Read Phom Naga ESTHER 5 Bible Online

ESTHER 5 - Phom Naga bible

ESTHER 5

¹Nyih jempabü kü Esther-i ongla ow owtü ongshem mongpa dungnukei ongpai uoteipü dung mü khangteishi yaong. Ongpayao ongshem mongei ong uoshing kü ongshemei shüpü shaden kü khangteishi uoteke.

²Ongpai Esther onglanyü shahphen shingei yaongshi eehinüng büpai pinnyü kü bamei deih, hatü büpalei lakei noshi nyupü hon lenshuoh pinnyü kü noei an. Hanangkü Esther heih-ei hapa lenshuoh jaang kü hongteke.

³Ongpai Esther onglanyü kü, “Meheang? Nüngi mehe phehüpa? Nüng keyü ngelei ongching hükkei shing bhaoeiyao shuohhen hih” shei e.

⁴Esther-i jangei, “Ongpai mongei deihjema, ngei shinnyih ongpa shing tempü mo kü ongpa hatü Haman nyi peikütuh” shei e.

⁵Hahepak kü ongpai, “Esther-i napükei dükhen shingvaishi shülangi Haman müei deikei” shei e. Hanangkü Esther-i tempü mo kü ongpa hatü Haman nyi pei.

⁶Mechem jomphong yiü yingei nyupa, ongpai Esther kü, “Nüngi mehe yahhünya, ha ngei nüng kü shuohhen. Nüngi mehe nanya? Ngelei ongching dangkao hükkei shing bhaoei shuohhen” shei e.

⁷Hahepak kü Esther-i, “Ngei yüpü hatü napeyü hapa hih:

⁸Ongpai ngei kü bamei deihjema, hatü ngei phepü hatü napü kü mongei deihjema, ngei shao ngenyih anji shing mo hük temhen, ha kü ongpa hatü Haman anjiphen peikütuh; shejüang ongpai phepü kü ngei ephahen” shei e.

⁹Ha nyih Haman longi mongongshi laang meishi dai. Shejao mechem Hamani ongpalei pe shadenei Mordekai eepa, hatü büpai yaongao neyaong hatü büpa kü dhüm neshuohnyu shei veiaokpa, Hamani Mordekai kü longi mongshih;

¹⁰shejao Hamani nengai-i shemei lei. Hapheikü büpai küphüthü hatü chenyüha Zeresh kü nyük,

¹¹hatü Hamani büpalei mophimo, hapeüthü meshük ang, hatü mekei büpa kü dhüm shuoh-ei ongpai büpa laphen dokpa kü anshihpa, hatü mekei lebü lakchongbüthü mao dokpüba laphen kü anshihpa, ha jung changmeiyei eteke.

¹²Shao Hamani, “Esther onglanyüi mo temtü lebü üpa kao nenyük, shejao ongpa mü ngei kü mon nyükpeih, hatü shao ngenyih-ao hapakei nyükei nyüpeih.

¹³Shejao Jehoda am Mordekai ongpalei pe shadenei uoshi eepü nangkü ngei kü hathüi shei meheyao mong hüshempü neshiü” shei e.

¹⁴Hahepak kü chenyüha Zeresh hatü büpalei küphüthüi büpa kü, “Meter anpünyi shaoshi anshai pülüng chantuh, hatü ngenep dhom mü Mordekai ha kü bakla kü bheanhütuh shei ongpa kü eyeishuoh; hapheikü nüng mongongshi molei daituh” shei e. Hapa shah meiangke shei Hamani deihtü hapakei anshai pülüng lingei tem.