Read Phom Naga MÜLANGPÜ 15 Bible Online

MÜLANGPÜ 15 - Phom Naga bible

MÜLANGPÜ 15

¹Hahepak kü Mosa hatü Israel ami SHEMBÜPA kü hapa kesho lok: “Ngei SHEMBÜPA kü kesho lokhen; mehenangkü müknyinshekhangshi büpai aokpü dangteke; Koyei hatü ha kü uopüthü büpai yungei shüktükteke.

²SHEMBÜPAyü ngelei wong hatü ngelei kesho, hatü büpa ngelei yemleipüba nyüke. Büpa ngelei Kahvang hatü ngei büpa men longhen; Ngelei opalei Kahvang, hatü ngei büpa longei anshihhen.

³SHEMBÜPAyü hampa nyüke; SHEMBÜPAyü büpalei men nyüke.”

⁴“Pharaohlei koyei kharithü hatü büpalei veshanthü büpai yungchingei shüktükteke; Büpalei meipü lakchongbüthü yungchingei hüngtükteke;

⁵Yungnyü büngi jom lümlangteke; jom ilangmongei yaong keiha hingdaiteke.

⁶Nüngei lakdah kü, Oh SHEMBÜPA, müknyinshekhang wong nyüke; Nüngei lakdah-i, Oh SHEMBÜPA, vepathü nihtüknyüke.

⁷Nüngei ngan hi wong longpai nüngi vepathü baoh-ei haitükteke; Nüngei mongshih awlom kei vamei jom hahtang keiha hahtükteke.

⁸Nüngi ngü heepai yungchingao dütükteke; Mangpü büngao bham keiha yaongdaiteke, chüpü ilangmongao temei leidaiteke.

⁹‘Ngei changei daihen, ngei jom yephen; Ngei jomei mop hahtükhen, hatü ngei lümpü peü yahlanghen. Ngei ngelei yanlu haonghen, hatü ngelei laki jom mahtükhen’ shei vepai eteke.

¹⁰Shejao nüngei ngü chem mon dupai yungchingi jomlümlang; mangpü yungmok mülei kü nyiam keiha jom hingdaikem.”

¹¹“Oh SHEMBÜPA, kahvangthü khongkü nüng keipü üpa nyüpa? Daülangshemshepü kü nüng keiha den ngoipü, müknyinshekhang kü nyemshihanshi, yashanyale dükpü üpa nyüpa?

¹²Nüngi nüngei lakdahphi haongteke, kahdoki vepathü lühtük.

¹³Nüngi ahshi bampü nangkü, nüngi angei leipü nanglakthü müei lei; Nüngei wongi jomphong nüngei daülangpü kahdokei müei lei.

¹⁴Jatthüi hapa danteke, hatü jom nyemei kheüteke; nyempai Philistia amü temdaiteke.

¹⁵Edom am mübüthü nyemnyüke; nyempai Moab am mübüthü temdaiteke; Kanan am nyaüei yendaiteke.

¹⁶Nyemhühanhüpü jom shangkü peiteke; Oh SHEMBÜPA, nüngei laklu wong longpai nüngei nanglakthü mangpei thahshi nüngi angei leipü, nanglakthü manghomkem thahshi, nyempai yaong keiha yaongdaiteke.

¹⁷Nüngi jom müei lei, hatü jom nüngei kahshangei, Oh SHEMBÜPA, nüng nyupü shingei, Oh SHEMBÜPA, nüngei laki lingpü daülangpü shingei nüngi jom chongkhenei tuhphong.

¹⁸SHEMBÜPA denden kü vanglem lemkahen.”

¹⁹Mechem Pharaoh-ei koyeithü, koyei kharithü hatü hapa mübüthü yung homnüng heihpa, SHEMBÜPAi yung chümei nyupü jom shangkü laiyei shanshih, shejao Israel am yungyen homei kahvan kü kamei lüdai.

²⁰Hahepak kü Aaronei chenya Mariami tambourin yah-ei no, hatü nyühathü peü pinnyü phei kü tambourin notü vüngei phaukteiyei dai.

²¹Mariami jomphong kü hapakei kesho venteke: “SHEMBÜPA kü kesho loktuh; mehenangkü büpai yashanshi aokpü dangteke; Koyei hatü ha kü uopüthü büpai yungchingei hüngtükteke.”

²²Hahepak kü Mosai Israel am Hakla Yungching kübü müei Shur yingnyülei dai. Jom nyih jem thahshi halei dai shejao yung nedang.

²³Mechem jom Marah ngoipa, jomi Marah leipü yung neyingaok; mehenangkü hapa shahyaki nyuteke. Hanangkü hapa shingkü Marah shei men.

²⁴Hanangkü nanglakthüi Mosa kü, “Jeni mehe yung yinghen?” shei langmaan.

²⁵Mosai SHEMBÜPA kü phop, hatü SHEMBÜPAi büpa kü pü shohük hushuohteke; büpai hapa yung kü shük, hatü hapa yung vüngnyangi lei. Hamü SHEMBÜPAi jom nyuhen chonghen shahkungnyü shuoh, hatü hamü büpai jom kü dokteke.

²⁶Büpai, “Ammi SHEMBÜPA, ammei Kahvangei ngeü kenhingei bangjema, hatü büpa touei mehe jiüpa, ha dükjema, hatü büpai kangpü kü ven bangei büpalei shahkungnyü noteijema, ngei Ijip am kü shuohbenüng dinlem meheyao am kü neshuohpih; mehenangkü ngeiyü din meihüpü Kahvang hih” shei eteke.

²⁷Hapheikü jomi yunglok anpünyi nyupü shing, Elim touei pei, hatü yung yopailei baümtap veteke.