yiükha mü shem yemteke.

¹⁹Nanglakthüi ngei touei Tobiah-i dükpü doumei jung ehamteke, hatü ngei epü shah peü büpa kü ejahamteke, hatü büpai ngei kü nyem shaoei lai nedoh-i shom.