Read Phom Naga MÜLANGPÜ 19 Bible Online

MÜLANGPÜ 19 - Phom Naga bible

MÜLANGPÜ 19

¹Israel am Ijip tuhtü daipü len jempabü shongpü nyih kü-üng jom Sinai yingnyü ngoi.

²Jom Rephidim kübü daiyei Sinai yingnyülei shüteke, hatü Israel ami Sinai shangla kü baümtap ve,

³hatü Mosa Kahvang mü pongteinüng aong. SHEMBÜPAi kahshang leipü büpa kü nyüktü, “Nüngi hapakei Jakobei hühiha Israel am kü eyeishuoh:

⁴‘Ngei Ijip am kü mehe dükshuohpa ha ammi eeteke, hatü alangi cheha yang kü haütü piyei deipükei ngei am hatoumü ngei nyushingei müei leipeih.

⁵Hanangkü shaang, ammi ngelei ven bangei ngei mü vangteishuwteipü dükjema hangkuli peü shak kü amphongü ngelei thushong douvang vaihen. Kahdoknyü kemei ngelei,

⁶Shejao amphongü ngelei ngongpa chingling hatü daülangpü jathili vaihen. Hathü shah nüngi Israel am kü eyeishuoh’ ” shei eteke.

⁷Hanangkü Mosai leiyei nanglak mübüthü peü nyükei thaihütü SHEMBÜPAi büpa kü eshuohpü lemphüli jom kü ejateke.

⁸Hahepak kü nanglakthüi chemi aihük mü ngeü vamei, “SHEMBÜPAi epü lemphüli hami dükhen” shei jang. Nanglakthüi epü shah Mosai SHEMBÜPA kü eteke.

⁹SHEMBÜPAi Mosa kü, “Ngei nüng mü shah eteipü nanglakthüi danhen hatü shaang pheikü nüngi epükei jomi hinglemhen shangmü ngei phum yingkü yükahen” shei e. Mechem Mosai nanglakthülei shah SHEMBÜPA kü eshuohpa,

¹⁰SHEMBÜPAi Mosa kü, “Nüng nanglakthü touei leituh hatü shinnyih hatü ngenyih shei jom daüeilangei temtuh. Jomi jomei ashakviha daüeilanghütuh,

¹¹hatü nyih jempabü kü SHEMBÜPA ngei, nanglak peüi eeshi Sinai Kahshangei yiükahen.

¹²Nüngi Sinai Kahshang shinei viong lem lingtuh, hatü jom kü kahshangei neaonghen, hatü hapa kahshangla kao nehonghen eyeishuoh. Üpai kahshang kü honghenshang dihen.

¹³Büpayü yaongi shükei nevaijü lahhani kapei jühen; büpa kü üpalei lakiyao nehonghen. Shennyak vaituh, yemhimak vaituh yemmü netuhhen. Shejao mechem amit luangi vüngkahen, hajü mon jom kahshangei aonghen aok” shei eteke.

¹⁴Hanangkü Mosa kahshang leipü leiyei nanglakthü daühüteke, hatü jomi laophülei ashakviha daüteke.

¹⁵Hahepak kü büpai nanglakthü kü, “Jempabü nyih shingvaishi am nyingi temtuh, hatü ha nyih mongkü nyüha yopai kao teheih” shei e.

¹⁶Nyih jempabü dhom kü baümtapei nyupü nanglakthü peü nyemei kheüshi kahshangei klang vangteng hatü phum thihteke, hatü amit ngeü longpai vüngteke.

¹⁷Kahvang mü pongteinüng Mosai nanglakthü baümtap leipü müei dai, hatü jom kahshanglalei yaong.

¹⁸Sinai Kahshang kemei awshiti jümteke; mehenangkü SHEMBÜPAi hapa kü aw mü yiüteke, bhaokhen mü jenteke.

¹⁹Amit ngeü longpüba, longpüba vüngshingkü, Mosai eteke, hatü Kahvangi vangteng mü jangteke.

²⁰Mechem SHEMBÜPA Sinai Kahshang shangtaolei yiüpa, SHEMBÜPAi Mosa kü kahshang shangtaolei aongkei shei nyük, hatü Mosa aong,

²¹hatü SHEMBÜPAi Mosa kü, “Leituh, hatü nanglakthü kü ngei veihen nangkü viong lenei teheih shei shahvüng shuohtuh, jomi ha venlejema jom longshi shing mahkemhen.

²²Ngongpathü dangkao üam ngei touei peinya, jom nyingi daütükhen vongbong, hei nevaijema, ngei jom hanghihühen” shei eteke.

²³Mosai SHEMBÜPA kü, “Nanglakthü Sinai Kahshangei ne-aongaokhen khih; mehenangkü nüngi kahshang shinei viong lingtuh, hatü hapa daülangi tuhtuh shei shahvüng shuohteke” shei e.

²⁴SHEMBÜPAi Mosa kü, “Leituh, hatü nüng mü Aaron ankei; shejao ngongpathü vaijao nanglakthü vaijao SHEMBÜPA touei aonghen shei viong tepeihhü, hei nevaijema, ngei jom hanghihühen” shei e.

²⁵Hanangkü nanglakthü touei Mosa leiyei ha eteke.