Read Phom Naga ESTHER 6 Bible Online

ESTHER 6 - Phom Naga bible

ESTHER 6

¹Ha ya ongpa meishi neshiaok; hanangkü büpai vanglem lempü hepak kü kengei nyangpü lai büpa touei iehen eteke.

²Hapa ieshingkü Xerxes ongpa jühen shingvaishi ongpalei shaden yompü lakchongbü Bigthana hatü Teresh nyi-i shah showteipü Mordekai-i güh yepei eshuohpü jung nyangpü dangteke.

³Ongpai, “Hapa nangkü jeni Mordekai kü mehe dhüm hatü lakleiyao shuohla?” shei phe. Büpalei chongphobüthüi, “Meheyao neshuohangpih” shei jangei e.

⁴Ongpai, “Shahphen shingei üpa nyüke?” shei phe. Shaang Hamanü büpai lingpü anshai pülüng kü Mordekai bakla kü bheanhühen nangkü ongpa kü ha eshuohnüng shei shahphen shingei shüei nyu.

⁵Chongphobüthüi, “Haman shüei yaongshi nyüke” shei e. Ongpai, “Büpa nyükei shükei” shei e.

⁶Mechem Haman shüjapa, ongpai büpa kü, “Ongpai mongongei deihpü shennyak kü mekeipü dhüm hunya?” shei phe. “Ngei mü lenei ongpai üpa kü dhüm shuohhen deihnya?” shei Hamani deih.

⁷Hanangkü büpai ongpa kü, “Ongpai dhüm huhen shei deihpü shennyak keyü,

⁸ongpai owpü ong-ow yah-ei deinyeih, ongpai uoteipü koyei hatü ongpalei ong athen yah-ei thenhünyeih.

⁹Ongpalei lakchongbü khongkü longpü hüki hapa shennyak kü ong-ow hatü koyei shuohhütuh: ongpai dhüm huhen shei deihpü shennyak kü büpai ong-ow owhütuh hatü büpai-üng hapa shennyak koyei kü uotü chingnyü chingyangshong kü ‘Ongpai dhüm hupü shennyak kü hapakei düknyüpeih’ shei lenyaki deituh” shei eteke.

¹⁰Hahepak kü ongpai Haman kü, “Nüngi epükei lomi owhiai hatü koyei yahtuh, hatü ongpalei pe shadenei uoshi nyupü Jehoda am Mordekai kü dükeishuoh. Nüngi epü lemhükao nedüki tetuh” shei e.

¹¹Hanangkü Hamani owhiai hatü koyei yah, hatü Mordekai kü ha owhütü koyei dokshangei uotü chingyangshongei, “Ongpai mongongei deihpü shennyak keyü hapakei dhüm huei düknyüpeih” shei lenyaki deiteke.

¹²Hapheikü Mordekai ongpalei pe shadenei nyokei lei, shejao shülangi Hamanü shemei thepyaki shokuh kuhtü lei.

¹³Mechem Hamani chenyüha Zeresh hatü büpalei küphüthü kü büpa mehe ponghahpa ha jung ejashingkü büpalei chenyüha Zeresh hatü büpa kü shahnying eteipü küphüthüi büpa kü, “Mordekaiyü Jehoda am khih; nüngü büpa touei lomohhen khih. Nüngi büpa khüei neyaongaokshasha khih; nüng hingmei mah-ei dohhen khih!” shei e.

¹⁴Mechem jomphong büpa mü shah eteiyei nyupa, ongpalei ban tüktükpü chongphobüi büpa nyüknüng heih, hatü Esther-i tempü molei Haman shüshülangi dai.