Read Phom Naga ESTHER 4 Bible Online

ESTHER 4 - Phom Naga bible

ESTHER 4

¹Mechem Mordekai-i hathü dou dükpü jung danpa, büpai laophülei ashak shaaktük, hatü dhoila ashak üm, depla nyiotü shahyaki wongmü thepyaki chingnyülei dai.

²Shejao büpai ongpalei pe shaden thahshi mon heih; mehenangkü dhoila ashak ümtü üpaiyao mongei shühen nehanham.

³Ongpai yanpü shahkung dangpü chingnyü peülei Jehoda am theppüyoungpü hatü shüaeiyunglepai maei jom longshishing dhoila ashak ümtü lemshi nyuteke.

⁴Mechem Esther chongphopü nelathü hatü ban tüktükpü shennyakthüi pinnyü kü peiyei ha jung ejapa, pinnyü longi mongshang. Pinnyüi büpa kü dhoila ashak nangjei lebü ashakviha hanei shom shejao büpai ha neyah.

⁵Hahepak kü Esther-i pinnyü kü junghen jepü ongpalei chongphobü ban tüktükpü shennyak Hathakh kü Mordekai mepa kü hatü mehekei mongshangnya, ha phehen büpa kü shah shuoh.

⁶Hathakh-i chingshelei vamei ongshemei shüpü pe shadenei Mordekai touei heih,

⁷hatü Mordekai-i büpa kü mehe vampa, ha peü e, hatü Jehoda am jütü ongpalei mop tuhshingei lop meshük Hamani leiyei tuhhen ha jung eshuohteke.

⁸Mordekai-i shao büpa kü jom jühen shingvaishi Susalei yanpü shahkung lai hük Esther kü hutü nih-ei nyem-eja shei shuoh, hatü pinnyü ongpa touei peiyei pinnyülei nanglak kü phahji yahyangei deihhen nangkü etuh shei eteke.

⁹Hathakh nyokei leiyei Mordekai-i mehe e, ha Esther kü ejateke.

¹⁰Hahepak kü Mordekai kü ejahen shingvaishi büpa kü ha eteke,

¹¹“Ongpalei chongphobüthü hatü büpalei ongching phangkü nyupü nanglak peüi shahkung hük nyingei nyüpeih, hayü ongpai nenyükpü kü üpai nyüha nevaijü bahai mongpa dungei shühenshang, jütükhen shei nyüpeih. Yanglem hük mon nyüpeih: Hayü ongpai büpalei hon lenshuoh noei anjü mon hapa shennyak yangnyüpeih. Ngei kü dangkao mongei shükei shei ongpai nenyükpü nyih hapüan lomdaiteke.”

¹²Mechem Esther-i epü shah Mordekai kü ejapa,

¹³Mordekai-i Esther kü ejahen shah hapakei hathü kü e, “Ongshemei nyupai shei lebü Jehoda am mü lenei nüng mon yanghen shei deihnyu je?

¹⁴Hapa keipü nyihhihe kü nüng nenmü nyudaijema Jehoda yanghenü lebü jung phihük kübü vamkahen hih, shejao nüng hatü ampa am shem peü mahkemhen. Üpai nyingpa, nüng onglanyü vaihen thahshi nüng longei anshihpeyü hapa keipü nyihhihe shingvaishi anshihpü vainüng aokpeih.”

¹⁵Hahepak kü Esther-i Mordekai kü hapakei shahnyok shuoh,

¹⁶“Leituh, Susalei nyupü Jehoda am peü thaituh, hatü ngei nangkü nyih jem ya jem nehahneyingi shüaeiyungletuh. Ngei hatü ngei mü nyupü chongpholathü peü am keiha hamao shüaeiyunglehen. Hapheikü mon shahkungi nemongjao ngei ongpa touei heihhen: ha kü dijao nyemdidai” shei e.

¹⁷Hapheikü Mordekai nyokei leiyei Esther-i epükei lemphü dükteke.