Read Phom Naga ESTHER 7 Bible Online

ESTHER 7 - Phom Naga bible

ESTHER 7

¹Hanangkü ongpa hatü Haman nyi Esther onglanyü mü hahyinghen dai,

²hatü jiji nyih nyipabü yiü yingei nyushingkü ongpai, “Esther onglanyü, nüngi mehe nanya? Ha nüng kü shuohhen hih. Nüngi mehe yahhahhünya? Ongching hükkeishing vaijao bhaoei shuohhen hih” shei e.

³Hahepak kü Esther onglanyüi, “Nüngi ngei kü phahjiei deihjema, Oh Ongpa, hatü hapa kü nüng mongmeiyei deihjema ngelei yangnyu yemmü tuhshih: ngei napeyü ha, hatü ngelei nanglakthü yangshih ngei nüng kü yüpeyü ha hih.

⁴Mehenangkü ngei hatü ngelei nanglakthü jühen, li hümtükhen nangkü yutükteke. Ham paoh lapja-i nyüha hatü baha aa keiha yutükpü vailangmeyü ongpa kü kainaiyei ne-etei-i ngei nenmü nyudaihah shepeih” shei e.

⁵Xerxes ongpai Esther onglanyü kü, “Büpa üpaang? Henüng keipü dou dükhen yaongpü shennyakü melei nyüpa?” shei phe.

⁶Esther-i, “Hamei vepa ham kü shüveipeyü ha nemeipü shennyak Haman khih” shei e. Hahepak kü Hamanü ongpa hatü onglanyü nyi kü longi nyem.

⁷Ongpa mongshih-ei yaongei yiü tuhphongtü ongshem leipü pemongei heihdai. Shejao ongpai büpa kü mehe dükshuohhen ha nyingei Hamani Esther onglanyülei ngaümpheilei ngei yangtuh shei eyei yaongshi nyu.

⁸Shao ongpa ongshem pemongei nyupü mo shingei shüjajü Hamanü Estherlei lüngei lemshi chongjateke. Ongpai, “Ngei mü shemei onglanyü nyuyaki büpai shao pinnyü kü douten düknüng yaongnyu je?” shei lenei e. Ongpai ju kübü ha shah vamhinüng ongpa chongphopüthüi Hamanei dhe kü ashaki jümtük.

⁹Hahepak kü ban tüktükpü chongphobü ongpa touei yaongshi nyupü hüki, “Hamanei shem touei anshai pülüng hük meter hapünyi shaoshi lingei nyüke. Ongpa, nüng yangpü Mordekai bakla kü bheanei jühen nangkü Hamani lingpü khih” shei e. Ongpai, “Büpa halei bakla kü bheanei jütuh” shei e.

¹⁰Hanangkü Mordekai jühen nangkü lingpü anshai pülüng shangei jomphongi Haman bakla kü bheanei jü. Hahepak kü ongpa mongshihpü meidai.