Read Phom Naga NEHEMIAH 8 Bible Online

NEHEMIAH 8 - Phom Naga bible

NEHEMIAH 8

¹Len nyetpabü kü Israel ami laophü laophülei jilalei nyu. Nanglakthü peü chemi Yunglok Shaden chingshelei thai. Jomphongi nyangbü Ezra kü Israel nanglakthü shingvaishi SHEMBÜPAi shuohpü Mosa Shahkung Laitap ngaikei shei e.

²Hanangkü len nyetpabü shongpü nyih kü ngongpa Ezra-i danhen aokpü nyüha baha thaipü touei Shahkungnyü yah-ei ngai.

³Danhen aokpü nyüha bahathü toumü Yunglok Shaden touei chingshe philei meetü büpai ha dhom mebü haümhahphei thahshi ie, hatü peüi mong shuoh-ei hapa Shahkung Lai bangteke.

⁴Hakeipü thaihiyu shing lingpü dünyü shangei nyangbü Ezra aongei yaong. Büpa mü lakdah philei Mattithiah, Shema, Anaiah, Uriah, Hilkiah, hatü laknyong philei Pedaiah, Mishael, Malkijah, Hashum, Hashbaddanah, Zekhariah hatü Meshullam hathü yaong.

⁵Ezra-i nanglakthü peüi eeshi lai ap; mehenangkü nanglakthü peü mü büpa shaoshi yaongshi shiüteke, hatü mechem büpa lai appa, nanglakthü peü yaong.

⁶Hapheikü Ezra-i, “SHEMBÜPA, longpü Kahvang men longtuh” shei e, hatü nanglak peüi, “Amen!, Amen!” shei jomei lak haongtü jangei e. Hapheikü jomei dhe kahdok philei aümei shatü SHEMBÜPA kü khüm.

⁷Shao Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah, Levi am hathü nanglakthü laophülei shingei yaongshi nyushi Kahvangei shahkung nanglakthü kü nyinghühen nyuh.

⁸Hanangkü jomi Kahvangei shahkung lai kübü nanglakthüi danhen mü nih-ei lekei nyuh.

⁹Hapheikü Nehemiah governor, ngongpa hatü nyangbü Ezra, Levi am shahkung nyuhpüthüi nanglakthü kü, “Shinnyih-ü SHEMBÜPA, ammei Kahvang touei daülangpü nyih; am tethep” shei e. Mehenangkü nanglakthüi shahkungi mehe enya, ha danei longi thepei nyu.

¹⁰Hapheikü Nehemiah-i hathü kü, “Shemei leituh, hatü meipü hahying hahtuh; vüngnyangpü yiü yingtuh. Ammi nükhiyiü neshiüpü am kao hanei shuohtuh. Shinnyih-ü SHEMBÜPA kü daülangpü nyih; hanangkü mongteshang, SHEMBÜPAi shuohpü mongongü ammei wong” shei eteke.

¹¹Hanangkü Levi ami nanglakthü kü, “Nendaituh; mehenangkü daülangpü nyih am mongteshang” shei eshi nenhü.

¹²Hanangkü nanglakthü laophülei shemei leiyei hah hatü ying hatü ha mih kao hanei shuoh; mehenangkü jom kü ieyei hupü shah jomi nyingteke.

¹³Nyihphei phang kü shangjingthü mü ngongpathü hatü Levi am peü chemi Ezra touei shahkung leipü shahthü yemhen peiteke.

¹⁴Len nyetpabü mo kü Israel am kemei ashakshemei nyuhen vongbong shei SHEMBÜPAi Mosa homei epü shahkungei nyangei dangteke,

¹⁵hatü jomi jomei jilathü hatü Jerusalem kü hapakei nyangtü baongeiyaüei ehen; “Shangchingthülei aongtuh hatü awkaongpü, olive pükao, palm pü, myrtle pü hatü lebü phenlak kohpü püthü yah-ei tapshaü chantuh” shei e.

¹⁶Hanangkü nanglakthü daiyei hathü leiyei laophülei shem adokei, chingshelei, phopshem chingshelei, Yunglok Shaden hatü Ephraim Shaden chingshelei tapshaü veteke.

¹⁷Wüpküp leipü leipüthü peüi tapshaü vetü halei nyu; hapayü Nunei cheha Jeshualei nyih kübü Israel ami ha nedük. Halei mongongpü longpü nyu.

¹⁸Nyihjeih shongpü nyih kübü dohpü nyih thahshi büpai Kahvangei shahkungnyü lai kübü ieteke. Jomphongi nyih nyet thahshi moteke hatü nyih shetpabü kü shahkungi mongpükei thaipüyupü nyu.