Read Phom Naga ESTHER 1 Bible Online

ESTHER 1 - Phom Naga bible

ESTHER 1

¹Hapayü Xerxes ongpalei nyih kü vamteke; hapa Xerxes-i kahmük 127 kü India kübü Ethiopia thahshi vanglem lem.

²Hahepak kü Xerxes ongpai Susa chingnyü kü laophülei ong uoshing kü uotü vanglem lem,

³hatü büpa vanglem lempü bong jempabü kü büpai laophülei longhivang hatü lakchongbüthü kü mo longpü hük ühteke. Persia hatü Media kübü veshan mübüthü, ongthü hatü kahmükthü kübü longhivang peü om.

⁴Nyih 180 thahshi büpai laophülei ongching kübü mophimo, hatü büpalei müknyinshekhang dhemeilaüma huteke.

⁵Mechem hathü nyih peihpüshang, hapa Susa chingnyü kü nyupü nanglak longpü maanpü peü kü ongpalei ongshem leipü pemongei hepak nyih nyet thahshi ongpai mo longpü hük ühteke.

⁶Hapa pemongei nyemin ashak shola hatü thüngla sheüshi shiüteke; ha kü nyemin vü shola-i ngini lingpü nyiamkam kü shentü yaong shemnyü kü shenshi ow ling. Ow kohpü yaong, yaong shola, yüknyü khongkü peü mü meipü hatü lebü bhei wongpü yaongi jinei lingtükpü shangkü hon hatü ngini lingpü lüngthü shiüteke.

⁷Yiü kemei hon pati lem laolao kü ying, hatü ongpai angpü shangshi yiü bhueileyei yingteke.

⁸Yiü yingpü heshap neshiü; mehenangkü ongpai büpalei chongphobüthü kü nanglaki aokpükei yinghütuh shei ngeükhüam shuoh.

⁹Hahepak kü Vashti onglanyüiyao Xerxes ongpalei ongshemei nyühathü kü mo longpü üh.

¹⁰Nyih nyetpabü kü Xerxes ongpai laang mongmeiyei deih, hatü büpai büpa chongphopü ban tüktükpü shennyakthü jom nyet Mehuman, Biztha, Harbona, Bigtha, Abagtha, Zethar hatü Karkas hathü kü ngeükhüam shuoh-ei,

¹¹Vashti onglanyü kü ong ow owtü nanglakthü hatü longhivangthü kü pinnyü nela meipü huhen büpa touei müei ankei shei e; mehenangkü pinnyü veihen longi meishi shiüteke.

¹²Shejao mechem chongphobüthüi ongpalei ha shah eshuohpa, Vashti onglanyüi hapakei huhen nemong. Hahepak kü ongpa longi mongshih.

¹³Shahkungnyü nyingpüthü kü ongpai phehen vaipü nangkü,

¹⁴büpai büpa phang kübüthü kü mehe dükhen shei phehen nangkü Karshena, Shethar, Admatha, Tarshish, Meres, Marsena hatü Memukan, jomphong jom nyet Persia hatü Media kü ongpa thahei peiyei aokpüthü hatü ongching kü peü mü longpüthü kü nyükteke.

¹⁵“Shahkungnyü kü nyupü aimü Vashti onglanyü kü mehe dükhenang?” shei büpai phe. Mehenangkü pinnyüi ban tüktükpü shennyakthü homei Xerxes ongpai epü shah nebangang.

¹⁶Hahepak kü Memukani ongpa hatü longhivangthü touei, “Vashti onglanyüi nejiüi dükteke; pinnyüi ongpa toumü mon nevai, shejao Xerxes ongpalei ongching kü nyupü longhivang hatü nanglakthü khüei ha dükpeih.

¹⁷Mehe onglanyüi dükpa, ha jung nyühathü peüi nyingdaihen, hatü jomi jomei bahathü kü naamhen, hatü jomi, ‘Xerxes ongpai Vashti onglanyü kü ngei touei peikei shei epü kü dangkao pinnyüi nepeipeih’ shei ehen.

¹⁸Shinnyih mü pangei Persia hatü Media kü nyupü nyümeithüi onglanyüi mehe dük, ha danei ongpalei longhivangthü kao nyühathüi ha aihük mü dükshasha khih. Hapakei dhüm neshuohpü hatü ne-ienelempü nedoh-i daikahen khih.

¹⁹Hanangkü ongpai ha mongei deihjema, ongpai büpalei shahyan hük neyeiyahen mü Persia hatü Media amei shahkung kü nyangtü sheyü Vashtiyü Xerxes ongpa touei hajük kü nepeihen, hatü ongpai pinnyü mao meipü hanei am kü hapa ongla hean nyemshuohtük.

²⁰Hanangkü mechem ongpai lingpü shahkungnyü ongching bahiyang kemei kü baonghenshang, nyühathü peüi laophülei baha longpü maanpü peü kü dhüm shuohkahen” shei eteke.

²¹Hapa shah kü ongpa hatü longhivang peüi meiteke shei deih, hatü Memukani epükei ongpai dük.

²²Büpai laophülei ongching kahmük peü kü jomi nyangteipü hatü shahlem mü baha peüi laophülei shem kü büpai vanglem lemhen shei lai nyangei shomteke.