Read Phom Naga NEHEMIAH 9 Bible Online

NEHEMIAH 9 - Phom Naga bible

NEHEMIAH 9

¹Hapa len nyih hapüalipabü kü Israel nanglakthü peü thaiyei dhoila ashak ümtü kahdok nyiotü shüaeiyungleteke.

²Israel li kübü vampüthü peü kung shennyak kübü yanei hayaoha yaongtü bühipai thahpü mang lah-ei phop.

³Jomi jomei shingei yaongtü ghonda jem hükshing SHEMBÜPA, jomei Kahvangei shahkung lai kübü ie, hatü ghonda jem hükshing yah-ei SHEMBÜPA, jomei Kahvang kü mang lah, hatü khüm.

⁴Hapheikü Jeshua, Bani, Kadmiel, Shebaniah, Bunni, Sherebiah, Bani hatü Kenani hathüi Levi amei dünyü shangei aongtü SHEMBÜPA, jomei Kahvang kü ngeüwong anei lenteke.

⁵Hahepak kü Levi am, Jeshua, Kadmiel, Bani, Hashabneiah, Sherebiah, Hodiah, Shebaniah hatü Pethahiah hathüi, “Yaongtuh hatü nedohneteni SHEMBÜPA, ammei Kahvangei men longtuh. Nüngei müknyinshekhang men moihimantuh, hatü moihiman menvih peü shak kü longei anshihtuh” shei e.

⁶Nüng monha SHEMBÜPA, nüngi vangshothü hatü vangsho lithilenthü, kahdoknyü hatü ha shak kü nyupü peü, yungching hatü halei nyupü peü lingpeih. Nüngi hathü peü kü yangnyu shuoh, hatü vangshothüi nüng kü khümnyüke.

⁷Nüngü Babylon kahdok Ur leipü Abram jetü müei deiyei Abraham shei men jeipü SHEMBÜPA Kahvang.

⁸Büpalei mongdangi nüng kü hinglempü nüngi nying, hatü nüngi büpalei hühihathü kü Kanan, Hit, Amor, Perizz, Jebus hatü Girgash amei kahdok shuohhen büpa mü vangpüshuwpü lingteke. Nüngi lahtükpü lakshing tuh; mehenangkü nüngü shahhing nyüke.

⁹Hamei bühipa Ijiplei shangpongpü nüngi ee, hatü jomi Hakla Yungchingei theppüyoungpü nüngi dan.

¹⁰Nüngi yashanpü nyangeihepü, thamapü douthü Pharaoh, büpalei lakchongbüthü hatü jomei nanglakthü khüei shom; mehenangkü Ijip ami meshük changmeiyei hathü kü nemei-i dükpa, ha nüngi nying. Nüngi laophü shing menmei linghah, ha shinnyih thahshi nyüke.

¹¹Nüngi jom shekü yungchingao hantük, hatü jom kahvan kü kamei peihhütük, shejao jom kü changpüthü yungching ilangmong kü yaong hüngpükei jom hüngtük.

¹²Nyihnüng nüngi jom phum shemnyüi mü, hatü yanüng nüngi jom dailem kü aw shemnyü shuoh.

¹³Nüng vangsho leipü Sinai Kahshangei yiü, hatü vangsho leipü etei, hatü jom kü jiüpü shahkung hatü meipü vanglem shuoh;

¹⁴hatü nüngi nüngei daülangpü Sabbath jom kü shuoh, hatü nüngei chongphobü Mosa homei jom kü shahkung hatü vanglem shuoh.

¹⁵Jom aeipü kü nüngi vangsho leipü hahying shuoh, hatü jom yung lepü kü yaong leipü yung shuoh, hatü nüngi jom kü shuohhen shei lahpü kahdok yahnüng daihen eteke.

¹⁶Shejao jom, hamei bühipathüi changmei, hatü jomei ngaümvang haüei nüngei shahkungthü nebang;

¹⁷jomi ven nedan, hatü jom touei yashanpü douthü dükpü peü betük, shejao jomei ngaümvang vaanei aa laphen kü Ijiplei nyokei leihen tem. Shejao nüngü mang tükpü, phahji yahyangpü, mongshih youngmü vampü, hatü bampü kü changshishashi nyupü Kahvang, hatü nüngi jom netuhphong.

¹⁸Mechem jomi jom shing mohoh cheha lajei lingpa, “Hapayü am Ijip leipü müei leipü ammei Kahvang” shei eyei nüng kü neienelem,

¹⁹shejao nüngei phahji longpai nüngei hapeüthü jahpanei netuhphong; nyihnüng jom daipü lem kü müpü phum shemnyü nedohdai, nevaijü yanüng jom dailem kü khangpü aw shemnyü neyahlang.

²⁰Nüngi jom kü nyuhhen nüngei laangha meipü shuoh, hatü jomei ju kübü manna neshonglang, hatü jom yung lepü kü yung shuoh.

²¹Bong pinyi thahshi jahpanei longteijao jom mepaiyao netao; jomei ashakviha chang neleidai, nevaijü la nepouk.

²²Nüngi jom kü ongchingthü hatü jatthü neühen shuoh, hatü jomei viong junghijang thahshi shuoh; jomi Heshbon am Sihon ongpa hatü Bashan am Og ongpalei kahdok kaamei yah.

²³Nüngi jomei lihilathü vangsho lithathü kei dahü, hatü nüngi chebü chepa kü shuohhen epü kahdokei peiyei kaamei yahhü.

²⁴Hanangkü jom peiyei kahdok kaamei yah, hatü nüngi jom touei hapa kahdok kü nyupü Kanan am neühütük; nüngi jom kü Kanan am, haleipü ong, hatü nanglakthü peü jomi mongpükei noteihen lanei shuohtük.

²⁵Jomi penyü showtükpü chingnyü hatü kahcheü kohpü kahdok yahhü, nüngi doumeinangmei-i maei nyupü shemthü, yungkuk meishi shotükpü, nyalingngupai kah, olive kah hatü betjük püthü changshi nyupü kaamei yahhü. Jomi moh-ei hahtü nitei nüng meipü nangkü jom mongong.

²⁶Shejao jomi ven nedani nüng khüei yaong; jomi nüngei shahkung ngaümpheilei tuhphong. Jomi nüng touei mong lepei leihen shahvüng shuohpü thibüthü jütük; jomi nüng kü ne-ienelemi nyembenüng mang thah.

²⁷Hanangkü nüngi jom kü nyemshüvei shei jomei vepathü kü shuoh. Shejao mechem jom shüveipü ponghahpa, jomi nüng kü lenei nyük. Vangsho leipü nüngi jom nyükpü dan, hatü nüngi phahjipai vepathülei lak kübü yanghen yangbü hük shuoh.

²⁸Shejao jom nyiushemmei kü nyujü shao jomi nüng touei mang thah. Hahepak kü jom shak kü vanglem lemhühen nüngi jom vepathü kü shuoh, hatü mechem jomi nüng kü nyükhen, nüngi vangsho leipü dan, hatü nüngi phahjipai hepak ieshi jom yangteke.

²⁹Nüngi jom kü nüngei shahkung banghen shahvüng shuoh, shejao jom changmeiyei nüngei shahkung nebang. Nüngei shahkung banglang meyü yemmü nyuhen vaipü yah-ei jomi ha khüei mang thah. Mongdang vaanei ngaümvang haüei jomi nüng toueipü lüdai hatü epü shah neyah.

³⁰Bong longi nüngi jom mü nenteiaokei heihpeih. Nüngei laanghai nüngei thibüthü homei jom kü shahvüng shuoh, shejao jomi ha nebang. Hanangkü nüngi jom lebü jatthülei lak kü shuohtükpeih.

³¹Shejao nüngei phahji yahyang homei nüngi jom nedohtük nevaijü neyakphong; mehenangkü nüngü phahji yahyangpü Kahvang.

³²Hanangkü shaang, Oh hamei Kahvang, longpü wong kohpü hatü nyempühanpü Kahvang, nüngi bampü, vangpüshuwpü jiüshi düknyeih; ham kü, hamei ongthü, ngongpathü, thibüthü, bühipathü hatü nanglakthü kü Assyria am ongthülei hepak kübü shinnyih thahshi peipü shanghahthü kü nüngi shangkhah-i tedeih.

³³Ham kü dhaümpü peü kü nüngü shahhing nyuhampeih, nüngi jiüshi dükpeih, shejao hami nejiüi dükpeih.

³⁴Hamei ongthü, mübüthü, ngongpathü, hatü bühipathüi nüngei shahkung kü nemü; nüngi jom kü shuohpü shahkung nevaijü shahvüng kü jomi mong neshuoh.

³⁵Jomi nüngei ongching kü nüngi shuohpü shingmeiphangma kü kahcheü kohpü kahdok kü mei dangei mongongshi nyushing kao jomi nüng chongnepho nevaijü jomei mang lem kübü mong nelep.

³⁶Shejao veituh, shinnyih-ü hamü aa khih. Nüngi obü opa kü hapa kahdok kü vampü bejükvungjük hatü lebü doumei kemei hahtuh shei shuohpü kahdok kü hamü aa khih.

³⁷Hamei mang nangkü, halei vampü mop kemei ham shak kü vanglem lempü ongpalei lakei thahdainyu khih; jomi hamei büm, yemhimak shak kü jomi mongpükei nonyüke. Hamü longi shanghah kü nyüpeih.

³⁸Hathü peü eetü hami nyangei haütü vangpüshuwpü hük lingpeih, hatü ha shangkü hamei mübüthü Levi am hatü ngongpathüi ha kü jomei füoshang shingteke.