Read Phom Naga MÜLANGPÜ 24 Bible Online

MÜLANGPÜ 24 - Phom Naga bible

MÜLANGPÜ 24

¹Hahepak kü büpai Mosa kü, “SHEMBÜPA touei kahshangei nüng mü Aaron, Nadab hatü Abihu hatü Israel am behethü pejempüan aongkei. Am maani tailuei aümei khümtuh,

²shejao Mosa mon SHEMBÜPA yopailei heihhen, lebüthüi yopailei neheihhen; hatü büpa mü nanglakthü kahshangei dangkao te-aong” shei eteke.

³Mechem Mosa leiyei SHEMBÜPAlei shah hatü shahkungnyüthü ejapa, jom peüi ngeü hük mü vamei, “SHEMBÜPAi epü lemphüli hami dükhen” shei eteke.

⁴Mosai SHEMBÜPAi epü nyangteke. Büpa nepnüng dhomi lomi paoei kahshanglalei moidü hük ling hatü Israel am phang anpünyi shing yaong anpünyi haongteke.

⁵Hahepak kü büpai Israel am nethethü shom, hatü jomi mohoh chebaongha yah-ei SHEMBÜPA kü mongjempü moila jakei shuoh.

⁶Mosai iy hükkei shing yah-ei chilimji kü shih, hatü hükkei shing yah-ei moidü kü haiteke,

⁷hatü büpai vangpüshuwpü laitap yah-ei nanglakthüi danshi ie, hatü jomi, “SHEMBÜPAi epü peü hami dükhen, hatü hami ven banghen” shei e.

⁸Hahepak kü Mosai chilimji kü iy shihtü nanglakthü kü haitü eteke, “Ha shahthü aimü SHEMBÜPAi am mü lingpü vangpüshuwpü iy kü veituh.”

⁹Mosa hi Aaron, Nadab hi Abihu hatü Israel am behethü jom pejempüan,

¹⁰kahshangei aong, hatü jomi Israel amei Kahvang eeteke. Büpalei la phangkü veiheni Sapphir yaongi shaokpükei, hatü phumshang keiha thüngshingi nyuteke.

¹¹Kahvangi Israel nanglak mübüthü kü lak neshih; jomi Kahvang ee, hatü jom hahyingteke.

¹²SHEMBÜPAi Mosa kü, “Ngei touei kahshangei aongkei, hatü hamü dantuh; hatü ngei nanglakthü kü noteihen shingvaishi nyangpü shahkungnyü kemei kohshi yaongshung nyi yahphahen” shei e.

¹³Hanangkü Mosai büpalei sheühbü Joshua mü layaong, hatü Kahvangei kahshangei Mosa aongteke.

¹⁴Mosai mübüthü kü, “Henji mangleikei thahshi am hamü danei chongkei; mehenangkü Aaron hi Hur nyi am mü tuhphünyeih; lemhük kei am nedanteipü vamjema jijinyi kü eyeishuoh” shei ephongteke.

¹⁵Mosa Sinai Kahshangei aongdai, hatü phumi kahshang jümlang.

¹⁶SHEMBÜPA müknyinshekhang Sinai Kahshangei yiü, hatü phumi kahshang nyih vok thahshi jümlang; nyih nyetpabü kü SHEMBÜPAi phum leipü Mosa kü nyükteke.

¹⁷Israel am shingvaishi SHEMBÜPAlei müknyinshekhang bahpü aw hük leshi kahshangei nyuteke.

¹⁸Mosai phum yingkü shüei kahshangei aong; halei büpa nyih pinyi ya pinyi nyuteke.