Read Phom Naga ESTHER 3 Bible Online

ESTHER 3 - Phom Naga bible

ESTHER 3

¹Hathü dou vampheikü Xerxes ongpai Agag am Hammedathalei cheha Haman büpa mü nyupü lakchongbüthü peü shak kü shaopü uoshing kü uohü.

²Ongpalei pe shadenei nyupü lakchongbüthü peü kü Haman touei aümei shaei khümhen hatü büpa kü dhüm shuohhen ongpai shahyan shuoh. Shejao Mordekai-i büpa touei aümei shatü khümei büpa kü dhüm neshuoh.

³Hahepak kü ongpalei pe shadenei yompü lakchongbüthüi Mordekai kü, “Nüngi mehekei ongpalei shah nebangnya?” shei e.

⁴Jomi büpa kü nyihjeih eshuohjao jomi epü kü büpai nebang; Mordekai-i hathü kü büpayü Jehoda am hih shei eshi ongpa kü aümei nekhümpü nangkü hei-üng veishi nyuaoküla shei jomphongi Haman kü eteke.

⁵Mordekai-i büpa kü aümei nekhüm hatü dhüm neshuohnyu shei mechem büpai nyingpa, Haman mongshihteke.

⁶Mordekai üam vaipüshang ha nyingtü Mordekai mon jühen nangjei Hamani Xerxeslei ongching kü nyupü Jehoda am peü jükemhen küpjan temteke.

⁷Xerxes-i vanglem lempü bong anpünyipabü shongpü Nisan len kü mepa nyih hatü mepa len kü jüei chongpanghen nyinghen nangkü phongyomteke, hatü len anpünyipabü Adar len nyih anpüjempabü kü chongpanghen phong vamteke.

⁸Hahepak kü Hamani Xerxes ongpa kü, “Nüngei ongching phangkü haishi, hatü lebü nanglak khongmü hayaoha nanglak khong hük nyüke; lebü nanglakthü mü jomei shahkung hayaoha, hatü jomi ongpalei shahkung nebangnyu; hanangkü ongpai henüng kü hei-üng netuhhen vaipü khih.

⁹Ongpai ha meiangke shei deihjema, jom jühen shahkung hük yankütuh. Nüngi ha dükjema ongpalei mop tuhshingei ngei ngin dok 340, 000 ongpai vanglem lempü kü noteihen ngei tuh-aokhen hih” shei e.

¹⁰Hanangkü ongpai büpalei anguti hukei Agag am Hammedathalei cheha Haman, Jehoda amei vepa kü shuoh.

¹¹Ongpai Haman kü, “Lop hatü nanglak kemei nüng kü shuohnyeih, nüng kü meipükei jom kü dükeishuoh” shei e.

¹²Hapheikü shongpü len nyih anpüjempabü kü ongpalei laknyangbüthü nyük hatü jomphongi ongching phangkü noteipü shahlem laolao, nyangpü vanglem laolao aimü lepei Hamani epükei nyang, hatü vanglem lembüthü, governorthü, hatü lakchongbüthü peü kü shom. Hapayü Xerxes ongpalei men kü nyang hatü ha kü büpalei füoshang shingteke.

¹³Phongmokbüthüi hathü lai kotü ongching peü lemei dai. Hapa lai kü len anpünyipabü Adar len nyih anpüjempabü kü nyih hük phangkü Jehoda am baha hashih, nyüha hashih kemei jütuh hatü jomei mophimo kemei yahtuh shei nyang.

¹⁴Hapa nyihhihe kü jatli peüi temei nyuhen shingvaishi ha shahyan lai hükbaong ongching peü lemei yanteke.

¹⁵Ongpalei ngeükhüam shülangpü nyupü nangkü phongmokbüthüi lomi daiyei Susa chingnyülei yanteke. Ongpa hi Haman nyi yiü yinghen uoshi nyu, shejao Susa chingnyü-ü üathamaei nyu.