Read Phom Naga MÜLANGPÜ 22 Bible Online

MÜLANGPÜ 22 - Phom Naga bible

MÜLANGPÜ 22

¹Mechem shennyak hanei-i mohoh nevaijü mi güh-ei jühen hatü yutükhenshang, gühpai mohoh hük kü nga hang shemhen, hatü mi hük shing ali shemhen.

³Büpai gühpü nangkü hang shemhen vongbong, shejao büpai hapakei neshemaokjema, güh hang shemei büpa aa hük vaiyei yutükhen.

⁴Gühpü yem mohoh vaijao, gadu vaijao, nevaijü mi vaijao gühpalei lakei yemmü chongküjema, büpai hük kü nyi shemhen. Gühpa hük nyak kü mih-ei shem apei shüpü yepei jütükjema, büpa jütükpü shennyak kü jüpü mang neshiü. Shejao hapa sho mahpü nyihnüng vampü vaijema, jüpü shennyak kü mang nyüke.

⁵Mechem shennyak hanei-i laophülei yemthü kah nevaijü nyalingngupai kahlei het-üh deihenshang, daiyei mih-ei kah kübü sheilivungla hahtükjema, yem shembüi laophülei kah kübü meipü yah-ei shemhen vongbong.

⁶Shennyak hanei-i laophülei kah kü aw hapshingkü phenha kü aw daiyei mih-ei kah leipü sheili kohpü nevaijü vetei bhongpü hahtükjema, aw happü shennyaki peü shemhen vongbong.

⁷Mechem shennyak hanei-i küphü haneilei lop nevaijü doumeinangmei jaohen yah-ei tuhhen, hatü shem leipü hapa gühlangjema, hatü ha gühpü shennyak yepjema, shing nyi shemhühen.

⁸Shejao gühpa neyepaokjema, hapa dou jaopü shennyak Kahvang khümshingei deiyei ngei küphülei dou negüh-angpih shei vanghühen vongbong.

⁹Mohoh, gadu, mi, ashakviha nevaijü mahdaipü dou dangjü shembü nyi vamei ngelei, ngelei shei aetteijema, jijiphen Kahvang khümshingei deihen; Kahvangi üpa nyonghühen, büpai hükpa shennyak kü shing nyi shemhühen vongbong.

¹⁰Mechem shennyak hanei-i küphü haneilei gadu, mohoh, mi nevaijü lebü yemhimak junghen yah-ei tuhhen, hatü üpaiyao neeepü kü hapa yem didai nevaijü ma yah, nevaijü mahdaijü,

¹¹hapa shennyaki SHEMBÜPA touei peiyei ngei küphülei yem negüh-angpih shei vanghen vongbong. Hapa yem gühlangpü nevaijema, yem shembüi hapa kü monghen vongbong, hatü hapa shing hanghivong neshemhen.

¹²Shejao hapa yem gühlangpü vaijema, hapa shennyaki shembü kü shemhen vongbong.

¹³Hapayü phaüyemi hahtükpü vaijema, denpü vaihen ju-ao yah-ei huhen vongbong; hatü phaüyemi hahtükpü nangkü büpai hanghivong shemhen napü neshiü.

¹⁴Mechem shennyak hanei-i küphülei yemhimak luei yahhen hatü hapalei shembü neshiüi ma yahjema, nevaijü didaijema, hapa shennyaki shemhen vongbong.

¹⁵Shejao shembü nyushi ha vamjema, mahdaipü kü neshemhen; hapayü luei yahpü vaijema, lupü lat mon shemhen.

¹⁶Bahai doi mangphepü nela shennyak hanei ami yawhlangjema, büpai yiükha shing müü shuohhen, hatü büpalei nyüha vailanghen vongbong.

¹⁷Shejao yiükhalei chepai büpa mü shem yemhühen nemongjema, büpai chepa kü yiükha shing müü lakshing shuohhen vongbong.

¹⁸Ammi nyüha thi yemmü netuh-i jütüktuh.

¹⁹Yemhimak mü mükbongjuyungpü shennyak jütüktuh.

²⁰SHEMBÜPA, ngei mü lenei shennyak üpai lebü kahvang kü jakpü moila shuohhenshang, jütüktuh.

²¹Chem kü nyudaipü benhayaha kü nejiüi nevaijü naamei tedük; mehenangkü amphongü Ijip kahdokei benha vaihampeih.

²²Ammi vaümnyü nevaijü hashihha üpa kao naamei teno.

²³Ammi jom kü naamei nojema, hatü mechem jomi ngei kü lenhenshang, ngei jomi lenpü danhen,

²⁴hatü ngei mongshih vamhen, hatü ngei amü vehok kü mahtükhen, hatü ammei nyüha vaümnyü hatü ammei hapeüthü hashihha leitükhen.

²⁵Ammi am mü chemi nyupü taopü ngelei nanglakthü kü lop lushuohjema, ammi hathü kü hang sheshi nyupü am kü kei teno, hatü ammi hathü leipü lop kü lop bhü-ei teyah.

²⁶Nüngi haneilei ashak vangeishuwei yahjema, vanghe mangshü shekü leiyeishuoh;

²⁷mehenangkü büpa büm kü jümhahhen ashak hapa mon vaihen aok; hei nevaijema mepa ümei büpa shihen? Büpai ngei kü leneiwongjema, ngei büpa kü janghen; mehenangkü ngeiyü bampü nyüke.

²⁸Ammi Kahvang kü teyaü, nevaijü ammei nanglakthü mübü kü tethaüvaü.

²⁹Nepheidai-i hepak jiüshi ammei puongmong kübü hahying hatü olive mainga moila shuohtuh. Ngei kü ammei hashongpathü moila shuohtuh.

³⁰Hapa aihük mü ammei mohoh hatü mithü shuohtuh. Shaanpheikü nyih nyet chenyü mü tuhtuh; nyih shetpabü kü ha ngei kü shuohtuh.

³¹Amü ngelei daülangpü nanglakthü. Hanangkü phaüyemi jüpü nyahhiphai tehah; hapayü shithü kü ühtüktuh.