Read Phom Naga MÜLANGPÜ 11 Bible Online

MÜLANGPÜ 11 - Phom Naga bible

MÜLANGPÜ 11

¹Shaang SHEMBÜPAi Mosa kü, “Ngei shao cham hük mon Pharaoh hatü Ijip am kü shomhen hih; mechem büpai am leishihhenshang, büpai am kü changphahen.

²Nanglakthüi laophü laophülei chingyowthü kü hon hi ngin nyemyününg eyeishuoh” shei eteke.

³SHEMBÜPAi nanglakthü kü bamhen mü Ijip am kü yahyang shinshang mongdang jükhü. Nyeinya vaishi Ijip kahdok kü Pharaohlei lakchongbüthü hatü nanglakthü tou kü Mosa-ü longi dhüm kohpü lupülongpü shennyak leihü.

⁴Mosai ongpa kü, “SHEMBÜPAi hapakei enyüke: Nyak jiam kü ngei Ijip kahdok kemeilei daihen.

⁵Ijip kahdok kü hashongpathü, Pharaohlei cheha ong uoshing jeihen kübü hah shüteipü aalanyüthülei hashongpathü hatü shongei shaanpü yemhimakthü peü dihen.

⁶Hahepak kü Ijip kahdok kemeilei hapakei chemao mangvampü hatü haphei kao nevamhen theppüyoungpai maei nyukahen.

⁷Shejao Israel am hatü jomei yemthü kü shi-i dangkao nehuongpih. Shejüang ngei, SHEMBÜPAi Ijip hatü Israel am nyi aa kü baong hanei nopü khih shei ammi nyinghen.

⁸Hahepak kü nüngei lakchongbüthü peü ngei touei peiyei aümei shatü, ‘Nüng hatü nüng pheikü müpü nanglakthü leituh’ shei ehen. Hapheikü mon ngei leidaihen” shei eteke. Hapheikü Mosai mongshih wong kempai Pharaoh toueipü leidai.

⁹SHEMBÜPAi Mosa kü, “Ijip kahdok kü ngelei yashanyale dou nyeinya dükhen shingvaishi Pharaoh-i nüngi epü nebangküpih” shei eteke.

¹⁰Mosa hi Aaron nyi-i Pharaoh touei hathü yashanyale douthü peü dük, shejao SHEMBÜPAi Pharaohlei mong vaanhü, hatü büpalei kahdok kübü Israel am neleishih.