Read Phom Naga MÜLANGPÜ 10 Bible Online

MÜLANGPÜ 10 - Phom Naga bible

MÜLANGPÜ 10

¹Hahepak kü SHEMBÜPAi Mosa kü, “Pharaoh kü peiyei veituh; mehenangkü ngei ngelei yashanyale douthü jom kü dükei huhen,

²hatü mekei ngei Ijip am kü nemei-i nopa, hatü jom kü ngei mehe yashanyale douthü dükpa, ha ammi ammei hühihathü kü ejahen, shejüang ammi ngeiyü SHEMBÜPA shei nyinghen shingvaishi ngei büpa hatü büpalei lakchongbüthülei mong vaanhüpeih” shei eteke.

³Hanangkü Mosa hatü Aaron nyi Pharaoh touei peiyei büpa kü, “SHEMBÜPA, Hebrew ammei Kahvangi hapakei enyüke: Meshükpa nüngi ngei touei maanpü neleihünya? Ngei kü khümhen shingvaishi ngelei nanglakthü leishihtuh.

⁴Nüngi ngelei nanglakthü neleishihjema, ngenyih ngei ammei kahdok kü shoukhanbaong yah-ei peikahen.

⁵Üpaiyao kahdok dhe ne-eeaokhen mü jomi kahdok kübü pühivung peü jomi mangtükhen.

⁶Jomi nüngei shem hatü nüngei lakchongbüthü hatü nanglakthülei shemthü makahen. Ammei bühipathüi hapa kahdok kü nyuhinüng shinnyih thahshi mang-eepü ammi eehen” shei eteke, hatü Mosa nyokei Pharaoh toueipü lüdai.

⁷Pharaohlei lakchongbüthüi büpa kü, “Meshükpa hapa shennyaki jen kü shanghah shuohhenang? SHEMBÜPA, jomei Kahvang kü khümhen Israel am leishihtuh; Ijip kahdok lomohdainyu khih shei nüngi nenyingnyu je?” shei eteke.

⁸Hanangkü Mosa hi Aaron nyi Pharaoh touei müei leiyei “Leituh, SHEMBÜPA, ammei Kahvang kü khümtuh” shei eteke. “Shejao üam üam leihenang?” shei büpai e.

⁹Mosai, “Hami hamei hashih naühathü hatü viünyü viüpathü, hamei hapeüthü hatü hamei yemhimakthü müei leihen; mehenangkü hami SHEMBÜPA kü dhüm shuoh-ei mohitap linghen nyüpeih” shei eteke.

¹⁰Pharaoh-i jijinyi kü, “Ngei am mü ammei nyühihathü leishihjema, SHEMBÜPA am mü nyukahen! Hingmei, ammei mongkü nemeipü deihshi nyüke shei nyingteke.

¹¹Mechemao nevai! Am bahathü mon leiyei SHEMBÜPA kü khümtuh; mehenangkü ammi napeyü hapa khih” shei eteke, hatü jijiphen Pharaoh toueipü shüei ngaitük.

¹²Hahepak kü SHEMBÜPAi Mosa kü, “Nüngei lak Ijip kahdok shak kü haongtuh, hatü shoukhanbaong vamei shüyaongi mangtü aopü kahdok kübü pühivung peü hahtükhen” shei eteke.

¹³Hanangkü Mosai Ijip kahdok shak kü büpalei lenshuoh-i shangei haong, hatü SHEMBÜPAi ha nyih helu hatü ha ya vangnyak pehe vanglüki kahdok kü lükteke; mechem vangngaipa, heong vanglüki kahdok kü lükteke; mechem vangngaipa, heong vanglüki shoukhanbaong yah-ei peiteke.

¹⁴Ijip kahdok kempülei shoukhanbaong peiyei ma, hatü kahmük kempülei bakteke. Hapa keipü shoukhanbaong shelei mechemao nevam, nevaijü hapakei ne-eehen.

¹⁵Kahdokao manghshi shoukhanbaongi jüm, hatü shüyaongi mangtü aopü kahmük kübü pühivung hatü betjükvungjük kemei hathüi hahtükkem; Ijip kahdok kemeilei meheyao phenha vunglak ne-ao, hatü kahmük kü pühivung neshiüi hahtükkem.

¹⁶Hahepak kü Pharaoh-i shüshülangi Mosa hatü Aaron nyi kü nyükei, “Ngei SHEMBÜPA, ammei Kahvang hatü anji khüei mang thahteke.

¹⁷Shao-üng chem ngelei mang tükshih, hatü SHEMBÜPA, ammei Kahvang kü ngei toueipü hapa dibenüng hanghi yahlangeishuoh shei phopshih” shei eteke.

¹⁸Hahepak kü Mosa Pharaoh toueipü daiyei SHEMBÜPA kü phop,

¹⁹hatü SHEMBÜPAi longi wong kohpü heshü vanglük jeihüteke, hatü shoukhanbaongthü kemei shetei Hakla Yungchingei hüngtükkem.

²⁰Shejao SHEMBÜPAi Pharaohlei mong vaanhü, hatü büpai Israel am neleishih.

²¹Hahepak kü SHEMBÜPAi Mosa kü, “Shanghahshi Ijip kahdok kü shangmang peihen nüngi vangsho philei lak haongtuh” shei eteke.

²²Hanangkü Mosai vangsho philei büpalei lak haong, hatü nyih jem thahshi Ijip kahdok kü shangmang peiteke.

²³Ijip am jom hüki hük ne-eetei, hatü üpaiyao nyih jem thahshi jom uopü toueipü meleiyao nedaiaok; shejao Israel am nyupü shing peülei vangngai nyuteke.

²⁴Pharaoh-i Mosa kü nyükei, “Am leiyei SHEMBÜPA kü khümtuh. Ammi nyühiha peü müei leituh; shejao ammei haümyemthü telei” shei eteke.

²⁵Shejao Mosai, “SHEMBÜPA, hamei Kahvang kü jakpü moila shuohhen ham kü yemhimak yahshih.

²⁶Nevai, hükao netuhphongi hamei yemhimakthü peü yah-ei leihen. SHEMBÜPA, hamei Kahvang kü mepa yem yah-ei khümhen ha hami jehen nyüke, hatü ngoishing mangngoi thahshi SHEMBÜPA kü mehe yem yah-ei khümhen hami shaang nenyingaok” shei eteke.

²⁷Shejao SHEMBÜPAi Pharaohlei mong vaanhü, hatü büpai jom neleishihhü.

²⁸Hahepak kü Pharaoh-i Mosa kü, “Ngei toueipü lüdaituh, Nüng sheyü ngei touei tepeikei! Nüngi ngelei dhe eepü nyih nüng dihen” shei eteke.

²⁹“Nüngi epü jiüphei! Nüngi epükei-üng hajük kü nüngi ngei ne-eepih” shei Mosai jangteke.